Kapitujt

Ezekieli: 17. Shëmbëlltyra e shqiponjës

17

¹ Më qe drejtuar kjo fjalë e Zotit:

² ”Biri i njeriut, gjeje një gjëegjëzë e tregoja shtëpisë së Izraelit një shëmbëlltyrë.

³ Thuaj:

Kështu thotë Zoti Hyj:

Një shqiponjë e madhe,

me krahë të mëdhenj,

me pupla të gjata

me pendë të dendura

e shumëngjyrëshe

ia behu në Liban

dhe ia mori majën cedrit,

⁴ ia këputi gemin më të lartin

dhe e çoi në tokën Kanaan,

e vendosi në qytetin e tregtarëve.

⁵ Mori një pinjoll nga toka

dhe e qiti në tokë të punuar

përbri ujërave të shumta

e mbëltoi si shelgun

⁶ që të bulëzojë e të rritet

në hardhi që merr haptas,

jo shumë të lartë

që drejt shqiponjës gemat t’i shtrijë

e rrënjët t’i rriten nën të.

U bë trung i fortë,

i qiti pipat

gjatë i lëshoi pinjollat.

⁷ Ishte edhe një shqiponjë tjetër,

me krahë të mëdhenj,

me pupla të dendura:

dhe, ja, trungu

drejt saj i lëshoi rrënjët,

pipat drejt saj i lëshoi

që ta ujitë

më mirë se dheu ku ishte mbëltuar.

⁸ Në tokën e mirë,

bri ujërave të shumta

është e mbëltuar

që të lëshojë shermende

që të japë fruta

e të jetë hardhi madhështore.

⁹ Thuaj: Kështu thotë Zoti Hyj:

A thua do të përparojë?

A thua shqiponja

rrënjët s’do t’ia nxjerrë

frutat s’do t’ia këpusë?

A s’do t’i thahen

posa t’i dalin pipat?

S’do të duhet një mund i madh

as popull i shumtë

rrënjët për t’ia nxjerrë!

¹⁰ Ja, e mbëltuar është:

a do të përparojë?

Vallë, a nuk do të thahet

posa ta ketë prekur

era përvëluese e lindjes?

Pikërisht në tokën ku mbiu

do të thahet!”

¹¹ Më qe drejtuar kjo fjalë e Zotit: ¹² “Thuaji, pra, shtëpisë kryekëcyer: A nuk e kuptoni se ç’do të thotë kjo? Ja, erdhi mbreti i Babilonit në Jerusalem; e mori mbretin e princat e tij dhe i çoi te vetja në Babilon. ¹³ Mori njërin nga pinjollët e mbretit e lidhi me të besëlidhje, mori prej tij përbetimin pasi i mori të gjithë të vyerit e vendit, ¹⁴ me qëllim që mbretëria të jetë e ligshtë e të mos mund të çohet në kryengritje, por ta ruajë e ta mbajë besëlidhjen me të. ¹⁵ Porse ky u çua kundër tij, dërgoi lajmëtarë në Egjipt që t’i jepeshin kuaj e shumë ushtarë. A do të mund të përparojë ose të shpëtojë kush bën kështu? Kush e thyen besën, a thua mund të shpëtojë? ¹⁶ Pasha jetën time ‑ thotë Zoti Hyj ‑ pse e theu përbetimin dhe e prishi besëlidhjen me mbretin që e vuri në fron, do të vdesë në vendin e mbretit, pikërisht në mes të Babilonit. ¹⁷ E faraoni, me gjithë ushtri të madhe e me popull të shumtë, s’do të mund t’i ndihmojë gjë në luftë, kur ai të lartësojë brigje e të punojë llogore për të vrarë njerëz të shumtë. ¹⁸ E bëri në asgjë përbetimin për ta zhbërë besëlidhjen. Po edhe pse e kishte dhënë besën, veproi kështu. Jo, assesi s’do të shpëtojë!

¹⁹ Prandaj, kështu thotë Zoti Hyj: Pasha jetën time: përbetimin që e përbuzi, besëlidhjen që e theu do t’ia kthej mbi kokën e tij, ²⁰ do ta ngreh kundër tij rrjetën time e do të zihet në rrjetën time dhe do ta çoj në Babilon, atje do ta gjykoj për pabesinë me të cilën më doli i pabesë. ²¹ Të gjithë më të zgjedhurit e aradheve të tij do të bien prej shpatës, kurse teprica do të shpërndahet në të gjitha erërat. Do ta dini se unë Zoti fola.

²² Kështu thotë Zoti Hyj:

Edhe unë do ta marr

prej majës së cedrit të madh

prej majës së gemave të tij

do ta këpus një gemëz

e do ta mbëltoj mbi një mal

të lartë e të madhërishëm.

²³ Do ta mbëltoj në mal të lartë të Izraelit:

do të shpërthejë në pinjolla e do të bëjë fruta:

cedër do të jetë i madhërueshëm.

Nën të do të banojnë të gjithë shpendët,

çdo shpend nën hijen e gemave të tij

çerdhen do ta bëjë.

²⁴ Të gjitha pemët e fushës do ta dinë

se unë jam Zoti

që e zvogëlon pemën e madhe

dhe e lartëson të voglën,

e thaj lëndën e njomë

dhe e bëj të bulëzojë të thatën.

Unë Zoti thashë dhe do të bëj ashtu.

Kapitujt