Kapitujt

Isaia: 55. Ushqimi i të vobektëve

¹ O ju të gjithë që jeni të etshëm, ejani tek ujët,

le të vijnë gjithashtu edhe ata që s’kanë para!

Bleni drithë e hani;

ejani e bleni pa para e pa pagesë verë e qumësht!

² Pse t’i shpenzoni paratë në atë që s’është bukë

dhe mëditjen tuaj në gjëra që nuk ngijnë?

Nëse më dëgjoni mua do të hani çka është e mirë,

e do të shijoni ushqime të shijshme!

³ Ma vini veshin e ejani tek unë,

më dëgjoni e shpirti juaj do të jetojë!

Besëlidhja

Me ju do të lidh Besëlidhje të përhershme,

po, do t’i ruaj të mirat e Davidit.

⁴ Ja, atë e bëra dëshmitar për fise,

prijës e urdhërues për paganë.

⁵ Ja, do të thërrasësh një popull që s’e njihje,

te ti do të vrapojnë popuj që s’të njihnin,

për shkak të Zotit, Hyjit tënd,

të Shenjtit të Izraelit

që ty të madhëroi!

Afërsia e Zotit

⁶ Kërkojeni Zotin deri sa mund të gjendet,

thirreni në ndihmë deri sa është afër!

⁷ Le ta lërë i patenzoni udhën e vet,

njeriu i keq synimet e veta,

le të kthehet te Zoti

e ai do të ketë mëshirë për të,

tek Hyji ynë që është bujar në falje.

⁸ Sepse mendimet tuaja, nuk janë mendimet e mia,

as udhët tuaja nuk janë udhët e mia

‑ thotë Zoti.

⁹ Sepse, sikurse qielli që është i lartë

në krahasim me tokën:

po ashtu edhe udhët e mia janë të larta

në krahasim me udhët tuaja

dhe mendimet e mia

në krahasim me mendimet tuaja!

Fuqia e fjalës së Zotit

¹⁰ Dhe sikurse zbret shiu e bora nga qielli

e atje nuk kthehet,

por e ujit tokën, e zbrun

dhe i jep fuqi të blerojë,

i jep bujkut farën dhe bukën për ushqim,

¹¹ kështu edhe fjala ime që del prej gojës sime,

s’do të kthehet tek unë pa fryt,

pa pasë kryer gjithçka më pëlqen

dhe pa pasë zbatuar atë për çka e nisa.

Përfundimi i librit

¹² Po, me gëzim do të niseni

dhe në paqe do të përcilleni.

Malet e kodrat do të shpërthejnë në lavde para jush,

dhe të gjitha pemët e fushës do të duartrokasin.

¹³ Në vend të ferrave, do të rritet qiparisi,

në vend të hithrave, do të rritet mërsina.

Kjo do të jetë për nder të Zotit,

shenjë e përhershme që s’do të kalojë.

Kapitujt