Kapitujt

Ezekieli: 37. Eshtrat e thata

¹ Mbi mua ra dora e Zotit dhe, në shpirtin e Zotit, më çoi e më vendosi në mes të një fushe që ishte plot me eshtra. ² Ai më bëri t’i përshkoj në të gjitha drejtimet: mbi sipërfaqen e tokës ishin pa masë shumë e tejet të thatë. ³ Atëherë më pyeti: “Biri i njeriut, a të thotë mendja se këto eshtra mund ta rifitojnë jetën?” Unë iu përgjigja: “Ti e di, o Zot Hyj!”

⁴ Atëherë më urdhëroi: “Profetizo mbi këta eshtra e thuaju: O eshtra të thata, dëgjojeni fjalën e Zotit! ⁵ Kështu u thotë Zoti Hyj këtyre eshtrave: Unë po e fus në ju shpirtin e ju do ta rifitoni jetën. ⁶ Do të end mbi ju dejtë, do t’ju vesh me mish, do t’ju mbuloj me lëkurë, do t’ju fus shpirtin e ju do ta rifitoni jetën dhe do ta dini se unë jam Zoti.”

⁷ Unë profetizova ashtu si më qe urdhëruar. Ndërsa unë po profetizoja, dëgjova një ushtimë dhe pashë një lëvizje eshtrash: iu afruan njëri‑tjetrit, secili asht ashtit përgjegjës. ⁸ Shikova dhe, ja, u gërshetuan drejtë, u veshën me mish dhe me lëkurë, por ende nuk kishin shpirt.

⁹ Prapë më tha: “Profetizoji shpirtit! Porfetizo, biri i njeriut, e i thuaji shpirtit: Kështu thotë Zoti Hyj: Eja, o shpirt, nga të katër anët e botës e fryj mbi këta të vdekur që ta rifitojnë jetën!”

¹⁰ Unë profetizova siç më kishte urdhëruar dhe në ta hyri shpirti. Ata e rifituan jetën dhe qëndruan në këmbë të veta ‑ një ushtri të madhe, tejet e madhe!

¹¹ Atëherë më tha: “Biri i njeriut, këta eshtra janë mbarë shtëpia e Izraelit. Ata thonë: ‘Eshtrat tona u thanë, s’kemi më kurrfarë shprese, kemi mbaruar!’ ¹² Prandaj profetizo e thuaju. Kështu thotë Zoti Hyj: Ja, unë do t’i hap varret tuaja dhe do t’ju nxjerr nga varret tuaja, o populli im, dhe do t’ju shtie në tokën e Izraelit. ¹³ Do ta dini se unë jam Zoti kur t’i kem hapur varret tuaja e t’ju kem nxjerrë nga varret tuaja, o populli im! ¹⁴ Do t’jua jap shpirtin tim dhe ju do ta rifitoni jetën dhe do t’ju vendos në tokën tuaj. Ju do ta dini se unë jam Zoti. Çka them unë, atë edhe e bëj ‑ thotë Zoti Hyj.”

Juda e Izraeli një mbretëri e vetme

¹⁵ Më qe drejtuar kjo fjalë e Zotit. ¹⁶ “Ti, o biri i njeriut, merre një dru e shkruaj në të: Juda e bijtë e Izraelit të bashkuar me të. Merre pastaj një tjetër dru e shkruaj mbi të: Jozefi ‑ druri i Efraimit ‑ e mbarë shtëpia e Izraelit e bashkuar me të. ¹⁷ Afroja njërën dru tjetrës si një dru të vetme: le të jenë të bashkuara në dorën tënde. ¹⁸ Kur bijtë e popullit tënd të pyesin: ‘A po na tregon çka do të thotë kjo?’, ¹⁹ thuaju: Kështu thotë Zoti Hyj: Ja, unë po e marr drunë e Jozefit, që është në dorën e Efraimit edhe fiset e Izraelit të bashkuara me të e po e bashkoj me drunë e Judës dhe po i bëj një dru të vetme: do të jenë një gjë e vetme në dorën time.

²⁰ Mbaj në dorë ndër sytë e tyre drutë, në të cilat ke shkruar ²¹ e thuaju: Kështu thotë Zoti Hyj: Ja, unë po i bashkoj bijtë e Izraelit nga popujt ku janë të tretur, do t’i mbledh prej gjithkahit e do t’i kthej në tokën e tyre ²² dhe do t’i bëj një popull të vetëm në tokën e tyre, në malet e Izraelit; të gjithë do të kenë një mbret, më nuk do të jenë dy popuj dhe më nuk do të jenë të ndarë në dy mbretëri. ²³ Më nuk do të përlyhen me idhujt e tyre, me turpësitë e tyre e me të gjitha paudhësitë e tyre, do t’i shpëtoj nga të gjitha kryeneçësitë e tyre me të cilat mëkatuan, do t’i pastroj; ata do të jenë populli im e unë do të jem Hyji i tyre. ²⁴ Mbret do ta kenë shërbëtorin tim Davidin e të gjithë do të kenë një bari të vetëm. Do të jetojnë në gjyqet e mia e do t’i kryejnë urdhërimet e mia e me jetë do t’i zbatojnë. ²⁵ Do të banojnë në tokën që ia dhurova Jakobit, shërbëtorit tim, në të cilën banuan etërit tuaj. Në të do të banojnë ata e fëmijët e tyre edhe bijtë e bijve të tyre përgjithmonë. Davidi shërbëtori im, do të jetë prijësi i tyre pëgjithmonë. ²⁶ Me ta do të lidh Besëlidhje paqeje ‑ një Besëlidhje të përhershme me ta. Do t’i vendos e do të bëj të shtohen me shumicë. Në mesin e tyre do ta bëj Shenjtëroren time të përhershme. ²⁷ Banesa ime e përhershme do të jetë mes tyre: do të jem Hyji i tyre e ata do të jenë populli im. ²⁸ Atëherë popujt do ta marrin vesh se unë jam Zoti, Shenjtëruesi i Izraelit, kur ta vendos për përgjithmonë Shenjtëroren time në mesin e tyre.”

Kapitujt