Kapitujt

1 i Kronikave: 5. Rubeni

¹ Bijtë e Rubenit, të parëlindurit të Izraelit ‑ ai ishte i parëlindur, por kur e përdhosi shtratin e të atit, të drejtat e parëlindësisë së tij iu dhanë bijve të Jozefit, të birit të Izraelit.

Barku i Rubenit e humbi të drejtën e parëlindësisë, ² sepse Juda e mori përparësinë mbi vëllezërit e vet ndërsa prej tij rrodhi princi, porse e drejta e parëlindësisë i mbeti t’i takonte Jozefit.

³ Bijtë e Rubenit, të të parëlindurit të Izraelit: Enoku, Falui, Hesroni e Karmiu.

Joeli

⁴ Bijtë e Joelit: Semaja, djali i të cilit qe Gogu, djali i këtij Semeji, ⁵ djali i Semejit, Miha, djali i Mihës Reaja, djali i Reajës Baali, ⁶ djali i Baalit Beera, të cilin e treti në mërgim Teglatfalnasari, mbreti i asirëve; ky ishte princi i Rubenajve.

⁷ Vëllezërit e tij, janë të shënuar në gjenealogjinë e tyre, sipas barqeve që ishin: më në krye është Jehieli, pastaj Zakaria, ⁸ Bela, biri i Azazit të Samës së Joelit. Ky banonte në Aroer që shtrihej deri në Nebo e në Beelmeon. ⁹ Në lindje pronat e tij shtriheshin deri në hyrje të shkretëtirës që kufizohet me lumin Eufrat, sepse grigjat e tyre u shtuan për së forti në dheun e Galaadit. ¹⁰ Në kohën e Saulit luftuan kundër agarenjve të cilët i zhdukën dhe i banuan çadrat e tyre në mbarë krahinën në lindje të Galaadit.

Gadi

¹¹ Bijtë e Gadit, zunë vend përballë tyre, në tokën e Basanit që shtrihej deri në Selhë: ¹² në krye Joeli, Safami i dyti, Janaji e Safati në Basan. ¹³ Vëllezërit e tyre, sipas vëllazërive të tyre, ishin: Mikaeli, Mosolami, Sebeu, Joraji, Jakani, Zieu e Heberi: shtatë. ¹⁴ Këta ishin bijtë e Abihajlit, të birit të Huriut, të birit të Jaroehit, të birit të Galaadit, të birit të Mikaelit, të birit të Jesesiut, të birit të Jedos, të birit të Buzit. ¹⁵ Ahiu biri i Abdielit, të birit të Guniut, ishte prijësi i barqeve të tyre. ¹⁶ Banonin në Galaad e në Basan dhe në rrethet e tija si dhe në të gjitha fshatrat e Saronit deri në kufi. ¹⁷ Të gjithë këta u shkruan në pemën e breznive në kohën e Joatamit, mbretit të Judésë, dhe në kohën e Jeroboamit, mbretit të Izraelit.

¹⁸ Bijtë e Rubenit e të Gadit si dhe të gjysmës së fisit të Manaseut, luftëtarë që mbartnin shqyt e shpatë dhe që ngrehnin harkun, mjeshtra luftimi, ishin dyzetëmijë e shtatëqind e gjashtëdhjetë ushtarë. ¹⁹ Luftuan kundër agarenjve, iturenjve, nafisenjve dhe nodabenjve. ²⁰ Ata qenë të ndihmuar kundër këtyre, sepse gjatë sulmit e thirrën ndihmën e Hyjit dhe Hyji u ndihmoi sepse e kishin vënë shpresën; kështu në duar të tyre ranë agrenjtë me të gjithë ata që ishin në anën e tyre. ²¹ Ua rrëmbyen gjithçka patën: pesëdhjetë mijë deve, dyqind e pesëdhjetë mijë dele e dhi dhe dy mijë gomerë, dhe robëruan njëqind mijë njerëz. ²² Dhe ranë të vrarë shumë, sepse kjo luftë qe dërguar nga Zoti. Pas kësaj ata u ngulitën në vendin e tyre deri në shpërngulje.

Gjysma e fisit të Manaseut

²³ Bijtë e gjysmës së fisit të Manaseut e banuan vendin prej Basanit e deri në Baalhermon e në Sanir dhe në malin Hermon: ishin shumë në numër. ²⁴ Këta ishin prijësit e familjeve të tyre: Eferi, Jesiu, Elieli, Ezrieli, Jeremia, Odoja dhe Jedieli: luftëtarë të fortë, njerëz në zë, prijës të familjeve të tyre.

²⁵ Por e lanë Hyjin e të parëve të vet dhe bënë tradhëti me zotat e popujve të vendit që Hyji i dëboi para tyre.

²⁶ Atëherë Hyji i Izraelit e nxiti shpirtin e Fulit, mbretit të Asirisë, dhe shpirtin e Teglatfalnasarit, mbretit të Asirisë, dhe i dëboi Rubenajt, Gadajt dhe gjysmën e fisit të Manaseut e i çoi në Halë, në Habor, në Arë e në lumin Gozan deri në ditën e sotme.

Kapitujt