Kapitujt

Zanafilla: 33. Takimi me Ezaun

¹ Jakobi i çoi sytë dhe pa se po vinte Ezau me katërqind vetë. I ndau bijtë e Lisë, të Rakelës e të dy shërbëtoreve.

² Dy shërbëtoret dhe bijtë e tyre i qiti të para, Linë dhe bijtë e saj të dytë, kurse Rakelën e Jozefin në fund. ³ Ai doli para tyre dhe me fytyrë për dhe e nderoi shtatë herë, derisa u afrua tek i vëllai. ⁴ Ezau u lëshua vrap në takim me të vëllanë dhe e përqafoi. Duke e shtrënguar ngryka‑ngrykas e puthte dhe qanin të dy.

⁵ Kur i çoi sytë, i pa gratë dhe fëmijët e tyre e tha: “Çka i ke ti këta”? Jakobi u përgjigj: “Janë fëmijët e mi që m`i dhuroi Perëndia, mua shërbëtorit tënd”. ⁶ U afruan shërbëtoret dhe fëmijët e tyre, u përkulën në nderim. ⁷ U afrua edhe Lia me fëmijët e saj dhe u përkulën në nderim. Të fundit e përshëndetën duke u përulur Jozefi dhe Rakela.

⁸ “Çka janë ato turma ‑ i tha ‑ që i pashë udhës”? iu përgjigj: “Që të gjej mirëkuptim para teje, imzot”. ⁹ Ai i tha: “Kam mjaft, or vëlla! Lëri për vete”! ¹⁰ Jakobi foli: “Mos ma prish, po të lutem, por, nëse kam gjetur hir para syve të tu, merri si dhuratëz prej dorës sime! M’u bë, kur e pashë fytyrën tënde, si ta kisha parë fytyrën e Perëndisë, pasi dëftove mirëkuptim për mua! ¹¹ Merre, po të lutem, bekimin që ta solla, sepse Hyji ka pasur dhimbje për mua e kam gjithçka”.

Dhe, pasi u përpoq ta bindë me ngulm, ai pranoi ¹² e tha: “Po shkojmë së bashku dhe do të jem shok udhëtimi me ty”. ¹³ Jakobi iu përgjigj: “Ti po sheh, imzot, se i kam fëmijët e njomë me vete edhe delet e lopët pëlleja! Po i mundova tepër në të ecur vetëm edhe një ditë, do të më cofin të gjitha grigjat. ¹⁴ Le të shkojë para meje imzoti, e unë do të vij pas ngadalë, sipas mundësisë të ecjes së gjësë së gjallë dhe sipas ecjes të të vegjëlve deri të arrij tek imzoti në Seir”. ¹⁵ Ezau iu përgjigj: “Po të lutem që së paku ndokush prej njerëzve që janë me mua të shoqërojnë në udhëtim”. “Po nuk është nevoja ‑ iu përgjigj Jakobi ‑ kam nevojë vetëm për një gjë: që të jem i pajtuar me imzotin”!

¹⁶ Po atë ditë Ezau u kthye rrugës së vet në Seir.

¹⁷ Jakobi erdhi në Sukot, ku për vete ndërtoi shtëpinë dhe per bagëti ndërtoi kasolla. Atë vend e quajti Sukot (d. m. th. Tëbanet).

Arritja në Sikem

¹⁸ Jakobi, pasi erdhi prej Padanaramit arriti shëndosh e mirë në qytetin e Sikemit, që është në Kanaan. Nguli, banesën përballë qytetit. ¹⁹ Prej bijve të Hemorit, të atit të Sikemit, e bleu për njëqind para argjendi atë copë tokë ku nguli çadrën e vet. ²⁰ Aty e ndërtoi një lter dhe e quajti: “Hyji është Hyj i Izraelit”.

Kapitujt