Kapitujt

Ezekieli: 25. Kundër amonitëve

¹ Më qe drejtuar kjo fjalë e Zoti:

² ”Biri i njeriut, sillu me fytyrë kah amonitët e parafol kundër tyre. ³ Thuaju bijve të Amonit: Dëgjojeni fjalën e Zotit Hyj!

Kështu thotë Zoti Hyj: Pse thatë ‘Mirë e ka!’ për Shenjtëroren time, pse e çnderuan e për tokën e Izraelit, pse e shkretuan e për shtëpinë e Judës, pse i morën skllevër, ⁴ për këtë arsye unë do të të dorëzoj bijve të lindjes për pronë. Në ty do t’i ngulin banishtat dhe çadrat e veta: ata do t’i hanë frytet e prodhimeve të tua e do ta pinë qumështin tënd. ⁵ Rabatin do ta bëj kullotë gamilesh e tokën e bijve të Amonit vathë bagëtish e do ta dini se unë jam Zoti.

⁶ Sepse kështu thotë Zoti Hyj: Pse duartrokite, pse rrahe me këmbë e pse me gjithë shpirt u kënaqe në lidhje me tokën e Izraelit, ⁷ këndej edhe vetë do ta çoj dorën time kundër teje, do të të bëj pre popujsh, do të ta tres farën ndër popuj, do të të zhduk nga gjiri i popujve, do të të zhduk krejtësisht e atëherë do të shohësh se unë jam Zoti.”

Kundër Moabit

⁸ Kështu thotë Zoti Hyj:

“Pasi Moabi e Seiri thanë: ‘Ja, pra, shtëpia e Izraelit është si të gjithë popujt’, ⁹ e mirë, unë do t’ia hap ijën Moabit, unë do ta lë pa qytetet, pa qytete po them të tij në mbarë vendin e tij, që janë stolia e vendit: pa Betiesimotin, pa Baalmeonin, pa Kariataimin. ¹⁰ Do ta lë në duar të bijve të Lindjes për pronë së bashku me amonitët, që bijtë e Amonit të mos përmenden më ndër popuj. ¹¹ Kështu do ta kryej gjyqin mbi Moabin e do ta dinë se unë jam Zoti.”

Kundër edomitëve

¹² Kështu thotë Zoti Hyj:

“Pasi Idumeja u hakmor kundër shtëpisë së Judës e me këtë hakmarrje mëkatoi rëndë duke kërkuar prej tyre hakmarrje, ¹³ prandaj kështu thotë Zoti Hyj: Do ta shtrij dorën time kundër Idumesë dhe do të zhduk prej saj njerëz e kafshë. Do ta kthej në shkretëtirë: nga Temani deri në Dedan të gjithë do të bien nga shpata. ¹⁴ Kështu do të hakmerrem mbi Idumenë me anë të dorës së popullit tim Izraelit. Ata do të sillen me Edomin sipas furisë e zemërimit tim e do ta njohin hakmarrjen time ‑ thotë Zoti Hyj.”

Kundër filistenjve

¹⁵ Kështu thotë Zoti Hyj:

“Pasi filistinët vepruan me hakmarrje dhe u hakmorën me tërbim duke vrarë dhe e çuan në vend armiqësinë e përhershme, ¹⁶ prandaj kështu thotë Zoti Hyj: Ja, unë po e çoj dorën time kundër palestinezëve: do t’i vras ceretenjtë, do t’i zhduk të gjitha tepricat e bregut të detit! ¹⁷ Kështu do të bëj kundër tyre një hakmarrje emnesë duke i ndëshkuar me tërbim e, kur ta kem kryer hakmarrjen time, atëherë do ta dinë se unë jam Zoti.”

Kapitujt