Kapitujt

Isaia: 54. Jerusalemi i ardhshëm

54

¹ Galdo, beronjë, ti që nuk linde,

shpërthe në hare, gëzo, ti që fëmijë s’linde

sepse më të shumtë janë bijtë e të lënës

se të asaj që e ka burrin ‑ thotë Zoti.

² Zgjeroje vendin e tendës sate,

shtrij pa kursim pëlhurat e banesës sate,

zgjati litarët e tu,

forcoji hunjtë e tu,

³ sepse do të shtrihesh djathtas e majtas,

fara jote do t’i marrë trashëgim popujt,

do t’i popullojnë qytetet e lëna shkretë.

Dashuria e Zotit

⁴ Mos ki frikë, sepse nuk do të jesh e turpëruar,

mos u skuq, sepse nuk do të jesh e çnderuar,

sepse do ta harrosh marren e rinisë sate,

më s’do ta kujtosh çnderimin e vejërisë.

⁵ Sepse Krijuesi yt do të jetë fati yt,

emri i tij është Zoti i Ushtrive;

Shpërblyesi yt Shenjti i Izraelit,

Ai quhet Hyji i mbarë tokës,

⁶ Sepse si një grua të lënë

që vuan në shpirt

të thirri Zoti:

‘Gruaja e vjetëve të rinisë

a mund të përbuzet?’

ka thënë Hyji yt.

⁷ Për pak kohë të lashë,

por po të rimarr me dashuri të madhe.

⁸ Në momentin e zemërimit

e fsheha pakëz prej teje fytyrën time,

por me dashuri të amshuar pata dhimbje për ty,

tha Zoti Shpërblyesi yt.

⁹ Tashti është për mua si në ditët e Noehit,

kur u përbetova se ujërat e Noehit

më nuk do të vërshojnë tokën,

po ashtu u përbetova

se më nuk do të të hidhërohem

e nuk do të të kërcënohem.

¹⁰ Malet mund të zhduken,

kodrat mund të tranden,

porse dashuria ime s’do të zhduket prej teje

as besëlidhja e paqes sime nuk do të trandet,

thotë Zoti që pati mëshirë për ty.

Jerusalemi i ri

¹¹ Varfanjakja ime, stuhish e rrahur,

e pa farë ngushëllimi,

ja, në vend të gurëve do të vë karbunkull,

e themelet do t’i qes mbi safirë.

¹² Pirgjet e tua prej jaspisit,

dyert e tua gurësh të paçmueshëm,

muret rrethuese të tuat gurë stolie!

¹³ Të gjithë bijtë e tu do të jenë nxënës të Zotit

e madhe do të jetë lumturia e bijve të tu.

¹⁴ Do të jesh i themeluar në drejtësi,

larg do të jesh nga ndrydhja,

s’do të kesh pse të trembesh,

larg nga frika, sepse s’do të afrohet.

¹⁵ Shih! Nëse do të ndodhë ndonjë sulm,

s’do të jetë prej meje.

Kush të të sulmojë, para teje do të rrëzohet.

¹⁶ Shih! Unë e krijova farkëtarin

që fryn mbi prush

dhe prodhon vegla për punën e vet,

porse krijova edhe shkatërruesin për të shkatërruar.

¹⁷ S’do të ketë sukses asnjë armë

e farkuar kundër teje.

Do të dënohet çdo gjuhë

që do të ngrihet kundër teje në gjyq.

Ky është fati i shërbëtorëve të Zotit,

e tillë është drejtësia e tyre nga ana ime

‑ thotë Zoti.

Kapitujt