Kapitujt

Zanafilla: 30. Si u pasurua Jakobi

¹ Rakela, duke parë se nuk po mund të lindte fëmijë, i pati smirë motrës dhe i tha burrit: “Bëj të kem fëmijë, ndryshe do të vdes”! ² Jakobi i hidhëruar, iu përgjigj: “Pse a mos jam unë në vend të Hyjit që ty ta mohoi frytin e barkut”? ³ Por, ajo tha: “Ja, shërbëtorja ime Bilha: bjer me të, që të lindë në prehrin tim dhe të kem edhe unë prej saj bij”. ⁴ Dhe ia dha Bilhën, shërbëtoren e vet për grua. ⁵ Kjo, pasi e mori Jakobi, ngjizi dhe lindi djalë.

⁶ Rakela tha: “Hyji ma dha të drejtën dhe ma dëgjoi edhe mua lutjen, sepse më dhuroi djalin”. Prandaj e quajti me emër Dan.

⁷ Bilha, shërbëtorja e Rakelës, mbeti përsëri shtatzënë dhe i lindi Jakobit nje djalë tjetër. ⁸ Rakela tha: “Luftimet e Hyjit i luftova me motrën time dhe ngadhënjeva”, prandaj e quajti Neftali.

⁹ Lia, kur pa se nuk po mund të lindte më, mori Zelfën, shërbëtoren e vet dhe ia dha Jakobit për grua. ¹⁰ Edhe kjo i lindi Jakobit djalë. ¹¹ Dhe Lia klithi: “Ç’fat të mirë”!

Prandaj e quajti Gad.

¹² Zelfa, shërbëtorja e Lisë, i lindi Jakobit edhe një djalë tjetër. ¹³ Dhe Lia klithi prapë: “Për lumturinë time! Sepse gratë do të më shpallin të lume”! Prandaj e quajti Aser.

¹⁴ Në kohën e korrjes së grurit Rubeni doli në fushë, gjeti mullaga dhe ia solli Lisë, nënës së vet. Rakela i tha: “Më jep pak mullaga që t’i solli djali”. ¹⁵ Ajo iu përgjigj: “A po të duket pak që ma rrëmbeve burrin e po do të m’i marrësh edhe mullagat e djalit tim”? Rakela i tha: “Le të flejë sonte me ty për mullagat e djalit tënd”. ¹⁶ Kur Jakobi u kthye në mbrëmje nga fusha, Lia i doli përpara e i tha: “Sonte fli tek unë, sepse të kam paguar me mollët e dashurisë së djalit tim”. Dhe ai fjeti me të atë natë.

¹⁷ Hyji e vështroi Linë, ngjizi dhe i lindi Jakobit djalin e pestë ¹⁸ dhe tha: “Perëndia më shpërbleu, pse ia dhashë burrit tim shërbëtoren time”. Prandaj e quajti djalin Isahar.

¹⁹ Lia mbeti përsëri shtatzënë dhe i lindi Jakobit djalin e gjashtë ²⁰ dhe tha: “Perëndia më dhuroi dhuratë të mirë. Kësaj here do të më nderojë burri im, sepse i linda gjashtë djem”. Prandaj e quajti djalin Zabulon.

²¹ Pas këtij lindi edhe vajzën me emër Dinë. ²² Hyjit i ra ndërmend edhe për Rakelën; Hyji ia plotësoi dëshirën dhe e bëri të pëlleshme. ²³ Edhe kjo ngjizi dhe lindi djalë. Tha: “Hyji ma hoqi turpin!” ²⁴ Dhe e quajti me emër Jozef duke shtuar: “Më shtoftë Zoti edhe me një djalë tjetër”!

Si u pasurua Jakobi

²⁵ Pasi lindi Jozefi, Jakobi i tha Labanit: “Më lësho të kthehem në shtëpinë time, në vendin tim. ²⁶ M’i jep gratë dhe fëmijët e mi, për të cilat të shërbeva, që të shkoj e ti e di shërbimin që të kam bërë”. ²⁷ Labani i tha: “Nëse të kam mik... Me ca shenja mësova se Hyji më bekoi në saje tënde. ²⁸ Caktoje shpërblimin tënd që do të ta jap”.

²⁹ Jakobi iu përgjigj: “Ti e di se si të kam shërbyer dhe sa t’u shtuan grigjat në duart e mia. ³⁰ Ç’ke pasur para se të vija unë te ti? E tani shih sa ështe shtuar. Pate bekimin e Zotit që kur erdha unë. E tani, është koha të punoj edhe për shtëpinë time”? ³¹ Labani i tha: “Çka do të të jap”? Ai iu përgjigj: “S’dua të më japësh asgjë; por, nëse bën çka të kërkoj unë, do t’i kullos dhe do t’i ruaj përsëri bagëtitë e tua. ³² Sot më lejo t’u hyj të gjitha grigjave të tua, që të ndaj të gjitha bagëtitë ngjyrash të ndryshme e me lara dhe, cilado që të jetë galë ndër dele dhe kracë e lacë ndër dhi, do ta marr për shpërblimin tim. ³³ Nesër do të më përgjigjë drejtësia ime. Kur të vish për ta parë pagën time, të gjitha dhitë që nuk do të jenë laca e kraca dhe ndër dele të mos jenë gala, le të vlerësohet si të vjedhura”.

³⁴ Labani i tha: “Mirë, na qoftë si po thua ti”!

³⁵ Po atë ditë i ndau cjeptë kracana e lacana si dhe të gjitha dhitë kraca e laca, të gjitha që kishin pika të bardha, dhe ndër berre çdo kokërr që ishte galë dhe ua dha djemve të vet. ³⁶ I çoi tri ditë rrugë larg ndërmjet tij dhe Jakobit. Jakobi ruante pjesën tjetër të bagëtive të Labanit.

³⁷ Atëherë Jakobi mori thupra të njoma plepi, bajameje dhe rrapi dhe ua hoqi pjesërisht lëkurën, kështu që atyre që ua hoqi lëkurën t’u dukej të bardhët. ³⁸ Thuprat që i kishte shkruar pjesërisht me vija, i vuri në lugje, ku i ujonte që, kur të vinin grigjat për të pirë ujë, t’i kishin para sysh thuprat dhe, duke shikuar ato, të mbarësoheshin. ³⁹ Kështu mbarësoheshin duke shikuar thuprat dhe bënë edha ngjyrash të ndryshme, kraca e laca.

⁴⁰ Po edhe për sa u përket deleve, edhe ato Jakobi i ndau e bënte ashtu që, ndërsa ndërzeheshin, të shikonin të larmet dhe të zezat që ishin në grigjën e Labanit. Kështu bëri grigja të veta dhe nuk i bashkoi me grigjat e Labanit. ⁴¹ Sa herë që mbarësoheshin bagëtitë e shëndosha, Jakobi vinte thuprat në lugjet e ujit para syve të tyre që të mbarësoheshin duke i shikuar ato. ⁴² Kur mbarësoheshin bagëtitë e nevojme, nuk i vinte. Kështu të nevojmet i takonin Labanit e të fortat Jakobit. ⁴³ Kështu ai u pasurua jashtëzakonisht dhe bëri grigja të mëdha, shërbëtore e shërbëtorë, gamile e gomarë.

Kapitujt