Kapitujt

Isaia: 32. Mbreti i drejtë

32

¹ Ja se mbreti do të mbretërojë me drejtësi,

sundimtarët drejt do të sundojnë,

² çdo njeri do të jetë straherë,

në mot të lig do të jetë strehim,

si përrenj uji në tokë të etur,

si hija e qetës në vend të shkrumbuar.

³ S’do të errësohen më sytë e veguesve,

me vëmendje do të dëgjojnë dëgjuesit,

⁴ zemra e të paditurve do ta mësojnë urtinë,

shpejt e rrjedhshëm do të flasë belbacaku

⁵ bujar më s’do të quhet i pandershmi,

burrë i mirë s’do të mbahet ngatërrestari.

Trashamani e bujari

⁶ Sepse marri flet i patenzoni,

paudhëri i sendërton zemra,

që me qëllim të kryejë pabesi,

të pohojë gabime në lidhje me Zotin,

të uriturit zbrazët barkun, t’ia lërë,

të mos i japë të eturit të pijë.

⁷ Shumë të këqija janë gënjeshtrat e mashtruesit,

sendërton me mend dredhi,

për t’i bjerrë të përvuajturit me fjalë të rreme

edhe atëherë kur i varfëri mund të vërtetojë të drejtën.

⁸ Bujari jep veç këshilla bujare

e vepron gjithherë me bujari.

Kundër grave të Jerusalemit

⁹ Ngrihuni, gra mendjelehta,

dëgjojeni zërin tim,

bija të shkujdesura,

vini vesh fjalës sime!

¹⁰ Pas një viti e ca ditësh,

do të trembeni, o mendjelehta;

u krye vjelja,

mbledhje frutash më s’do të ketë!

¹¹ Dridhuni, o mendjelehta,

trembuni, o të pakujdesura,

hiqni stolitë, zhveshuni,

ngjeshni ijët me grathore.

¹² Rrahni parzmat

për shkak të arave të lezetshme,

për vreshtat pjellore,

¹³ për tokën e popullit tim,

që e mbulon ferrë e hallugë,

për të gjitha shtëpitë e gëzimit,

për qytetin që galdon!

¹⁴ Sepse i braktisur do të jetë pallati,

shkret do të mbetet qyteti plot zhurmë,

Ofeli edhe Bahani

shpellë do të bëhen për amshim,

gëzim për gomarët e egër,

kullotë për grigja!

Shpëtimi do të vijë prej Zotit

¹⁵ Deri që përsëri mbi ne

të dikohet Shpirti prej së larti.

Atëherë shkretëtira në kopsht do të shndërrohet,

edhe kopshti si pyll do të vlerësohet,

¹⁶ në shkretëtirë do të banojë e drejta,

në kopsht drejtësia do të ketë selinë.

¹⁷ Fryti i drejtësisë ‑ paqja do të jetë,

rrjedhojë e drejtësisë qetësia,

shpresë e sigurt për amshim.

¹⁸ Populli im do të banojë në një vend paqeje,

do të jetojë në banesa të qeta,

në vende të sigurta

¹⁹ ‑ porse pylli krejtësisht do të pritet

e qyteti krejtësisht do të humbasë ‑ .

²⁰ Të lumët ju: do të mbillni pranë ujërash,

të lirë do të lini ka e gomar!

Kapitujt