Kapitujt

Isaia: 45. Ciri, vegël e Hyjit

45

¹ Kështu thotë Zoti për Cirin,

të shuguruarin e vet:

“Ia kapa të djathtën e tij

për t’i shtruar para tij popujt,

për t’i vënë në arrati mbretërit,

për t’i hapur para tij dyert;

edhe dyert para tij s’do të mbyllen.

² Para teje unë do të ec,

malet do t’i rrafshoj,

dyert e bronzta do t’i thyej,

shulat e hekurt do t’i copëtoj.

³ Do t’i jap thesaret e fshehta,

pasuritë mirë të fshehura

që ta dish se unë jam Zoti,

Hyji i Izraelit, që të thirra me emër.

⁴ Për dashuri të shërbëtorit tim Jakobit

e të Izraelit, të të zgjedhurit tim,

të thirra ty me emrin tënd,

të shënova megjithëse s’më njihje.

⁵ Unë jam Zot e tjetër s’ka:

përveç meje Hyj tjetër nuk ka!

Të ngjesha në armë, megjithëse s’më njihje

⁶ që të dihet prej lindjes në perëndim,

se pos meje, askush tjetër s’është.”

Profecia e shëlbimit

Unë jam Zot e tjetër s’ka!

⁷ I jap trajtë dritës e krijoj terrin,

sjell mirëqenien, shkaktoj fatkeqësinë:

unë, Zoti, i bëj të gjitha këto!

⁸ Vesoni, o qiej, prej së larti vesoni

edhe retë le të rigojnë drejtësinë;

le të hapet toka

e le ta lindë Shëlbuesin,

bashkë me të të lulëzojë drejtësia!

Unë, Zoti, gjithçka krijova!

Zoti i gjithëpushtetshëm

⁹ Vaj për atë që i kundërshton Krijuesit të vet,

një copëz prej enëve të thyeshme prej dheu!

Pse a i thotë vorbëtarit balta: “Ç’po bën?”

e “Puna jote s’është vepër dore!”

¹⁰ Vaj për atë që i thotë babait: “Pse linde?”

ose gruas: “Përse linde?”

¹¹ Kështu thotë Zoti,

Shenjti i Izraelit,

ai që e trajtoi:

“A ju përket të më pyetni mbi të ardhmen e bijve të mi,

e të më urdhëroni mbi veprën e duarve të mia?

¹² Unë jam Krijuesi i tokës

dhe mbi të njeriun e krijova;

duart e mia qiejt i shtrinë,

i urdhëroj të gjithë ushtrisë së tyre.

¹³ Unë e ngrita që të bëjë drejtësi,

do t’ia drejtoj të gjitha udhët e tij.

Ai do ta ndërtojë qytetin tim,

të skllavëruarit e mi ai do t’i kthejë

pa shpërblim e pa dhurata. ”,

thotë Zoti i gjithëpushtetshëm.

Kthimi i paganëve

¹⁴ Kështu thotë Zoti:

“Bujqit e Egjiptit e tregtia e Etiopisë

e trimat e mëdhenj të Sabaimit

te ti do të kalojnë e të tutë do të jenë;

pas teje do të vijnë,

të mbërthyer në pranga do të ecin

e do të të adhurojnë

dhe ty do të të luten:

vetëm te ti është Hyji

dhe jashtë Teje, Hyj nuk ka!

¹⁵ Vërtet ti je Hyj i fshehur,

Hyji i Izraelit, Shpëtimtar!

¹⁶ Mendsh u morën e u skuqën të gjithë;

po, të turpëruar shkojnë

ata që punojnë trupore idhujsh.

¹⁷ Izraeli është i shëlbuar nga Zoti

me shëlbim të përhershëm:

nuk do të çnderoheni as s’do të turpëroheni

deri në shekuj të shekujve.”

Qartësia e veprave të Zotit

¹⁸ Sepse kështu thotë Zoti,

ai që krijoi qiellin, vetë Hyji,

ai që i dha trajtë tokës, e krijoi,

ai që e bëri të patrandshme;

s’e krijoi të jetë e shkretë

e krijoi që të banohet:

“Unë jam Hyji e tjetër s’ka!

¹⁹ Unë nuk fola në fshehtësi,

në një skaj të errët të tokës,

nuk i thashë farës së Jakobit:

Më kërkoni në shkretëtirë!”,

unë jam Zoti që flas të drejtën,

e që e shpall drejtësinë.

Zoti është Hyji i gjithmbarshëm

²⁰ Mblidhuni, ejani e afrohuni së bashku

ju që shpëtuat nga paganët.

Mangut janë në kokë ata që mbartin drunë e gdhendur

e i luten hyjit që s’mund t’i shpëtojë.

²¹ Qitni provat e dilni përballë,

këshillohuni të gjithë së bashku!

Kush që moti këtë gjë e parakallëzoi

e që atëherë e paralajmëroi?

Vallë, a jo unë Hyji,

s’ka hyj tjetër përpos meje?

Hyj të drejtë e Shpëtimtar s’ka tjetër përveç meje!

²² Kthehuni kah unë e do të shpëtoni,

të gjitha viset e tokës,

se unë jam Hyj e tjetër s’ka!

²³ Me vetvete unë jam përbetuar:

nga goja ime del e drejta,

fjala që kurrë s’kthehet dalë ‑

para meje çdo gju do të përkulet,

e çdo gjuhë do të bëjë betim,

²⁴ e do të thotë:

vetëm në Zotin ka drejtësi e forcë!

Tek Ai do të vijnë të turpëruar

të gjithë që shfryejnë kundër tij:

²⁵ në Zotin do të shfajësohet e do të gjejë lavdi

fara mbarë e Izraelit.

Kapitujt