Kapitujt

Isaia: 66. Profeci

66

¹ Kështu thotë Zoti:

“Qielli është froni im,

shtroja e këmbëve të mia toka!

Ç’vlerë ka shtëpia që do të ma ndërtoni,

e cili është vendi i banimit tim?

² Të gjitha këto i bëri dora ime

e të gjitha këto më përkasin mua ‑

është fjala e Zotit.

Por mbi këtë e ngul shikimin tim:

mbi varfanjakun e mbi zemërplasurin

që dridhet prej fjalëve të mia!

Kundër flijimit të gabuar

³ Flijon kaun e pastaj vret njeriun! Kushton delen e i këput arrçin qenit!

Paraqet flinë e pastaj gjakun e derrit!

Djeg kemin e adhuron idhullin!

Sikurse ata që i zgjodhën udhët e veta,

dhe shpirti u kënaqet në iritë e tyre,

⁴ kështu edhe vetë do të zgjedh për ta

të zezën e tyre e do të bëj të bien mbi ta

pikërisht ato që u sillnin tmerr.

Unë fola e ata s’dëgjuan,

bënë të keqen ndër sy të mi,

zgjodhën atë që nuk më pëlqen.”

 

Këngë apokaliptike

⁵ Dëgjojeni fjalën e Zotit,

ju që dridheni prej fjalës së tij!

Thonë vëllezërit tuaj që ju urrejnë,

që ju përbuzin për shkak të emrit tim:

‘Le ta dëftojë Zoti lavdinë e vet

që ta shohin gëzimin tuaj!’

Të turpëruar ata do të mbesin!

⁶ Një zë zhurme vjen nga Qyteti,

një zë nga Tempulli!

Është zëri i Zotit

që hakmerret mbi armiqtë e vet!

⁷ Para se të sprovojë dhimbjet, lindi,

para kohës së të lindurit,

lindi djalin!

⁸ Kush e dëgjoi një punë të tillë?

Kush e pa një gjë të tillë?

A thua lind një vend

në një ditë të vetme?

A thua lind një popull

në një çast të vetëm?

E pra, Sioni, posa i ndjeu dhimbjet,

i lindi bijtë!

⁹ Vallë, a do ta hapja udhën e jetës

e s’do të bëja që edhe të lindë?

‑ thotë Zoti.

Ose unë që bëj të lindë,

do ta mbyllja udhën e jetës?

‑ thotë Hyji yt.

¹⁰ Gëzohuni me Jerusalemin,

galdoni për të ju që e doni!

Galdoni me të, galdoni,

të gjithë ju që qatë mbi të,

¹¹ që të thithni qumësht e të ngiheni

prej parzmave të ngushëllimit të tij,

që të dërgoni e të kënaqeni

në parzmat e lavdisë së tij!

¹² Sepse Zoti kështu po thotë:

“Ja, unë po bëj të arrijë

në të paqja porsi lumë,

porsi përrua vërshues pasuria e popujve

Qumësht do të pini, ngrykë do të mbarteni,

përmbi gjunjë do t’ju përkëdhelin.

¹³ Porsi nëna që ngushëllon të birin,

ashtu unë do t’ju ngushëlloj;

në Jerusalem ngushëllim do të gjeni.

¹⁴ Do të shihni, e zemra juaj do të gëzojë,

si bari i njomë do t’ju përtërihen eshtrat,

dora e Zotit do të dëftohet mbi shërbëtorët e tij

e zemërimi i tij mbi armiqtë e tij.

¹⁵ Se, ja, Zoti po vjen me zjarr,

qerret e tij të luftës janë si stuhia,

për ta shfryrë me hidhërim zemërimin

kërcënimin e vet me flakë zjarri.

¹⁶ Sepse me zjarr Zoti do të gjykojë

e me shpatë çdo njeri;

shumë do të jenë të goditurit prej Zotit.

Kundër mistereve pagane

¹⁷ Ata që shenjtërohen e pastrohen,

për të hyrë në kopshte pas njërit që qëndron në mes,

ata që hanë mishin e derrit,

ushqime të iritshme e minj,

të gjithë së bashku do të sharrojnë

‑ është fjala e Zotit.

Fjalim eskatologjik

¹⁸ E unë, që i njoh veprat e tyre dhe synimet e tyre, do të vij për t’i bashkuar të gjitha fiset e të gjitha gjuhët; do të vijnë dhe do ta shohin lavdinë time. ¹⁹ Unë do t’u jap një shenjë dhe do t’i dërgoj ata që prej tyre do të shpëtojnë, te popujt në Tarsis, Put, Lud, Mosok, Ros, Tubal dhe në Javan ‑ në ishuj të largët tek ata që nuk kanë dëgjuar për mua as nuk e kanë parë lavdinë time ‑ dhe këta do t’ua shpallin lavdinë time popujve. ²⁰ Do t’i riatdhesojnë të gjithë vëllezërit tuaj nga të gjithë popujt porsi kusht Zotit ‑ në kuaj, karroca, bartore, në mushq e gamile njëgungëshe e do t’i sjellin në Malin tim të shenjtë, në Jerusalem ‑ thotë Zoti ‑ po ashtu sikurse bijtë e Izraelit kushtojnë flinë e paraqitjes në enë të pastër në Shtëpinë e Zotit. ²¹ Edhe prej tyre do të zgjedh priftërinj e levitë ‑ thotë Zoti.

²² Po, sikurse qielli i ri

e toka e re, që po i krijoj,

do të qëndrojnë gjithmonë përpara meje,

‑ është fjala e Zotit ‑

kështu do të qëndrojë edhe fara juaj e emri juaj!

²³ E do të ndodhë që

prej hënës së re e në hënë të re,

prej të shtunës e në të shtunë

çdo njeri do të vijë të adhurojë

përpara meje ‑ është fjala e Zotit.

²⁴ E kur të dalin do të shikojnë kufoma njerëzish

që u çuan kundër meje:

krimbi i tyre nuk do të ngordhë

zjarri i tyre nuk do të fiket,

e do të jenë një bezdi për çdo njeri.”

Kapitujt