Kapitujt

Zanafilla: 46. Të nisurit e Jakobit për Egjipt

¹ Izraeli u ngrit me gjithçka pati dhe arriti në Bersabe.

Këtu i kushtoi fli Hyjit të atit të vet Izakut. ² Izraeli e dëgjoi Hyjin në një vegim nate që e thirri: “Jakob, o Jakob”! Ky iu përgjigj: “Urdhëro”! ³ I tha: “Unë jam Hyji, Hyji i atit tënd! Mos u tremb të shkosh në Egjipt, sepse atje do të të bëj një popull të madh. ⁴ Unë vetë do të zbres atje me ty dhe unë vetë do të përcjell kur të kthehesh prej andej. Jozefi do të jetë ai që do t’i mbyllë sytë e tu”.

⁵ Jakobi u nis, pra, prej Bersabesë dhe bijtë e vunë atë, fëmijët dhe gratë e tyrë në karroca që ua dërgoi faraoni për të udhëtuar plaku. ⁶ Morën me vete gjithashtu gjithçka kishin të vlefshme, që kishin mbledhur në dheun e Kanaanit. Jakobi arriti në Egjipt dhe të gjithë pasardhësit e tij, ⁷ bijtë e tij, nipat, bijat dhe mbarë fara e tij.

Familja e Jakobit

⁸ Ja emrat e izraelitëve ‑ Jakobi dhe pasardhësit e tij që arritën në Egjipt:

I parëlinduri Rubeni. ⁹ Bijtë e Rubenit: Henoku, Falui, Hesroni dhe Karmiu.

¹⁰ Bijtë e Simonit: Jamueli, Jamini, Ahodi, Jakini, Sohari dhe Sauli, biri i Kanaanës.

¹¹ Bijtë e Levit: Gersoni, Kaati dhe Merariu.

¹² Bijtë e Judës: Heri, Onani, Selai, Faresi dhe Zarai. Në dheun e Kanaanit vdiqën Heri dhe Onani. Faresit i lindën djemtë: Hesroni e Hamuli.

¹³ Bijtë e Isaharit: Tolai, Fuai, Jasubi dhe Semroni.

¹⁴ Bijtë e Zabulonit: Saredi, Eloni dhe Jaheleli.

¹⁵ Këta janë bijtë e Lisë që i lindi në Padanaram, me Dinën, vajzën e saj. Të gjithë, bij dhe bija, ishin tridhjetë e tre.

¹⁶ Bijtë e Gadit: Safoni, Hagiu, Suniu, Ezeboni, Heriu, Arodiu dhe Areliu.

¹⁷ Bijtë e Aserit: Jamneu, Jezuai, Jesuiu, Beriai edhe Sara, motra e tyre. Bijtë e Beriait: Heberi dhe Melkieli.

¹⁸ Këta janë bijtë e Zelfës që Labani ia dha për shërbëtorë Lisë, vajzës së vet. Kjo i lindi Jakobit këta: shtatëmbëdhjetë shpirtra.

¹⁹ Bijtë e Rakelës, gruas së Jakobit: Jozefi e Beniamini.

²⁰ Jozefit i lindën në dheun e Egjiptit djemtë që ia lindi Aseneta, bija e Putifarit, priftit të Heliopolit: Manaseu e Efraimi.

²¹ Bijtë e Beniaminit: Belai, Bohori, Asbeli, Gerai, Namani, Ekiu, Rozi, Mofimi, Ofimi dhe Aredi.

²² Bijtë e Rakelës, që ia lindi Jakobit: të gjithë katërmbëdhjetë frymë.

²³ Bijtë e Danit: Husimi.

²⁴ Bijtë e Neftaliut: Jasieli, Guniu, Jeseri dhe Salemi.

²⁵ Këta janë bijtë e Bilhës që Labani ia dha për shërbëtorë Rakelës, vajzës së vet. Këta ia lindi Jakobit: të gjithë shtatë frymë.

²⁶ Të gjitha frymët që hynë në Egjipt bashkë me Jakobin dhe që rrjedhin prej ijës së tij, pa gratë e bijve të tij: gjashtëdhjetë e gjashtë. ²⁷ Kurse bijtë e Jozefit, që i lindën në Egjipt, dy frymë. Të gjithë njerëzit e familjes së Jakobit që erdhën në Egjipt qenë shtatëdhjetë.

Pritja e Jozefit

²⁸ Jakobi e dërgoi para vetes Judën te Jozefi ta njoftojë që t’i dalë para në Gesen. ²⁹ Dhe arritën në Gesen. Edhe Jozefi i zuri kuajt në karrocë dhe hipi për t’i dalë të atit para në Gesen. Kur e pa, iu qep në qafë dhe ngryka‑ngrykas qau gjatë. ³⁰ Izraeli i tha Jozefit: “Tani pasi të pashë me sytë e mi se je gjallë dhe po të lë pas, do të vdes i kënaqur”.

³¹ Atëherë Jozefi foli me vëllezërit e vet dhe me të gjithë anëtarët e familjes të t’et: “Do të ngjitem dhe do ta njoftoj faraonin e do t’i them: ‘Vëllezërit e mi dhe familja e tim eti, që ishin në Kanaan, erdhën tek unë. ³² Këta njerëz janë barinj delesh, janë marrë gjithmonë me blegtori. Bagëtitë e imëta dhe të trasha e gjithçka kanë pasur, i prunë me vete.’ ³³ Kur t’ju thërrasë dhe t’ju thotë: ‘Me çka merreni’? ³⁴ Përgjigjuni: ‘Ne, shërbëtorët e tu, jemi barinj që prej rinisë sonë deri tani; si ne ashtu edhe etërit tanë.’ Thoni kështu që të mund të jetoni në krahinën Gesen, sepse egjiptianët i urrejnë të gjithë barinjtë e deleve”.

Kapitujt