Kapitujt

Ezekieli: 42. Dhomat e priftërinjve

¹ Atëherë më qiti në oborrin e jashtëm në drejtim të veriut. Më çoi në dhomën që është përballë hapësirës së lirë, përballë godinës, në veri. ² Në krahun e veriut e kishte gjatësinë njëqind kute, kurse gjerësia pesëdhjetë kute. ³ Përballë njëzet kuteve të tremes së brendshme dhe përballë truallit të shtruar me gurë të oborrit të jashtëm, godina ngritej pjesë pjesë në tre kate. ⁴ Përpara kthinave ishte rrugina dhjetë kutesh e gjerë që shpiente në brendësi. E gjatë ishte njëqind kute. Derën e kishin të kthyer kah veriu. ⁵ Kthinat e larta ishin më të vogla se të mesmet e të poshtmet, sepse i ngushtonin rruginat. ⁶ Ishin tre katesh, por nuk kishin këmbë guri, siç ishin shtyllat e oborrit. Kështu shkallë ‑ shkallë prej truallit në më të ultat, nëpër të mesmet, ndërtohej godina. ⁷ Muri i jashtëm, përgjatë kthinave, përgjatë oborrit të jashtëm, përpara kthinave, ishte i gjatë pesëdhjetë kute. ⁸ Sepse gjatësia e kthinave të oborrit të jashtëm ishte pesëdhjetë kute, kurse e atyre përpara Shenjtërores ishte njëqind kutesh. ⁹ Poshtë nën këto kthina ishte një hyrje në lindje për ata që hynin nga oborri i jashtëm, ¹⁰ në krye të murit të oborrit. Përballë lindjes, në krahun e pjesës së lirë, kishte edhe kthina të tjera para godinës ¹¹ po edhe në krahun e tyre, porsi kthinat në veri. Sipas gjatësisë e gjerësisë së tyre, ishin po ashtu edhe daljet e tyre, renditja dhe dyert e tyre ishin të barabarta. ¹² Kështu ishin edhe dyert që ishin me pamje në jug: një derë ishte në krye të rruginës, gjatë murit gjegjës, në lindje të atij që hynte. ¹³ Ai më tha: “Dhomat në veri e dhomat në jug, përballë hapësirës së lirë, janë odat e shenjta, ku priftërinjtë, që i shërbejnë Zotit hanë gjërat e shenjta: aty i vendosin gjërat më të shenjta, kushtet, flitë pendestare e të shpërblimit, sepse ky vend është i shenjtë. ¹⁴ Kur priftërinjtë të kenë hyrë, nuk do të dalin nga Tempulli në oborrin e jashtëm, por aty do t’i heqin petkat me të cilat kanë kryer shërbesën liturgjike, sepse janë të shenjta; pastaj do të vishen me petka të tjera e kështu do të dalin te populli.”

Përmasat e oborrit

¹⁵ Pasi e kreu të maturit e Tempullit përbrenda, më qiti prej derës që shikonte nga lindja dhe aty mati gjithkund përreth. ¹⁶ Me kallamin matës e mati anën e lindjes: pesëqind kallama matës me kallamin e matjes së rëndomtë. ¹⁷ Mati edhe anën e veriut: pesëqind kallama matës përreth. ¹⁸ Mati edhe anën e jugut: pesëqind kallama matës të masës së rëndomtë përreth. ¹⁹ U soll edhe anës së perëndimit e mati: pesëqind kallama të masës së rëndomtë. ²⁰ E mati murin në të katër anët rreth e rreth: ishte pesëqind i gjatë e pesëqind i gjerë. Ky e ndante vendin e shenjtë nga ai jo i shenjtëruar.

Kapitujt