Kapitujt

Ezekieli: 43. Kthimi i Zotit

¹ Atëherë më çoi te dera që shikonte në drejtim të lindjes. ² Dhe, ja, Lavdia e Zotit të Izraelit po vinte nga Lindja. Ushtima e saj porsi ushtima e ujërave të mëdha: toka shkëlqente nga madhëria e tij! ³ Unë atëherë pata një vegim të ngjashëm me vegimin që pata kur erdhi për ta shkatërruar qytetin, vegimi ishte sipas dukjes së vegimit që e pata në brigjet e lumit Kobar. Atëherë rashë me fytyrë përdhe.

⁴ Lavdia e Zotit hyri në Tempull nëpër derën që shikonte nga lindja. ⁵ Atëherë shpirti më ngriti e më futi brenda në oborrin e brendshëm. Ja, mbarë Tempulli ishte mbushur me Lavdinë e Zotit. ⁶ Atëherë dëgjova një zë, dikush më fliste prej Tempullit, e një njeri qëndronte në këmbë pranë meje. ⁷ Më tha: “Biri i njeriut, ky është vendi i fronit tim, vendi i gjurmëve të këmbëve të mia. Këtu do të banoj në mes të bijve të Izraelit për amshim. Shtëpia e Izraelit më nuk do ta përdhosë Emrin tim të shenjtë, as ata as mbretërit e tyre me fëlligështitë e tyre e me kufoma të mbretërve të vet në vdekjet e tyre. ⁸ Ata e ndërtuan pragun e vet përbri pragut tim, gurngulurit e vet përbri gurngulurit tim: kishte vetëm një mjet mes meje e tyre dhe e përdhosën Emrin tim të shenjtë me turpësitë që i bënë. Kjo edhe qe arsyeja që i shfarosa në zemërimit tim. ⁹ Por tani e tutje ata do t’i hedhin larg meje lavirësitë e tyre edhe trupat e mbretërve të vet e unë do të banoj në mesin e tyre përgjithmonë.

¹⁰ Ti, pra, o biri i njeriut, dëftoja shtëpisë së Izraelit Tempullin që të turpërohet për fajësitë e veta e le t’ia vënë masën. ¹¹ Nëse do t’u vijë turp për gjithçka kanë bërë, përshkruaje Tempullin dhe veçantitë e tij, hyrjet e daljet e tij, plotësisht dukën e tij, të gjitha rregulloret e ligjet e tij përshkruajua. Vizatoje ndër sy të tyre pikë për pikë që t’ia ruajnë krejtësisht dukën e tij e të gjitha rregulloret t’i vënë në zbatim. ¹² Ky është ligji për Tempullin: në majën e malit, mbarë vendi që e rrethon është tejet i shenjtë; ja, ky është ligji i Tempullit.”

Lteri

¹³ Këto janë masat e lterit në kute ‑ e kuti këtu është një kut e një pëllëmbë. Baza e tij ishte një kut e lartë e një kut e gjerë. Buza në anë të tij e prerë përreth një pëllëmbë. Kurse lartësia e lterit ishte: ¹⁴ nga baza që ishte në truall deri në bazën e poshtme të lterit: dy kute lartësi, kurse gjerësia vetëm një kut, ndërsa prej bazës së vogël deri në të madhen: katër kute i lartë, kurse i gjerë vetëm një kut. ¹⁵ Vetë vatra ishte katër kutesh dhe nga vatra ngallitnin lart katër brirë. ¹⁶ Vatra ishte e gjatë dymbëdhjetë kute, dymbëdhjetë kute e gjerë: katror me krahë të barabartë. ¹⁷ Sipërfaqja: katërmbëdhjetë kute e gjatë e katërmbëdhjetë kute e gjerë në katër këndet e saj. Buza gjithkund përreth saj e prerë gjysmë kuti e baza e saj rreth e rreth një kut. Shkallët i shihnin në drejtim të lindje.

Shugurimi i lterit

¹⁸ Atëherë më tha: “Biri i njeriut, kështu thotë Zoti Hyj: Ky është ligji i lterit kur do të ndërtohet për t’u kushtuar mbi të flia e shkrumbimit e për t’u derdhur gjaku. ¹⁹ Priftërinjve levitë, që rrjedhin prej Sadokut e që kanë të drejtë të shërbejnë ‑ është fjala e Zotit ‑ jepu një mëzat për flinë pendestare. ²⁰ Merr prej gjakut të tij e me të lyej katër këndet, katër këndet e sipërfaqes, buzën gjithkund përreth, kështu do ta pastrosh e do ta pajtosh. ²¹ Pastaj merre mëzatin që do të jetë kushtuar për mëkate, dhe digje në vendin e caktuar në Tempull përjashta Shenjtërores. ²² Ditën e dytë kushto një cjap të patëmetë për mëkate. Le ta shpërblejnë lterin ashtu siç e bënë me mëzatin. ²³ Kur ta kesh shpërblyer lterin, kushtoje një mëzat të patëmetë dhe një dash nga grigja të patmetë. ²⁴ Kushtoji ata në praninë e Zotit. Priftërinjtë le të qesin mbi ta kripë e le t’i kushtojnë si fli shkrumbimi për nder të Zotit. ²⁵ Për shtatë ditë çdo ditë kushto si fli për mëkate një cjap, një mëzat nga gjedhi e një dash nga grigja, të gjithë pa farë të mete. ²⁶ Gjatë shtatë ditëve le ta shpërblejnë lterin. Kështu do ta bëjnë të pastër, e do ta shugurojnë. ²⁷ Si të jenë kryer këto ditë, të tetën ditë e më tutje, priftërinjtë le t’i kushtojnë në lter flitë tuaja të shkrumbimit e të pajtimit e unë do të kem përdëllim për ju ‑ thotë Zoti.”

Kapitujt