Kapitujt

Jobi: 20. Rendi i drejtësisë nuk ka përjashtime

¹ Fjalën e mori Sofar Naamatiti e tha:

² “Mendja më shtyt përgjigje të të jap,

sepse në mua vlon truri i ndriçuar.

³ Me fjalë të tua paditëse më ke ngacmuar,

i dijes sime shpirti do të përgjigjë.

⁴ Pse a s’e di se gjithmonë,

që kur u vu mbi tokë njeriu

⁵ se jetëpak është gëzimi i të mbrapshtëve

se çak‑fak kalon fati i mëkatarëve.

⁶ Nëse der në qiell arrin madhështia e tij,

nëse me kokë ai retë ia del t’i ndeshë,

⁷ porsi plehu fshihet për gjithmonë,

kush e pa do të pyetë: ‘Ç’e mori?’

⁸ porsi ëndrra vrik do të zhduket,

do të kalojë si vegimi i natës.

⁹ Kush e pa më s’do ta shohë,

vendi i tij më s’do ta këqyrë,

¹⁰ të bijtë të varfrit do t’i dëmshpërblejnë,

me duar të veta plaçkat do t’i kthejnë.

¹¹ Eshtrat e tij në lule të rinisë

bashkë me të në pluhur do të prehen.

¹² Për gojë të tij e keqja ish’ e ëmbël

ai e ruante nën gjuhën e vet.

¹³ Ruhet mirë të mos e përpijë,

nën qellzë të vet e fsheh kujdesshëm.

¹⁴ Por ushqimi në bark i kalbet,

helm shlligash i bëhet në zorrë.

¹⁵ Pasuritë që hëngri do t’i vjellë,

Hyji vetë prej barkut do t’ia nxjerrë.

¹⁶ Thithur ka prej shlligash helm:

gjuha e shlligës do ta vrasë!

¹⁷ Mos i paftë më rrëketë e vajit,

përrenjtë që rrjedhin mjaltë e tlyen!

¹⁸ Pa e shijuar do ta kthejë fitesën,

s’do ta gëzojë tregtinë që bëri.

¹⁹ Sepse të varfërin e shkeli, e ndrydhi,

rrëmbeu shtëpitë që s’i ndërtoi.

²⁰ Barku i tij kurrë nuk u ngop,

visarët s’do ta shpëtojnë.

²¹ S’la gjë për të ngopur grykësinë,

mirëqenia e tij gjatë s’do të qëndrojë.

²² Në kulm të kamjes në mjerim do të bjerë,

gjithë e keqja do të sulet mbi të.

²³ Në dashtë ta fajë barkun e vet:

zemërimin Hyji do ta lëshojë mbi të.

²⁴ Nëse armës së hekurt ia del t’i shpëtojë,

do të shitohet nga harku i bronztë.

²⁵ Anë për anë do ta shitojë shigjeta

dhe mëlçinë rrufeja shigjetuese.

Kahdo t’ia mbajë do ta sulmojë tmerri.

²⁶ Tmerri i frikshëm gjithkund në pritë i rri,

e djeg flaka prej askujt e ndezur:

do t’i digjet gjithçka në tendë i mbeti!

²⁷ Qielli në dritë do të qesë mbrapshtinë e tij,

kurse toka kundër tij do të ngritet.

²⁸ Shtëpinë e tij do ta marrë lumi,

hidhërimi i Hyjit krejtësisht do ta zhdukë.

²⁹ Kjo është pjesa që Hyji i jep të paudhit,

trashëgimi që prej Zotit merr”.

Kapitujt