Kapitujt

Ezekieli: 15. Shëmbëlltyra me vreshtin

¹ Më qe drejtuar kjo fjalë e Zotit:

² “Biri i njeriut, ç’vlerë më të madhe ka

druri i hardhisë se lëndët e tjera të pyllit?

³ Pse a përdoret druri i saj

për të gdhendur ndonjë gjë?

Ose a punohet prej saj ndonjë gozhdë

që të varet ndonjë gjë në të?

⁴ Ja, në zjarr hidhet që të digjet:

kur zjarri t’ia djegë dy skajet

edhe mesi t’i jetë shkrumbuar,

a thua atëherë vlen për punim?!

⁵ As kur ishte e tërë

prej saj gjë s’mundej të punohet;

aq më pak kur ta djegë, ta përpijë zjarri,

s’mund të punohet me të kurrgjë.

⁶ Prandaj kështu thotë Zoti Hyj:

Porsi druri i hardhisë ndër lëndë të tjera të pyllit,

që në zjarr e hodha ta përpijë,

ashtu i hodha banorët e Jerusalemit!

⁷ Faqen time e solla kundër tyre!

Prej zjarrit ata kanë dalë,

prapë zjarri do t’i përpijë.

Do ta dini se unë jam Zoti,

kur të sillem kundër tyre,

⁸ kur mbarë vendin ta bëj të shkretë

pse s’ma ruajtën besnikërinë

‑ është fjala e Zotit Hyj.”

Kapitujt