Kapitujt

Ezekieli: 41. Hekali Salla e Tempullit

¹ Atëherë më futi në Tempull. I mati shtyllakët: ishin të gjerë gjashtë kute këndej e gjashtë kute andej. ² Gjerësia e hyrjes ishte dhjetë kutesh, kurse krahët e derës ishin pesë kute në njërën anë e pesë kute në anën tjetër. Pastaj e mati Sallën: ishte e gjatë dyzet kute dhe e gjerë njëzet kute.

Debiri ‑ Shenjtërorja e shenjtëroreve

³ Atëherë hyri dhe i mati shtyllakët e derës: dy kutesh. Pastaj mati derën: gjashtë kute; gjerësia e derës: shtatë kutesh. ⁴ E mati pastaj gjatësinë e saj: njëzet kute, gjerësia para sallës njëzet kute. E më tha: “Kjo është Shenjtërorja e shenjtëroreve.”

Kthinat anësore

⁵ E mati murin e Tempullit: gjashtë kute. Kthinat anësore ishin katër kute, rreth e rreth Tempullit. ⁶ Kthinat anësore ishin njëra mbi tjetrën në tri kate. Ishin anat e dala në mur të Tempullit për kthinat anësore që të kishin mbështetje, por mbështetjet nuk ishin për muri të Tempullit. ⁷ Gjerësia e kthinave vinte duke u rritur nga kati në kat, sepse Tempulli sa më lart, linte më shumë vend deri në majë. Kështu pra, zgjerohej Tempulli deri në majë. Nga kati i poshtëm ngjiteshe në katin e sipërm nëpër të mesmin. ⁸ Pashë rreth Tempullit një lartësim. Themelet e godinës anësore ishin një kallam i plotë gjashtë kutesh në lartësi. ⁹ Gjerësia e murit të jashtëm të godinës anësore ishte pesë kutesh. Zbrazëtia e kalimit ndërmjet kthinave anësore të Tempullit ¹⁰ e të kthinave, ishte e gjerë njëzet kute gjithkund përreth Tempullit. ¹¹ Dyert e ndërtesës anësore ishin në krahun e zbrazëtisë së lirë: njëra derë ishte në veri e tjetra në jug. Hapësira e lirë ishte gjithkund përreth pesë kute.

Godina e perëndimit

¹² Ndërtesa që ishte përballë zbrazëtisë së lirë në anë të perëndimit, ishte e gjerë shtatëdhjetë kute. Muri i godinës gjithkund përreth pesë kute i gjerë, ndërsa gjatësia e tij nëntëdhjetë kute.

¹³ Pastaj e mati Tempullin: ishte i gjatë njëqind kute, hapësira e rrethuar, godina dhe muret: njëqind kute gjatë. ¹⁴ Gjerësia e ballanikut të Tempullit me hapësirën e lirë: njëqind kute, në krahun e lindjes. ¹⁵ E mati edhe gjatësinë e godinës përballë hapësirës së lirë në pjesën përmbas, e rruginat këndej e andej së bashku: njëqind kute.

Stolisja e brendshme

Brendia e Tempullit, tremja e jashtme, ¹⁶ ishin të shtruara me dru. Dritaret ishin në suazë. Skajet e suazës ishin të trefishtë përballë pragut. Rruginat ishin të veshura me dru gjithkund përreth, nga trualli deri në dritare ‑ dritaret mund të mbylleshin. ¹⁷ Nga hyrja deri në brendinë e Tempullit, kështu edhe përjashta, madje edhe nëpër mbarë murin rreth e rreth, përbrenda e përjashta, ¹⁸ ishin të gdhendur kerubinë e palma: nga një palmë ndërmjet të dy kerubinëve. Kerubinët kishin nga dy fytyra, ¹⁹ në anë të palmës, në njërën anë, fytyrën e njeriut e në anën tjetër të palmës, fytyrën e luanit: kështu ishte gjithkund nëpër Tempull rreth e rreth. ²⁰ Nga trualli e deri mbi derë ishin kerubinët e punuar po ashtu edhe palmat. Në murin e Tempullit ²¹ pragjet e dyerve ishin katrorë.

Lteri i drunjtë

Përpara Shenjtërores së shenjtëroreve ishte diçka ²² në përngjasim të lterit të drunjtë. Lartësinë e kishte tre kutesh, gjatësinë dy kutesh. Këndet, shtrojën e anat i kishte të drunjta. Ai njeri më tha: “Kjo është tryeza para fytyrës së Zotit.”

Dyert

²³ Shenjtërorja dhe Shenjtërorja e shenjtëroreve kishin nga ²⁴ dy dyer. Secila derë kishte nga dy krahë të lëvizshëm deri në mur: njëra derë kishte dy krahë e tjetra derë po ashtu dy krahë. ²⁵ Në derën e Shenjtërores ishin të gdhendur kerubinët e palmat, ashtu siç ishin të gdhendur edhe në mure. Përjashta ishte pullazi i punuar përmbi treme. ²⁶ Dritaret ishin me kangjella dhe palmat ishin në njërën e në tjetrën anë në murin e tremes e në kthinat anësore të Tempullit.

Kapitujt