Kapitujt

1 i Kronikave: 14. Davidi në Jerusalem. Pallati i tij dhe fëmijët e tij

¹ Hirami, mbreti i Tirit, dërgoi te Davidi lajmëtarë, lëndë cedri, muratorë e marangozë për t’ia ndërtuar shtëpinë. ² Atëherë Davidi e mori vesh se Zoti e kishte përforcuar si mbret mbi Izraelin dhe se e kishte lartësuar mbretërinë e tij prej dashurisë ndaj popullit të vet, Izraelit.

³ Davidi në Jerusalem mori edhe gra të tjera dhe i lindën edhe të tjerë bij e bija.

⁴ Ja emrat e atyre që lindën në Jerusalem:

Samuai, Sobabi, Natani, Salomoni, ⁵ Jebahari, Elisuai, Elifaleti, ⁶ Noga, Nafegu, Jafiai, ⁷ Elisama, Baaliada dhe Elifaleti.

Fitorja mbi filistenj

⁸ Kur filistenjtë e morën vesh se Davidi kishte qenë shuguruar mbret mbi mbarë Izraelin, u çuan të gjithë kundër tij për ta zënë. Po edhe Davidi, kur e mori vesh, u doli përpara. ⁹ Filistenjtë kur erdhën u shpërndanë në luginën Rafaim. ¹⁰ Atëherë Davidi kërkoi këshillë prej Hyjit. Pyeti: “A të dal në luftë kundër filistenjve dhe a do të m’i lëshosh në dorë”? Zoti iu përgjigj: “Bjeru e unë do t’i lëshoj në dorë”. ¹¹ Ata dolën në Baalfarasim. Aty Davidi i mundi dhe tha:”Hyji i përshkoi me dorën time armiqtë e mi siç përshkohen ujërat”. Prandaj ai vend u quajt Baalfarasim /d. m. th. Zoti i përshkimeve/. ¹² Filistenjtë i lanë aty zotat e tyre, të cilët Davidi dha urdhër të digjen.

¹³ Edhe një herë tjetër filistenjtë u sulën dhe u shpërndanë në luginë. ¹⁴ Davidi përsëri e pyeti për këshillë Hyjin dhe Hyji i tha: “Mos i ndiq pas. Rrethoji e sulu kundër tyre ballë për ballë prej pas vidhave. ¹⁵ Kur të dëgjosh shushuritjen e atij që ecën majave të lëndëve të vidhave, atëherë sulu në luftë: sepse Hyji ka dalë para teje, që t’i shpartallosh taborret e filistenjve”. ¹⁶ Davidi bëri si i kishte urdhëruar Hyji dhe i shpartalloi taborret e filistenjve prej Gabaonit deri në Gazer. ¹⁷ Dhe u përhap emri i Davidit në të gjitha krahinat e Zoti ua futi frikën e tij mbarë popujve.

Kapitujt