Kapitujt

Isaia: 58. Agjërimi i pëlqyer prej Hyjit

¹ Bërtit me zë të lartë e mos pusho,

porsi bori lartësoje zërin tënd!

Shpallja popullit tim fajet e tij,

shtëpisë së Jakobit mëkatet e tij.

² Sepse ata më kërkojnë ditë për ditë

dhe dëshirojnë t’i njohin udhët e mia,

porsi populli që vepron drejtësinë

që nuk e harron të drejtën e Hyjit të vet.

Kërkojnë prej meje gjyq të drejtë,

dëshirojnë të jenë afër Hyjit.

³ “Pse të agjërojmë, kur ti nuk na shikon,

pse ta përulim shpirtin tonë, nëse ti s’e di?”

Ja, në ditën e agjërimit tuaj ju gjeni punë

dhe i mbytni në punë të gjithë punëtorët tuaj.

⁴ Ja, ju njinoni për t’u fjalosur e grindur,

e rraheni me grushte si të patenzonë.

Mos agjëroni më si sot,

nëse doni të dëgjohet zëri juaj këtu lart.

⁵ Pse, a i tillë është agjërimi që unë zgjodha,

dita kur njeriu bën vetëmohim?

Të ulësh porsi zunkthi kokën tënde,

të shtrosh grathore edhe hi?

A thua këtë do ta quash agjërim

e ditë që i pëlqen Zotit?

⁶ Vallë, a s’është agjërimi që unë zgjodha:

t’i këputësh verigat e padrejtësisë,

t’i zgjidhësh leqet e zgjedhës,

t’i lëshosh të lirë të ndrydhurit,

të copëtosh çdo zgjedhë?

⁷ A jo ta ndash bukën tënde me të uriturin,

t’i shtiesh në shtëpinë tënde skamnorët e të pastrehët?

Kur ta shohësh të zhveshurin, vishe

dhe mos e përbuz farefisin tënd.

⁸ Atëherë do të zbardhë porsi agimi drita jote,

shërimi yt do të vijë më shpejt;

para teje do të ecë drejtësia jote

e do të të përcjellë lavdia e Zotit.

⁹ Atëherë do të thërrasësh e Zoti do të të dëgjojë,

do ta thërrasësh e ai do të përgjigjet: “Këtu jam!”

Nëse do ta zhdukësh prej mesit tënd zgjedhën,

gishtin paditës dhe fjalën e keqe,

¹⁰ nëse do t’ia japësh kafshatën tënde të uriturit,

nëse do ta ngish të uriturin,

atëherë në errësirë do të shndritë drita jote,

terri yt do të jetë porsi mesdita.

¹¹ E Zoti do të të prijë gjithmonë,

do të të ngijë në vende të thata.

Ai do t’i forcojë eshtrat e tu,

do të jesh porsi kopshti i ujitur,

porsi burimi i ujërave të gjalla

që kurrë s’i mungojnë ujërat.

¹² Populli yt do t’i rindërtojë rrënojat e vjetra,

do t’i rindërtosh themelet e lëna brezni e brezni:

do të quhesh: “Rindërtues i rrënojave,

Ripërtëritës i rrugëve der’ në banim.”

E shtuna

¹³ Nëse do ta ruash këmbën të mos e shkelësh të shtunën,

dhe në ditën time të shenjtë nuk do të punosh,

nëse do ta çmosh për kënaqje të shtunën,

të ndershme ditën e shenjtë të Zotit,

do ta nderosh duke mos udhëtuar,

duke mos kryer punët e tua e marrëveshjet,

¹⁴ atëherë në Zotin do ta gjesh kënaqësinë tënde;

në karrocë do të të shëtis mbi malet e dheut,

do të bëj ta gëzosh pronën e atit tënd Jakobit,

sepse kështu foli goja e Zotit.

Kapitujt