Kapitujt

Zanafilla: 9. Rendi i ri i botës

¹ Hyji e bekoi Noehin dhe bijtë e tij e u tha: “Jini të pëlleshëm, shumohuni dhe mbusheni tokën. ² Jini tmerr dhe frikë për të gjitha gjallesat e tokës, për të gjithë shpendët e qiellit dhe për të gjitha kafshët e gjalla që lëvizin përmbi tokë; të gjithë peshqit e detit janë në duart tuaja. ³ Gjithçka që lëviz dhe gjallon do ta keni për ushqim: jua jap të gjitha këto siç ju pata dhënë të gjitha perimet e blerta. ⁴ Vetëm mos e hani mishin me shpirt që është në gjak. ⁵ Unë do të kërkoj llogari për gjakun e jetës suaj. Do të kërkoj llogari prej të gjitha kafshëve; do të kërkoj llogari prej njeriut për jetën e njeriut, prej secilit gjakun e vëllait të vet.

⁶ Kush derdh gjakun e njeriut,

gjaku i tij të derdhet prej njeriut,

sepse në përfytyrimin e Hyjit

Hyji e krijoi njeriun.

⁷ Jini të pëlleshëm dhe shumohuni,

mbusheni tokën dhe sundojeni”!

⁸ Edhe këto i tha Hyji Noehit dhe bijve të tij:

⁹ “Ja, unë po e lidh besëlidhjen time me ju dhe me trashëgimtarët tuaj, pas jush ¹⁰ e me çdo qenie të gjallë që është me ju, qoftë ai shpend, qoftë bagëti, qoftë egërsirë e tokës që është me ju, me të gjitha gjallesat që dolën prej arkës me ju ‑ me mbarë, gjallesat e tokës. ¹¹ Unë po lidh besëlidhjen time me ju: nuk do të sharoset më asnjë gjallesë me ujërat e përmbytjes dhe nuk do të ketë më përmbytje që shkreton tokën”.

¹² Dhe Hyji tha:

“Kjo është shenja e besëlidhjes

që unë po e bëj

ndërmjet meje e juve

dhe me çdo gjallesë

që është me ju

për të gjitha breznitë e ardhshme;

¹³ Ylberin tim do ta vë në re

dhe do të jetë shenja e besëlidhjes

ndërmjet meje dhe tokës.

¹⁴ Kur me re ta mbuloj qiellin,

në re do të duket ylberi im,

¹⁵ do të më kujtohet besëlidhja ime me ju

e me çdo frymë të gjallë që mishit i jep jetë,

ujë përmbytjeje më s’do të ketë

për të zhdukur mbarë frymorët.

¹⁶ Ylberi do të duket në re,

atë unë do ta shikoj

dhe do të më kujtohet besëlidhja e përhershme

që u lidh mes Hyjit e çdo gjëje të gjallë,

të mbarë gjallesave që janë përmbi tokë”.

¹⁷ Hyji i tha Noehit: “Kjo do të jetë shenja e besëlidhjes që e bëra ndërmjet meje e çdo gjallese përmbi tokë”.

3. PREJ PËRMBYTJES E DERI TEK ABRAHAMI

Noehi dhe bijtë e tij

¹⁸ Bijtë e Noehit që dolën nga arka ishin: Semi, Kami e Jafeti.

Kami është trungu i Kanaanit.

¹⁹ Këta tre janë bijtë e Noehit. Prej tyre u përhap tërë gjinia njerëzore mbi mbarë tokën.

²⁰ Noehi që ishte bujk, nisi të mbjellë një vreshtë. ²¹ Pasi piu verë, u deh dhe u zdesh në çadrën e vet. ²² Kur Kami i ati i Kanaanit e pa d. m. th. të atin ashtu lakuriq, lajmëroi dy vëllezërit e tij që ishin jashtë.

²³ Atëherë Semi e Jafeti morën mallotën, e vunë në krah, e duke ecur prapazi, mbuluan lakuriqësinë e atit të tyre duke mos e shikuar babain lakuriq. ²⁴ Noehi, kur e lëshoi pija e, si e mori vesh çka i kishte bërë i biri i vogël, ²⁵ tha:

“Qoftë mallkuar Kanaani:

Skllav, bir skllavi qoftë për vëllezërit e vet”!

²⁶ E shtoi:

“Qoftë bekuar Zoti, Hyji i Semit!

Kanaani qoftë skllavi i tij!

²⁷ Hyji e zgjeroftë Jafetin!

Banoftë në tendat e Semit

e Kanaani qoftë skllavi i tij”!

²⁸ Noehi jetoi pas përmbytjes edhe treqind e pesëdhjetë vjet.

²⁹ Jetoi gjithsej nëntëqind e pesëdhjetë vjet e atëherë vdiq.

Kapitujt