Kapitujt

Ezekieli: 30. Dita e Zotit kundër Egjiptit

¹ Më qe drejtuar kjo fjalë e Zotit:

² “Biri i njeriut, profetizo e thuaj:

Kështu thotë Zoti Perëndi:

Ulërini: ‘Mjerë ajo ditë!’,

³ sepse erdhi dita,

po afrohet dita e Zotit,

ditë e zezë, koha e paganëve!

⁴ Shpata do ta korrë Egjiptin,

tmerri do ta pushtojë Kusin,

kur përtokë të bien të plagosurit e Egjiptit,

kur të merret pasuria e tij,

të jenë rrënuar themelet e tij.

⁵ Shpata përdhe do t’i hedhë

Kus e Fut e Lud e të huaj të tjerë,

me Kub e bij të tokës së besëlidhjes!

⁶ Sepse kështu thotë Zoti Hyj:

Do të bjerë kush përkrah Egjiptin,

do të përulet krenaria e fuqisë së tij:

nga Magdoli deri në Sienë

prej shpatës përtokë do të bien

‑ është fjala e Zotit Hyj!

⁷ Do të bëhet shkretëtirë mes tokash të shkretuara, qytetet e tij mes qyteteve të shkretuara. ⁸ Atëherë do ta dinë se unë jam Zoti, kur Egjiptit t’i shtie zjarrin e të shfarosen të gjithë ndihmëtarët e tij.

⁹ Atë ditë do të dalin lajmëtarët e mi me anije për ta thyer shpresën e Kusit. Tmerri do ta pushtojë në ditën e zezë të Egjiptit që do të vijë.

¹⁰ Kështu thotë Zoti Hyj: Do ta zhduk krenarinë madhështore të Egjiptit me dorën e Nabukodonozorit, mbretit të Babilonit! ¹¹ Ai dhe populli i tij me të ‑ më i pashpirti ndër të gjithë popujt ‑ do të sillet për ta shkretuar vendin. Ata do t’i zhveshin shpatat e veta kundër Egjiptit e do ta mbulojnë vendin me të vrarë. ¹² Unë do t’i shter lumenjtë e vendin do ta lë në duart e njerëzve më të këqij e do ta shpartalloj vendin dhe pasurinë e tij me dorën e të huajve. E kam thënë unë Zoti!

¹³ Kështu thotë Zoti Hyj:

Unë do t’i zhduk tempujt,

do t’i zhduk idhujt e Memfisit,

prijës më s’do të ketë në Egjipt,

do ta mb’lojë Egjiptin tmerri!

¹⁴ Do ta shkatërroj tokën Fatures,

do t’i shtie zjarrin Taniut,

në No gjyqet do t’i bëj!

¹⁵ Atëherë do ta zbraz zemërimin tim mbi Sinin, fuqinë e Egjiptit, do t’ia shuaj poullin Nos. ¹⁶ Do t’ia fus zjarrin Egjiptit: si lindësja do të ketë dhimbje Sini, Noja do të pushtohet, kurse Memfisit do t’i vijë çmoskurrja! ¹⁷ Të rinjtë e Heliopolit e të Bubastiut do t’i presë shpata e këto qytete do të bien në skllavëri! ¹⁸ Mbi Tafnisin do të errësohet dita kur t’i thyej skeptrat e Egjiptit, kur të ketë rënë krenaria e pushtetit të tij. Reja atë do ta mbulojë, bijat e saj do të bien në skllavëri. ¹⁹ Atëherë gjyqet do t’i bëj në Egjipt e do ta dinë se unë jam Zoti.”

²⁰ Më shtatë të të parit muaj të të njëmbëdhjetit vit më qe drejtuar fjala e Zotit: ²¹ “Biri i njeriut, ia theva krahun faraonit, mbretit të Egjiptit, dhe, ja, nuk qe mjekuar me barna as lidhur me fasha që t’i kthehej shëndeti e të mund ta përdorte shpatën pasi t’i kthehej fuqia. ²² Prandaj, kështu thotë Zoti Hyj: Ja, unë po sulem kundër faraonit, mbretit të Egjiptit, e do t’ia thyej edhe krahun e shëndoshë e të thyerin e do t’ia rrëzoj shpatën prej dorës së tij. ²³ Do t’i shpërndaj egjiptianët ndër paganë e do t’i tres në vende të ndryshme. ²⁴ Do t’i jap fuqi mbretit të Babilonit dhe në dorën e tij do t’ia jap shpatën time, kurse do t’ia thyej faraonit krahët dhe do të gjëmojë para tij me gjëmët që i lëshon i plagosuri i shporuar tejpërtej. ²⁵ Unë do t’i forcoj krahët e mbretit të Babilonit, kurse krahët e faraonit s’do të kenë fuqi. Atëherë do ta dinë se unë jam Zoti, kur unë t’ia kem dhënë shpatën time mbretit të Babilonit në dorë e ai ta vringëllojë kundër Egjiptit. ²⁶ Do ta tres Egjiptin ndër paganë, do t’i shpërndaj ndër vende të ndryshme: do ta dinë se unë jam Zoti.”

Kapitujt