Kapitujt

Isaia: 21. Pushtimi i Babilonisë

¹ Profeci mbi shkretëtirën e detit.

Porsi vorbullat që përplasen në jug,

vjen nga shkretëtira, nga një vend i tmerrshëm.

² Një vegim i hidhur mua më qe dëftuar:

rrëmbyesi rrëmben,

shkatërruesi shkatërron!

“Sulu, Elam,

rretho, Medi!

Unë bëj të pushojë çdo gjëmim!”

³ Këndej ijët e mia më dridhen,

më pushtuan dhimbjet si dhimbjet e lindëses;

jam i tronditur për çka dëgjoj,

i tmerruar për çka shikoj.

⁴ Zemra më lëshon,

tmerri më pushton:

mugu që e dëshiroja

erdhi e m’u bë tmerr.

⁵ Shtrojnë tryezën,

shtrojnë ciloren,

hanë e pinë.

“Ngrihuni, o krerë,

lyeni shqytin!”

⁶ Sepse Zoti kështu më tha:

“Shko, vëre vrojtuesin,

të lajmërojë gjithçka të shohë!

⁷ Nëse sheh karrocë, koçi me dy kuaj,

njerëz hipur në gomarë,

njerëz hipur në gamile,

le të vëzhgojë me kujdes,

me kujdesin më të madh!”

⁸ Atëherë vrojtuesi thirri:

“Në vrojtore, Zotëri,

rri vazhdimisht, gjithë ditën;

në rojën time qëndroj,

qëndroj vazhdimisht gjithë natën.

⁹ Ja, këtu po vjen një mizëri njerëzish,

koçi dy kuajsh!”

Ai vazhdoi e tha:

“Ra, ra Babiloni

dhe të gjitha shtatoret e hyjnive të tij copë e grimë u bënë për tokë!”

¹⁰ Shirja ime, biri i lëmit tim,

çka dëgjova nga Zoti i Ushtrive,

Hyji i Izraelit,

jua zbulova!

Profeci mbi Dumën

¹¹ Profeci mbi Dumën.

Nga Seiri dikush më thërret:

“Rojtar, ç’kohë nate është?

Rojtar, ç’kohë nate është?”

¹² Rojtari përgjigjet:

“Po vjen mëngjesi, por edhe nata;

nëse doni të pyetni, pyetni,

kthehuni, ejani!”

Profeci mbi arabët

¹³ Profeci mbi shkretëtirën.

Në pyll, në shkretëtirë do ta kaloni natën,

karvanët e Dedanit!

¹⁴ Silluni ujë të eturve,

ju që banoni në tokën Tema,

ndesheni me bukë të arratisurin!

¹⁵ Sepse ata ikin para shpatave,

para shpatës së zhveshur,

para harkut të ngrehur,

para luftës së madhe.

¹⁶ Sepse kështu më thotë Zoti: “Edhe një vit, si viti i mëditësit, dhe mbarë lavdia e Cedarit do të marrë fund. ¹⁷ Numri që do të mbesë nga harqet e trimave të bijve të Cedarit do të jetë shumë i vogël. Sepse kështu ka thënë Zoti, Hyji i Izraelit.”

Kapitujt