Kapitujt

1 i Kronikave: 6. Pasardhësit e Levit

¹ Bijtë e Levit: Gersoni, Kaati e Merariu. ² Këta janë emrat e bijve të Gersonit: Lobniu e Semeji. ³ Bijtë e Kaatit: Amrami, Isaari, Hebroni e Ozieli. ⁴ Bijtë e Merariut: Moholiu e Musiu.

Këto janë familjet e bijve të Levit sipas etërve të tyre:

⁵ Gersoni, biri i tij Lobniu, biri i Lobniut Jahati, biri i Jahatit Zama, ⁶ biri Zamës Joahi, biri i Joahit Adoja, biri i Ados Zara, biri i Zarës Jetraji.

⁷ Bijtë e Kaatit: biri i tij Aminadabi, biri i këtij Koreu, biri i këtij Asiri, ⁸ biri i këtij Elkana, biri i këtij Abiasafi, biri i këtij Asiri, ⁹ biri i këtij Tahati, biri i këtij Urieli, biri i këtij Ozia, biri i këtij Sauli.

¹⁰ Bijtë e Elkanës: Amasaji e Akimoti. ¹¹ Biri i këtij Elkana, biri i këtij Sofaji, biri i këtij Nahati, ¹² biri i këtij Eliabi, biri i këtij Jerohami, biri i këtij Elkana dhe biri i këtij Samueli.

¹³ Bijtë e Samuelit: Joeli i pari dhe Abija i dyti.

¹⁴ Bijtë e Merariut: Moholiu, biri i këtij Lobniu, biri i këtij Semeji, biri i këtij Oza, ¹⁵ biri i këtij Samaja, biri i këtij Hagija dhe biri i këtij Asaja.

Këngëtarët

¹⁶ Ja ata të cilëve Davidi ua besoi detyrën e këndimit në Shtëpinë e Zotit që kur në të qe vendosur Arka. ¹⁷ Ata e ushtronin shërbesën e këndimit prej kur u vendosën këtu e në Tendën e Takimit para Banesës deri sa Salomoni e ndërtoi në Jerusalem Tempullin e Zotit. Shërbesën e vet e kryenin sipas rregullave të përcaktuara për ta.

¹⁸ Këta janë ata që e kryenin këtë shërbesë dhe djemtë e tyre: prej bijve të Kaatit: këngëtari Heman, biri i Joelit të Samuelit, ¹⁹ të Elkanës, të Jerohamit, të Elielit, të Tohuit, ²⁰ të Sufit, të Elkanës, të Mahatit, të Amasajit, ²¹ të Elkanës, të Joelit, të Azarisë, të Sofonisë, ²² të Tahatit, të Asirit, të Abiasafit, të Koreut, ²³ të Isaharit, të Kaatit, të Levit, të Izraelit.

²⁴ Vëllai i tij Asafi, qëndronte në të djathtën e tij. Asafi ishte biri i Barakisë së Samajit, ²⁵ të Mikaelit, të Basajës, të Melkisë, ²⁶ të Atanajit, të Zarës së Adajës, ²⁷ të Etanit, të Zamës, të Semejit, ²⁸ të Jetit, të Gersonit, të Levit.

²⁹ Bijtë e Merariut, vëllezërit e tyre, qëndronin në të majtën: Etani, biri i Kusiut, të Abdiut, të Malokut, ³⁰ të Hasabisë, të Amasisë, të Helcisë, ³¹ të Amasait, të Boniut, të Somerit, ³² të Moholiut, të Musiut, të Merariut, të Levit.

Levitët e tjerë

³³ Vëllezërit e tyre, levitët, ishin të caktuar për të kryer çdo shërbesë në Banesën e Shtëpisë së Zotit. ³⁴ Aroni dhe bijtë e tij i kushtonin mbi lter flitë e shkrumbimit dhe flitë e kemimit, përkujdeseshin për gjithçka kërkohet për Shenjëtëroren e shenjtëroreve, e kryenin ritin e pajtimit mbi Izraelin sipas rregulloreve që kishte urdhëruar shërbëtori i Hyjit, Moisiu.

³⁵ Ja bijtë e Aronit: Eleazari, biri i tij, Fineesi biri i Eleazarit, Abisuehi biri i Fineesit, ³⁶ Bokciu biri i Abisuehit, Oziu biri i Bokciut, Zarahia, biri i Oziut, ³⁷ Merajoti i biri Zarahisë, Amaria biri i Merajotit, Akitobi biri Amarisë, ³⁸ Sadoku biri i Akitobit, Akimaja i biri i Sadokut.

