Kapitujt

Isaia: 27. Vreshti i Zotit

¹ Atë ditë Zoti do ta ndëshkojë

me shpatën e vet të mprehtë, të fortë e të madhe

Leviatanin, gjarprin që bën dredha,

Leviatanin, gjarprin dredha dredha,

do ta mbysë kuçedrën e detit.

Vreshti i Zotit

² Atë ditë do të jetë një vresht i ëmbël:

këndojini atij!

³ Unë, Zoti, atë e ruaj,

çdo kohë vetë e ujis,

roje i rri natë e ditë,

që askush të mos e dëmtojë.

⁴ Kundër tij nuk jam zemëruar.

A qet kokë ferrë e hallugë?

Në luftë do të sulem kundër tyre,

në flakë të zjarrit do t’i djeg!

⁵ O, më mirë, le të bjerë në ndore,

le të bëjë me mua paqe,

me mua paqe le të bëjë.

Hir Jakobit e ndëshkim ndrydhësit

⁶ Në ditë të ardhshme rrënjë do të lëshojë Jakobi,

do të qesë pipa e lule Izraeli,

me fruta të veta do ta mbushë krejt botën.

⁷ A i ra Zoti sikurse u ra

atyre që i ranë atij?

A e vrau Izraelin sikurse i vrau

ata që e vranë atë?

⁸ E ndëshkon me masë duke e dëbuar,

e dëbon me frymën e vet të fortë,

me atë fuqi që fryn era e lindjes.

⁹ Pikërisht kështu do të shpërblehet fajësia e Jakobit,

e ky do të jetë fryti i faljes së mëkatit të tij.

Le të veprojë me gurët e lterit

siç grimcohen gurët e gëlqeres,

të mos ngriten më askurrë

gurngula e lterë kemimi.

¹⁰ Sepse shkret mbeti qyteti i fortë,

vend i lëshuar, i lënë si shkretëtirë.

Aty viçat dalin në kullotë,

aty ka gjenë, gërmushat brejnë.

¹¹ E kur gemat i thahen, ia thyejnë,

gratë i marrin e me to bëjnë zjarr.

Sepse ky s’është popull i mençur,

Ai që e krijoi për të s’do të ketë mëshirë,

s’do ta falë Ai që e përftoi.

Kthimi i Izraelit

¹² Po atë ditë Zoti do t’i shtypë kallëzat

nga Lumi gjer në përroin e Egjiptit,

kurse ju do t’ju bashkojë

një nga një, o izraelitë!

¹³ Po atë ditë do të bjerë boria e madhe,

do të vijnë të humburit në dhe të Asirit,

e të mërguarit në tokë të Egjiptit

dhe do ta adhurojnë Zotin

në Malin e shenjtë, në Jerusalem.

Kapitujt