Kapitujt

Isaia: 1. Kundër popullit mosmirënjohës

1

¹ Vegimi i Isaisë, birit të Amosit, që e pa në lidhje me Judën e Jerusalemin në ditët e Ozisë, Joatamit, Akazit e Ezekisë, mbretërve të Judës.

Kundër popullit mosmirënjohës

² Dëgjoni, o qiej, dëgjo, o tokë,

sepse Zoti po flet:

“Fëmijët i rrita, i burrërova,

por ata më përbuzën.

³ Kau e njeh të zotin

edhe gomari grazhdin e pronarit të vet,

kurse Izraeli nuk njeh,

populli im nuk merr vesh.”

Ndëshkimi i Judesë

⁴ Vaj, për popullin mëkatar,

për kombin e ngarkuar me faje,

për farën e keqe, për bijtë e prishur!

E përbuzën Zotin,

hyjshmuan Shenjtin e Izraelit,

atij ia kthyen shpinën!

⁵ Po ku t’ju godas më,

që vazhdoni të grumbulloni trathtitë?

Çdo kokë është e sëmurë,

çdo zemër e molisur!

⁶ Prej shputës së këmbës deri në majë të kresë

në të vend të shëndoshë nuk ka:

por lëndime të mbetura, plagë të çelura,

as të spastruara,

as të mbështjella, as me vaj të lyera.

⁷ Toka juaj e shkretuar,

qytetet tuaja të shkrumbuara me zjarr!

Arat tuaja ndër sy jua hanë të huajt

e shkretohet si në shkretim të armikut.

⁸ Bija e Sionit ka mbetur

porsi kasollja në vresht,

porsi kacafiku në bostan,

porsi qyteti i rrethuar.

⁹ Sikur Zoti i Ushtrive

të mos na e kishte ruajtur farën,

do të kishim qenë tashmë porsi Sodoma,

Gomorrës do t’i kishim përngjarë!

Kundër hipokrizisë fetare

¹⁰ Dëgjojeni fjalën e Zotit,

o prijës të Sodomës!

Dëgjoje urdhrin e Hyjit tonë,

o populli i Gomorrës!

¹¹ “Ç’më duhen flitë tuaja të panumërta?”

‑ thotë Zoti. ‑

“Jam ngopur me fli shkrumbimi deshësh,

me dhjamë bagëtish të majura;

e gjak demash,

qengjash e cjepsh nuk dua!

¹² Kur donit të dilni përpara meje,

kush i kërkoi këto prej duarve tuaja

që të shëtitni nëpër tremet e mia?

¹³ Pushoni së më sjelluri fli të padobi;

inat e kam kemin.

Hëna e re, e shtuna dhe tubimet...

s’duroj dot paudhëri e festime bashkë!

¹⁴ Hënat e reja e festimet tuaja

i urren shpirti im,

u bënë barrë e rëndë për mua,

s’mund t’i duroj më!

¹⁵ Kur i shtrini duart tuaja në lutje,

unë i largoj sytë e mi prej jush;

edhe nëse i shumoni lutjet tuaja,

unë nuk ju dëgjoj.

Duart tuaja pikojnë gjak.

¹⁶ Lahuni, pastrohuni,

Hiqeni fajësinë tuaj prej syve të mi,

pushoni të bëni keq!

¹⁷ Mësoni të bëni vepra të mira:

kërkojeni drejtësinë,

ndihmoni të shtypurit,

jepini të drejtën bonjakut,

mbrojeni të vejën!

¹⁸ “Atëherë, ejani të pleqërohemi”

‑ thotë Zoti.

Edhe në qofshin mëkatet tuaja kuq si gjaku,

do të bëhen bardhë si bora

edhe në qofshin të kuqe si purpuri,

do të bëhen porsi leshi.

¹⁹ Nëse doni të më dëgjoni,

do t’i gëzoni frytet e tokës;

²⁰ nëse s’do të doni e do të më ngacmoni të hidhërohem,

shpata do t’ju përpijë!”

Kështu ka thënë goja e Zotit.

Vajtim mbi Jerusalemin

²¹ Po si kështu u bë lavire

qyteza besnike, plot mirësi!

Në të banonte drejtësia,

kurse tani ‑ vrasësit!

²² Argjendi yt është shndërruar në zgjyrë,

vera jote është përzier me ujë.

²³ Princat e tu të pabesë,

shokë me braca,

të gjithë dhuratat po lakmojnë,

se ç’po vrapojnë pas interesit.

S’i japin të drejtën bonjakut,

padia e vejushës as s’del para tyre.

²⁴ Prandaj kështu thotë Zoti,

Hyji i Ushtrive, i Fuqishmi i Izraelit:

“Ehu, se ç’do të kënaqem mbi kundërshtarët e mi,

se ç’do të hakmerrem mbi armiqtë e mi!

²⁵ Do ta kthej dorën time kundër teje,

me fi do ta pastroj zgjyrën tënde,

krejtësisht prej teje plumbin do ta zhduk!

²⁶ Do t’i kthej gjykatësit e tu si dikur,

këshilltarët e tu si në kohë të lashta,

e atëherë do të quhesh Qyteti i drejtësisë,

Qyteza besnike!”

²⁷ Sioni do të shpërblehet në saje të drejtësisë

e të kthyerit e tij në saje të së drejtës.

²⁸ Së bashku do të sharrojnë të paudhët e mëkatarët,

do të zhduken ata që e lanë Zotin.

Kundër lëndëve të shenjta

²⁹ Do të turpëroheni për terebentinat

që tani i mbani për të shenjtë,

do të skuqeni për shpifjet

që ju vetë i zgjodhët,

³⁰ Sepse, do të bëheni porsi lisi që iu thanë gjethet,

dhe porsi prozhmi që pa ujë ka mbetur.

³¹ I forti do të bëhet li,

kurse shkëndijë vepra e tij,

të dyja së bashku do të digjen,

e askush nuk do t’i fikë.

Kapitujt