Vendbanimet e bijve të Aronit

³⁹ Këto janë vendbanimet e tyre sipas të dëbanishtave në krahinat e tyre: bijve të Aronit prej familjes së Kaatajve ‑ sepse këtyre u ra shorti ‑ ⁴⁰ u takoi Hebroni në tokat e Judës me kullotat që i ka përreth. ⁴¹ Fusha e qytetit dhe fshatrat i takuan Kalebit, birit të Jefoneut. ⁴² Bijve të Aronit ua dhanë qytetin e strehimit: Hebronin dhe Lebnën me rrethinat e tyre, ⁴³ Jeterin dhe Estemon me rrethina, pastaj Helonin dhe Dabirin me rrethinat, ⁴⁴ si edhe Asanin, Jetën, Betsamesin me rrethinat. ⁴⁵ Kurse në fisin e Beniaminit: Gabaonin, Gabanë me rrethinat, Almatin me kullotat si edhe Anatotin me kullotat: gjithsejt trembë‑ dhjetë qytete sipas familjeve të tyre.

Vendbanimet e levitëve të tjerë

⁴⁶ Bijve të tjerë të Kaatit sipas vëllazërive të tyre u dhanë prej fisit të Efraimit e prej fisit të Danit dhe prej gjysmës së fisit të Manaseut për pronë dhjetë qytete.

⁴⁷ Bijve të Gersonit, sipas vëllazërive të tyre, u qenë dhënë prej fisit të Isaharit, prej fisit të Aserit, prej fisit të Neftaliut dhe prej fisit të Manaseut në Basan: trembëdhjetë qytete.

⁴⁸ Kurse bijve të Merariut, sipas vëllazërive të tyre u dhanë prej fisit të Rubenit, prej fisit të Gadit e prej fisit të Zabulonit me short dymbëdhjetë qytete.

⁴⁹ Kështu bijtë e Izraelit ua dhanë levitëve këto qytete me kullotat e tyre. ⁵⁰ Prej fisit të bijve të Judës, prej fisit të bijve të Simonit dhe prej fisit të bijve të Beniaminit ua dhanë me short këto qytete të përmendura me emër.

⁵¹ Bijve të tjerë të Kaatit u qenë dhënë qytetet në territorin e fisit të Efraimit. ⁵² U qe dhënë si qytet strehimi: Sikemi me kullotat e tija në malin e Efraimit edhe Gazeri me kullotat e tija, ⁵³ Jekmaami me kullotat, po ashtu edhe Betoroni. ⁵⁴ Po ashtu edhe Ajaloni me kullotat dhe gjithashtu edhe Getremoni. ⁵⁵ Kurse prej gjysmës së fisit të Manaseut: Tanaku me kullotat, dhe Jeblaami me kullotat e tija u qenë dhënë vëllazërive të bijve tjerë të Kaatit.

⁵⁶ Kurse bijve të Gersonit, sipas vëllazërive të tyre, u qe dhënë: prej gjysmës së fisit të Manaseut: Gauloni në Basan me kullotat dhe Astaroti me kullotat. ⁵⁷ Prej fisit të Isaharit: Cedesi me kullotat, Dabereti me kullotat, ⁵⁸ Ramoti me kullotat si dhe Anemi me kullotat. ⁵⁹ Kurse prej fisit të Aserit: Masali me kullotat, po ashtu edhe Abdoni, ⁶⁰ Hukoku me rrethinën dhe Rohobi me kullotat. ⁶¹ Kurse prej fisit të Neftaliut: Cedesi në Galile me kullotat, Hamoni me kullotat dhe Kariathaimi me kullotat.

⁶² Të tjerëve, bijve të Merariut, u qe dhënë prej fisit të Zabulonit: Remonoja me kullotat, dhe Tabori me kullotat. ⁶³ Përtej Jordanit, përballë Jerihonit, në lindje të Jordanit, u dhanë nga toka e fisit të Rubenit: Bosorit në shkretëtirë, me kullotat, Jasa me kullotat, ⁶⁴ Kademoti e rrethinat e tija dhe Mefaati me kullotat e tija. ⁶⁵ Kurse prej fisit të Gadit: Ramoti në Galaad me kullotat, Mahanaimi me kullotat, ⁶⁶ Heseboni me kullotat dhe Jazeri me kullotat.

Kapitujt