Kapitujt

Ezekieli: 39. Gogu

¹ E ti, o biri i njeriut, profetizo kundër Gogut e thuaj: Kështu thotë Zoti Hyj: Ja, në shpinë më ke, o Gog, prijësi kryeparë i Mosokut e i Tubalit! ² Do të të tërheq, do të të josh, do të të bëj të vish nga Veriu i skajshëm dhe do të të sjell në malet e Izraelit. ³ Do ta hedh përtokë harkun prej dorës sate të majtë e do t’i flak shigjetat e tua prej të djathtës sate! ⁴ Do të vritesh mbi malet e Izraelit, ti dhe mbarë çetat e tua edhe popujt që janë me ty! Të dhashë për ushqim shpendëve grabitqarë, të gjithë fluturakëve dhe egërsirave të tokës. ⁵ Do të biesh në fushë të hapët, sepse kështu e kam thënë unë ‑ është fjala e Zotit Hyj!

⁶ Do të çoj zjarr mbi Magog dhe mbi ata që të qetë banojnë në ishuj dhe do ta dinë se unë jam Zoti. ⁷ Të njohur do ta bëj emrin tim të shenjtë në mes të popullit tim Izraelit e nuk do të lejoj të përlyhet Emri im i shenjtë! Paganët do ta dinë se unë jam Zoti, Shenjti në Izrael! ⁸ Ja, erdhi, u bë ‑ thotë Zoti Hyj ‑ kjo është dita për të cilën kam folur!

⁹ Banorët do të dalin prej qyteteve të Izraelit e do t’i ndezin e do t’i djegin armët: mburojë e shqyt, hark e shigjetë, heshtë, çumak e mëzdrak ‑ do t’i djegin për shtatë vjet! ¹⁰ Nuk do të mbartin dru nga arat as nuk do të presin në pyje, sepse zjarr do të bëjnë me armë. Do t’i rrëmbejnë ata që i kanë rrëmbyer, do t’i bëjnë pre ata që i patën bërë pre ‑ thotë Zoti Hyj.

¹¹ Atë ditë do t’ia jap Gogut për varresë vendin e përmendur në Izrael: Luginën e udhëtarëve në lindje të detit, që ua mbyll udhën kalimtarëve. Aty do të varroset Gogu dhe mbarë ushtria e tij. Ajo do të quhet Lugina e Shumicës së Gogut. ¹² Do t’i rëmojnë izraelitët për shtatë muaj për ta pastruar vendin. ¹³ Do t’i varrosë mbarë populli i vendit e kjo ditë do të jetë e përmendur për ta, sepse këtë ditë unë i dhashë lavdi vetvetes ‑ thotë Zoti Hyj. ¹⁴ Do të caktojnë njerëzit, të cilët do ta përshkojnë vendin për t’i varrosur ata që kanë mbetur mbi dhe, për ta bërë vendin të pastër. Por edhe pas shtatë muajve, ¹⁵ do të vazhdojnë t’i kërkojnë e do ta përshkojnë vendin, e, nëse gjejnë eshtra njeriu, do të ngulin përgjatë tyre shenjën që varrtarët t’i varrosin në Luginën e Shumicës së Gogut. ¹⁶ Qyteti quhet Amonë. Kështu do ta pastrojnë vendin.

¹⁷ Ti, pra, o biri i njeriut: Kështu thotë Zoti Hyj: Thuaji çdo fluturaku, të gjithë shpendëve e të gjitha egërsirave të fushës: Bashkohuni, ejani shpejt, mblidhuni nga çdo anë në flinë time, që unë po jua bëj gati! Në flinë e madhe mbi malet e Izraelit që të hani mish e të pini gjak! ¹⁸ Hani mish trimash e pini gjak princash të tokës: desh, qengja, cjep e mëzetër të majmë, të gjithë nga Basani. ¹⁹ Do të hani e do të ngiheni me dhjamë e do të pini derisa të deheni me gjak të flisë që unë po e ther për ju. ²⁰ Do të ngiheni në tryezën time me mish kuajsh shale e karroce, me mish trimash dhe luftëtarësh ‑ thotë Zoti Hyj!”

Përfundimi

²¹ “Kështu do ta dëftoj lavdinë time ndër popuj e të gjithë popujt do ta shohin gjyqin që do ta bëj dhe dorën që do ta rëndoj mbi ta. ²² E shtëpia e Izraelit do ta dijë se unë jam Zoti, Hyji i tyre, prej asaj dite e përgjithmonë. ²³ Por do ta marrin vesh edhe paganët se shtëpia e Izraelit ka qenë tretur në skllavëri për shkak të fajësisë së vet, sepse më patën lënë mua. Këndej e fsheha fytyrën time prej tyre, i lashë në duart e armiqve të tyre që të sharrojnë prej shpatës. ²⁴ U solla me ta sipas papastërtisë së tyre e fajësisë së tyre dhe prej tyre e fsheha fytyrën time.

²⁵ Prandaj kështu thotë Zoti Hyj: Tani do t’ia kthej fatin e mirë Jakobit, do ta përdëllej mbarë shtëpinë e Izraelit e do të dëftohem i zellshëm për nder të emrit tim të shenjtë. ²⁶ Do t’ua fal çdo turpësi dhe pabesnikëri që ma bënë ndërsa ende jetonin të qetë në vendin e vet, kur nuk kishin nga kush të druanin. ²⁷ E kur t’i kem riatdhesuar nga popujt e t’i kem bashkuar nga vendet e armiqve të tyre e ta kem dëftuar shenjtërinë time në ta në sy të popujve të panumërt, ²⁸ atëherë do ta dinë se unë jam Zoti, Hyji i tyre, që i pata humbur ndër popuj, por edhe që i bashkova në vendin e vet duke mos lënë atje asnjë. ²⁹ Më nuk do ta fsheh fytyrën time para tyre, sepse do ta zbraz shpirtin tim mbi shtëpinë e Izraelit ‑ thotë Zoti Hyj.”

Kapitujt