Kapitujt

Ezekieli: 6. Kundër bjeshkëve të Izraelit

¹ Atëherë më qe drejtuar fjala e Zotit. Më tha: ² “Biri i njeriut, sillu me fytyrë drejt bjeshkëve të Izraelit e profetizo kundër tyre. ³ Thuaj: Malet e Izraelit, dëgjojeni fjalën e Zotit Hyj! Kështu u thotë Zoti Hyj maleve, kodrave, luginave e vërrive: Ja, unë do ta çoj kundër jush shpatën dhe do t’i rrafshoj lartësitë tuaja; ⁴ do t’i rrënoj lterët tuaj, do të copëtohen shenjtëroret tuaja e të vrarët tuaj do t’i përplas para idhujve tuaj. ⁵ Do t’i plandos trupat e bijve të Izraelit para tempujve tuaj dhe eshtrat tuaja do t’i shkapërderdh para lterëve tuaj. ⁶ Në të gjitha vendbanimet tuaja qytetet tuaja do të shkretohen, lartësitë do të shkatërrohen që të rrënohen e të zhduken lterët tuaj, që të thërmohen e të zhduken idhujt tuaj, të rrafshohen tempujt tuaj e të shpartallohen veprat tuaja. ⁷ Të vrarët do të bien në mesin tuaj e do ta dini se unë jam Zoti.

⁸ Prapëseprapë do t’i kursej disa prej jush, që do të shpëtojnë prej shpatës, të cilët unë do t’i tres ndër paganë. ⁹ Atëherë, të mbeturve gjallë prej jush, do t’u bjerë ndër mend për mua ndër paganë, ku do t’i çoj në skllavëri, sepse do t’ua copëtoj zemrën e tyre të pabesë që u largua prej meje dhe sytë e tyre që bënë lavirësi me idhujt e tyre. Vetvetja do t’u neveritet për shkak të fajësive që bënë në të gjitha turpësitë e veta. ¹⁰ Atëherë do ta dinë se unë Zoti nuk fola kot se do t’ua çoj këto të këqija.

Mëkatet e Izraelit

¹¹ Kështu thotë Zoti Hyj: Rrahi shuplakat, bjeri tokës me këmbë e thuaj: Vaj! Për shkak të të gjitha turpësive të zeza shtëpia e Izraelit po shfaroset nga shpata, uria e murtaja! ¹² Kush është larg, do të vdesë nga murtaja, kush është afër, do të bjerë nga shpata e kush i rrethuar të mbesë gjallë, do të vdesë nga uria, sepse do ta çoj në vend furinë time kundër tyre. ¹³ Do ta dini se unë jam Zoti, kur trupat e tyre do të mbesin rrah ndër idhujt e tyre, përreth lterëve të tyre, në çdo kodër të lartësuar, në majat e maleve e nën çdo pemë të gjelbër, nën çdo qarr shatorr ‑vend ku u kushtuan kem të erëndshëm të gjithë idhujve të vet! ¹⁴ Do ta shtrij dorën time mbi ta e do ta bëj vendin të shkretë e të përmbysur që nga shkretëtira e deri në Reblë, kudo të banojnë! Atëherë do ta dinë se unë jam Zoti.”

Kapitujt