Kapitujt

Ezekieli: 28. Kundër mbretit të Tirit

28

¹ Atëherë më qe drejtuar kjo fjalë e Zotit :

² “Biri i njeriut, thuaji princit të Tirit:

Kështu thotë Zoti Hyj:

Pasi mendja t’u rrit e the:

‘Unë jam hyjni,

rri mbi fronin e zotave,

në kërthizën e detit!’,

megjithëse je njeri e jo Hyj,

ti zemrën tënde e barazove me të Hyjit.

³ Ja, po qenke më i mençur se Daneli,

fshehtësi s’paska prej teje të fshehur;

⁴ me dije e mençuri tënde

e fitove pasurinë,

në thesaret e tua

bashkove ar e argjend.

⁵ Me dijen tënde të madhe

e me tregtinë tënde

e shtove pasurinë,

por pasuria jote mendjen ta rriti!

⁶ Prandaj kështu thotë Zoti Hyj:

Pse zemrën tënde e barazove me të Hyjit,

⁷ do t’i dërgoj kundër teje të huajt,

ata më të egrit ndër popuj.

Do t’i zhveshin shpatat

mbi të bukurën dijen tënde

e do ta hedhin në baltë shkëlqimin tënd!

⁸ Në pellg do të të hedhin e do të vdesësh

me vdekje të të vrarëve në mes të detit.

⁹ Vallë, a do të thuash më:

‘Jam Hyj!?’,

ndër sy të vrastarëve të tu,

pasi je njeri e jo Hyj

në duart e vrastarëve të tu?

¹⁰ Do të vdesësh me vdekjen e të parrethprerëve,

nga dora e të huajve, sepse unë kam thënë kështu.”

‑ thotë Zoti Hyj.

Rënia e mbretit të Tirit

¹¹ Më qe drejtuar kjo fjalë e Zotit: “Biri i njeriut, nisja vajtimit mbi mbretin e Tirit ¹² e thuaj atij: Kështu thotë Zoti Hyj:

Ishe ti vulë përsosmërie,

plot urti

i mrekullueshëm në pashi.

¹³ Ishe në gëzimet e parajsës së Hyjit,

të stolisura me gurë të paçmueshëm petkat e tua:

me sard, topaz e jaspis,

krisolit e oniks e beryl,

safir, karbunkul e smaragd,

ar i përpunuar stolisja jote,

të qenë bërë gati ditën e krijimit tënd.

¹⁴ Me kerub krahështrirë të vendosa për të ruajtur,

ishe mbi malin e shenjtë të Hyjit,

ecje nëpër gurë të zjarrtë.

¹⁵ Ishe i përsosur në udhët e tua

që ditës së themelimit tënd,

derisa në ty u ngjiz fajësia!

¹⁶ Duke u rritur tregtia jote,

u mbushe përbrenda me fajësi e mëkate.

Atëherë të flaka nga mali i Hyjit

e të treti kerubini mbrojtës

nga mesi i gurëve të zjarrtë.

¹⁷ T’u rrit mendja për shkak të bukurisë,

pasuria të bëri të humbësh urtinë:

atëherë vetë të flaka përtokë,

të vura para syve të mbretërve

që të të shikojnë me përbuzje.

¹⁸ Me fajësitë e shumta të tuat

me paudhësinë e tregtisë sate,

i përdhose shenjtëroret e tua.

Futa zjarrin mes teje

që të të përpijë,

hi do të të bëj unë përmbi tokë

në sy të atyre që të shikojnë!

¹⁹ Të gjithë popujt që do të shohin,

do të çuditen se çka të gjeti.

Ti u bëre shenjë tmerrimi

e sharrove për jetë të jetës!”

 

Kundër Sidonit

²⁰ Më qe drejtuar kjo fjalë e Zotit: ²¹ “Biri i njeriut, silli sytë drejt Sidonit, profetizo kundër tij ²² e thuaj:

Kështu thotë Zoti Hyj:

Ja, kundër teje po sulem, Sidon,

i lavdishëm do të bëhem mes teje,

do ta dinë se unë jam Zoti

kur mbi të do të bëj gjyq

e të kem dëftuar në të shenjtërinë time.

²³ Do ta dërgoj në të murtajën,

do të rrjedhë gjaku udhëve të tij,

përtokë të vdekur do të bien

prej shpatës të prerë rreth e për qark,

do ta dinë se unë jam Zoti”.

Izraeli i çliruar nga popujt e tjerë

²⁴ Për shtëpi të Izraelit më s’do të ketë

as thumb therës as ferrë shqyese

ndër të gjithë fqinjët që e rrethojnë

që janë kundërshtarët e tyre,

do ta dinë se jam Zoti Hyj.

²⁵ “Kështu thotë Zoti Hyj: Kur ta kem bashkuar shtëpinë e Izraelit nga të gjithë popujt, në të cilët janë të shpërndarë, unë vetë do ta dëftoj shenjtërinë time në ta ndër sy të paganëve. Ata do të banojnë në tokën e vet që ia dhurova shërbëtorit tim Jakobit. ²⁶ Do të banojnë të sigurt në të. Do të ndërtojnë shtëpi, do të mbëltojnë vreshta e do të jetojnë pa farë frike, kur të kem bërë gjyq mbi të gjithë fqinjët e tyre përreth. Atëherë do ta dinë se unë jam Zoti, Hyji i tyre.”

Kapitujt