Kapitujt

Jobi: 40. Hyji e nënshtron fuqinë e të keqes

¹ Zoti Jobin e theki e tha:

² “Prozhmuesi s’do të ndeshet me të Lumin?

Kritikuesi Hyjit t’i përgjigjë”!

³ Jobi Zotit iu përgjigj:

⁴ “Heu! Pa mend fola! Si të përgjigj?

Me dorë gojën po e kyç!

⁵ Një herë fola: s’e përsëris dot!

Dy herë fola: s’vazhdoj dot”!

BISEDA E DYTË

Hyji e nënshtron fuqinë e të keqes

⁶ Atëherë Hyji iu përgjigj Jobit nga stuhia e i tha:

⁷ “Porsi trimi ngjeshi ijët:

dua të të pyes e ti më mëso.

⁸ Gjyqin tim poshtë do ta hedhësh,

të më dënosh mua ta shfajësosh veten?

⁹ Krahu yt a është si i Hyjit,

zëri yt gjëmon si i tij?

¹⁰ Ngjeshu, pra, me stoli e madhëri,

veshu, pra, me shkëlqim e me nder!

¹¹ Zbraz stuhinë e zemërimit tënd,

me shikim përul krenarët!

¹² Vëre krenarin, për tokë përplase,

zhduki keqbërësin kudo të ndodhë!

¹³ Të gjithë së bashku në dhe mbuloji,

të gjithë kyçi në gropë të errët!

¹⁴ Atëherë unë do të bëj dëshmi

se të shpëton e djathta jote.”

Behemoti

¹⁵ “Shih Behemotin: e krijova porsi ty;

ai ha bar si të ishte ka!

¹⁶ Në ijë forca i qëndron

e fuqia në muskuj të barkut.

¹⁷ E ngreh bishtin thua është cedër,

kofshët krejtësisht ia mbërthejnë dejtë.

¹⁸ I ka eshtrat fishkull bronzi,

brinjtë e tij si pllaka hekuri!

¹⁹ Është vepra e parë e Hyjit,

Krijuesi me shpatë e pajisi.

²⁰ Atij malet ia paguajnë të dhjetat,

egërsirat që n’për to gjesdisin.

²¹ Nën lotus shtrihet të pushojë,

kallmi i kënetës e balta e fshehin.

²² Hije i bëjnë gjethët e lotusit,

e rrethojnë shelgjet e kënetës.

²³ Fryhet lumi, ai s’çan kokën,

në fyt t’i hynte një lumë i tërë,

s’e shqetëson, ai vesh nuk vret!

²⁴ Kush atë për syri e kap,

e lidh në kunj e i shpon hundën”?

Leviatani

²⁵ “Leviatanin a e zë me grep?

Vallë me toje ia lidh gjuhën?

²⁶ A n’për hundë ia kalon zunkthin?

Ia shpon nofullën me kërrabë?

²⁷ Të kesh dhimbje a do të të përbejë?

Butë e ëmbël do të flasë me ty?

²⁸ A thua me ty marrëveshje do të bëjë

do ta bësh shërbëtor të përhershëm?

²⁹ Si me shpend do të luash me të,

do ta lidhësh që vajzat të luajnë?

³⁰ Bashkëgjahtarët në treg do ta qesin,

do ta ndajnë tregtarët ndër vete?

³¹ Me shigjetë do t’ia shposh shpinën,

do t’ia therësh kokën me fuzhnjë?

³² Vër njëherë dorën mbi të:

luftës gëzoju ‑ më s’do të ndeshesh!

Kapitujt