Kapitujt

Isaia: 65. Gëzimi i shërbëtorëve të Hyjit e vuajtja e keqbërësve

65

¹ Më kërkuan ata që nuk më këshillonin,

u gjeta prej atyre që nuk më kërkonin.

Thosha: ‘Këtu jam! Këtu jam!’,

popullit që nuk e thirrte emrin tim.

² Vazhdimisht ia shtrija duart e mia

popullit kryengritës

që ecën udhës jo të mirë

pas synimeve të veta,

³ një popull që më ngacmon të hidhërohem,

gjithmonë ndër sy,

të cilët flijojnë në kopshte,

kem djegin mbi tulla;

⁴ që banojnë në varreza,

kalojnë natën në vende të fshehta,

hanë mishin e derrit

e në pjatat e tyre ushqime të irituara!

⁵ E për më tepër thonë: ‘Largohu!

Mos m’u afro, sepse do të të shenjtroja!’

Të tillët tym janë në hundët e mia,

zjarr që gjithë ditën digjet.

⁶ Shih! Të gjitha janë të shkruara para meje,

s’do të hesht derisa të hakmerrem,

t’ua paguaj në sqetullën e tyre,

⁷ Fajet tuaja e të etërve tuaj

të gjithëve së bashku ‑ është fjala e Zotit!

Atyre që flijuan kem në male,

atyre që më ngacmuan në kodra,

do t’ua mas në prehrin e tyre

pagën për vepra të mëparshme.

⁸ Kështu thotë Zoti:

“Sikurse në ndonjë vile kur gjendet lëng,

thuhet: ‘Mos e prish,

sepse në të është bekimi’“,

kështu edhe vetë do të veproj

për dashuri ndaj shërbëtorëve të mi,

s’do të zhduk gjithçka.

⁹ Do të bëj të rrjedhë prej Jakobit pasardhësi,

pronari i maleve të mia prej Judës;

të zgjedhurit e mi do t’i trashëgojnë,

shërbëtorët e mi, aty do të banojnë.

¹⁰ Kullotë grigjash do të bëhet Saroni,

mriz për gjedh lugina e Ahorit ‑

për popullin tim që do të më kërkojë.

¹¹ Kurse ju, që e lini Zotin,

që e harroni Malin tim të shenjtë,

që gati i bëni tryezën Gadit,

që Meniut ia mbushni kupën,

¹² të numëruar jeni të gjithë për shpatë,

në gjunj do të bini për të qenë prerë!

Sepse ju thirra e s’u përgjigjët,

unë fola e ju s’dëgjuat,

por bëtë të keqen ndër sy të mi,

zgjodhët atë që mua s’më pëlqen!”

¹³ Prandaj Zoti Hyj thotë kështu:

“Ja shërbëtorët e mi do të hanë,

kurse ju do keni uri;

ja, shërbëtorët e mi do të pinë,

kurse ju do të keni etje;

ja, shërbëtorët e mi do të gëzohen,

kurse ju do të turpëroheni;

¹⁴ ja, shërbëtorët e mi do të këndojnë

në harenë e zemrës së vet,

kurse ju do të bërtisni prej dhimbjes së zemrës,

do të ulëritni me shpirt të copëtuar!

¹⁵ Emrin tuaj do ta lini

nëmë për të zgjedhurit e mi:

‘Të vraftë Zoti Hyj!’,

ndërsa shërbëtorët e vet ai

do t’i thërrasë me një emër tjetër.

¹⁶ Kush do të jetë i bekuar mbi tokë,

le të bekohet me ‘Hyjin Amen’,

e kush do të përbehet mbi tokë,

le të përbehet me ‘Hyjin Amen!’,

e njëmend, të vështirat e shkuara do të harrohen,

do të fshihen, prej syve të mi.

¹⁷ Sepse, ja, unë po krijoj,

qiell të ri e tokë te re,

të kaluarat s’do të kujtohen,

më ndër mend nuk do të bien.

¹⁸ Por do të gëzohet e do të galdohet

përgjithmonë

në ato që unë po krijoj:

Jerusalemin do ta bëj gëzim,

popullin e tij do ta bëj hare.

¹⁹ Do të galdoj mbi Jerusalem,

do të kënaqem me popullin tim.

Në të më nuk do të dëgjohet

zë vajtimi as zë dënesjeje.

²⁰ Aty më s’do të ketë foshnjë që rron pak ditë,

as plak që të mos ia arrijë moshës së vet,

sepse djalosh do të mbahet

kush të vdesë njëqind vjeç,

e ai që s’i mbush njëqind vjet,

do të mbahet për njeri të mallkuar.

²¹ Do të ndërtojnë shtëpi e do të banojnë në to,

do të mbëltojnë vreshta e do t’i hanë frytet e tyre.

²² S’do të ndërtojnë që të tjerët të banojnë,

s’do të mbëltojnë që të tjerët të hanë:

sepse, jeta e popullit tim do të jetë

e gjatë porsi jeta e pemëve,

për kohë të gjatë të zgjedhurit e mi

do të gëzojnë frytet e duarve të veta.

²³ Mundi kot nuk do t’u shkojë,

as s’do të lindin për të vdekur shpejt,

bam do të jenë të bekuarish të Zotit,

bashkë me ta nipat e tyre.

²⁴ Madje edhe më parë se të më thërrasin,

unë atyre do t’u përgjigjem,

ndërsa ata ende të flasin,

unë ata do t’i vështroj!

²⁵ Ujk e qengj bashkë do të kullosin,

luani do të hajë kashtë si gjedhi;

kurse gjarpri do të hajë pluhur.

S’do të bëjnë dëm as nuk do të vrasin

mbi mbarë Malin tim të shenjtë ‑

është fjala e Zotit.

Kapitujt