Kapitujt

Zanafilla: 15. Premtimi dhe besëlidhja

¹ Pas këtyre ngjarjeve, fjala e Zotit i qe drejtuar Abramit në një vegim. I tha: “Abram, mos ki frikë! Unë jam mbrojtësi yt! Shpërblimi yt do të jetë shumë i madh”!

² Abrami u përgjigj: “O Zot, Hyj, ç’më duhen dhuratat e tua, pasi shkoj i shuar pa pasardhës dhe trashëgimtari i shtëpisë sime do të jetë Eliezeri prej Damaskut”. ³ Dhe Abrami vazhdoi: “Ja, po sheh se nuk më dhe pasardhës dhe ja, një rob i shtëpisë do të më trashëgojë”. ⁴ Atëherë Zoti i tha këto fjalë: “Ky nuk do të jetë, trashëgimtari yt do të jetë pinjolli yt që do të rrjedhë prej teje”. ⁵ Zoti e bëri të dalë jashtë dhe i tha: “Shikoje qiellin dhe numëroji yjet, po munde”! Dhe shtoi: “Të tillë do të jenë trashëgimtarët e tu”. ⁶ Abrami i besoi Zotit dhe iu çmua për drejtësi.

⁷ I tha edhe: “Unë jam Zoti që të nxora nga Uri i Kaldesë për ta dhënë këtë tokë pronë”. ⁸ Abrami i tha: “O Zot, Hyj, nga mund ta di se ajo do të jetë prona ime”. ⁹ Zoti u përgjigj: “Ma gjej një mështjerrë tri vjeçe dhe një dash tri vjeç, një turtull dhe një pëllumb”. ¹⁰ Abrami i mori këto të gjitha dhe i preu për mjedis dhe secilën prej gjysmave e vendosi përballë njërën tjetrës. Shpendët nuk i preu. ¹¹ Shpendët grabitqarë lëshoheshin mbi kufoma, por Abrami i dëbonte.

¹² Në të perënduar të dielli, Abramin e lodhi gjumi dhe, ja, e kaploi një tmerr i madh dhe e mbështolli një errësirë e dendur. ¹³ I qe thënë: “Dije mirë që tani se pasardhësit e tu do të jetojnë në një vend të huaj dhe atje do t’i bëjnë skllevër dhe do t’i shtypin e mundojnë plot katërqind vjet. ¹⁴ Përnjëmend, popullin, të cilit do t’i shërbejnë, unë do ta gjykoj dhe, së fundi, ata do të dalin me pasuri të madhe. ¹⁵ Ti do të shkosh tek etërit e tu në paqe, i varrosur në pleqëri të thellë. ¹⁶ Në të katërtin brez, pasardhësit e tu do të kthehen këtu: sepse ende nuk janë mbushur keqbërësitë e amorrenjve.

¹⁷ Kur perëndoi dielli, u bë një terr i zi, u duk një tangar i ndezur dhe flakadani i përshkoi ato pjesë.

¹⁸ Atë ditë Zoti lidhi këtë besëlidhje me Abramin:

“Këtë tokë do t’ia jap farës sate

prej lumit të Egjiptit

deri në Lumin e madh ‑ Eufrat:

¹⁹ cinenjtë e cenezenjtë, cedmonenjtë

²⁰ hetenjtë, ferezenjtë dhe rafaimët,

²¹ amorrenjtë, kananenjtë, gergezenjtë e jebusenjtë”.

Kapitujt