Kapitujt

Zanafilla: 40. Jozefi i shtjellon ëndrrat e shërbëtorëve të faraonit

¹ Ndërkaq, pas këtyre ngjarjeve, ndodhi që kuptari dhe furrtari i mbretit të Egjiptit të gabojnë kundër zotërisë së vet.

² Faraoni i hidhëruar ndaj dy oborrtarëve: kryetarit të kuptarëve dhe të furrtarëve, ³ i hodhi në burgun e kryetarit të rojeve, ku ishte në burg edhe Jozefi. ⁴ Kryetari i rojeve ia dorëzoi Jozefit që t’i kishte nën kujdes. Kështu ata mbetën për do kohë në burg.

⁵ Po të njëjtën natë të dy panë nga një ëndërr, e secila kishte vështrimin e vet. ⁶ Kur Jozefi hyri tek ata në mëngjes dhe, kur i pa të trishtuar, ⁷ i pyeti : “Përse sot jeni më të trishtuar se zakonisht”? ⁸ Ata përgjigjën: “Pamë ëndërr e nuk ka kush të na e shtjellojë”. Jozefi u tha: “Po a nuk e ka Hyji në pushtet t’i shtjellojë ëndrrat? Më tregoni çfarë keni parë”?

⁹ Kryetari i kuptarëve e tregoi ëndrrën e vet: “Shihja përbri hardhinë, ¹⁰ në të cilën ishin tre shermende. Dhe posa filloi të bulojë, qiti lule dhe greca dhe kokrrat u poqën. ¹¹ Kisha në dorë gotën e faraonit. I mora, pra, vilet e rrushit dhe i shtrydha në gotën që e kisha në dorë dhe i dhashë ta pijë faraoni”. ¹² Jozefi iu përgjigj: “Endrra ka këtë kuptim: tre shermendet, janë tri ditë, ¹³ pas të cilave faraoni do të të falë dhe do të kthejë në shkallën që kishe më parë. Prapë do t’ia japësh gotën sipas detyrës sate, siç e ke pasur zakon edhe më parë. ¹⁴ Por, veç, kur të jesh mirë, të bie ndërmend për mua, ki dhimbje për mua dhe thuaj faraonit të më nxjerrë prej burgut, ¹⁵ sepse me dredhi e dhunë më qitën prej dheut të hebrenjve, po edhe këtu të pafajshëm më hodhën në burg.

¹⁶ Kur pa kryetari i furrtarëve se ëndrrës i dha një shtjellim të mirë, tha: “Po edhe unë pashë ëndërr: mbi kokë kisha tri shporta buke. ¹⁷ Në shportën e sipërme, bartja gjithfarë ushqimesh që gatuhen me mjeshtrinë e furrtarisë, por shpendët i hanin. . ¹⁸ Jozefi u përgjigj: “Ja, kuptimi i ëndrrës: tri shportat janë edhe tri ditë. ¹⁹ Pas tri ditëve, faraoni do ta këputë kokën varë në dru dhe mishin tënd do ta hanë shpendët”.

²⁰ Dhe, përnjëmend, të tretën ditë faraoni bëri gosti të madhe për të gjithë shërbëtorët e vet ‑ kishte ditëlindjen ‑ mes shërbëtorëve të vet ndau kryetarin e kuptarëve dhe atë të furrtarëve. ²¹ Kryetarin e kuptarëve e ktheu në detyrën e vet, që t’i japë edhe më tej kupën në dorë, ²² kurse kryemjeshtrin e furrtarëve e vari në dru siç ia kishte shtjelluar Jozefi.

²³ Mirëpo, kryetari i kuptarëve e harroi Jozefin dhe nuk i ra ndër mend për shtjelluesin e vet.

Kapitujt