Kapitujt

Isaia: 4. Pinjolli i Zotit

¹ Shtatë gra do të lakmojnë një burrë të vetëm

atë ditë e do t’i thonë:

‘Me bukën tonë ne do të ushqehemi,

me petka tona ne do të vishemi,

vetëm na lër të mbajmë emrin tënd:

flake prej nesh turpin tonë. ’“

Pinjolli i Zotit

² Dhe atë ditë pinjolli i Zotit

do të jetë nder edhe lavdi,

fryti i tokës do të jetë mburrje e galdim

për të shpëtuarit e Izraelit.

³ Dhe do të ndodhë:

kush do të mbetet gjallë në Sion,

kush të shpëtojë në Jerusalem,

do të quhen të gjithë “shenjtër”,

e do të regjistrohen

se në Jerusalem jetojnë.

Rivendosja e ardhshme

⁴ E kur Zoti ta ketë larë

ndytësinë e bijës së Sionit,

edhe gjakun ta ketë larë

që u derdh në Jerusalem

me fuqi të frymës e me forcë të zjarrit,

⁵ Zoti i lum do të krijojë

përmbi mbarë malin Sion

e mbi tubimin e tij

një re tymi ditën,

kurse natën flakë zjarri të ndezur.

Sepse, mburojë mbi të gjitha do të jetë Lavdia

⁶ tandë që mbron nga vapa e ditës

strehë shpëtimi nga stuhia e shiu.

Kapitujt