Kapitujt

Dalja: 1. Përparimi i hebrenjve në Egjipt

 ¹ Këta janë emrat e bijve të Izraelit, që, bashkë me Jakobin, hynë në Egjipt, secili me familjen e vet:

² Rubeni, Simoni, Levi e Juda,

³ Isahari, Zabuloni e Beniamini,

⁴ Dani, Neftaliu, Gadi e Aseri.

⁵ Të gjithë pasardhësit e Jakobit ishin së

bashku shtatëdhjetë frymë.

Jozefi ishte që më parë në Egjipt.

⁶ Jozefi vdiq. Vdiqën edhe të gjithë vëllezërit e tij dhe mbarë ajo brezni. ⁷ Bijtë e Izraelit u rritën, u shtuan, u shumuan, u forcuan për së tepërmi dhe e mbushën dheun.

Shtypja e hebrenjve

⁸ Atëherë u ngrit mbi Egjipt një mbret i ri, i cili nuk e kishte njohur Jozefin. ⁹ Ky i tha popullit të vet: “Ja, populli i Izraelit u shumua fort dhe u bë më i fuqishëm se ne! ¹⁰ Të marrim, pra, ndaj tij masa të mjaftueshme për të bërë që të mos shumohet; ndryshe, në rast lufte kundër nesh, do të bashkohet me armiqtë tanë, dhe, pasi të na mundin, do të dalin nga vendi”. ¹¹ Prandaj vuri mbi ta kryepunëtorë, që t’i shtypnin me punë të rënda. Ata ndërtuan për faraonin qytetet‑depo: Pitomin dhe Ramsesin. ¹² Por, sa më fort që i shtypnin, aq më tepër rriteshin dhe shtoheshin përtej çdo mase. ¹³ Egjiptianët filluan t’i kenë frikë bijtë e Izraelit, këndej nisën t’i mundojnë pa mëshirë ¹⁴ dhe ua bënë jetën e hidhur duke i shtërnguar të punojnë punët e rënda, siç janë llaçi e punimi i tullave edhe me çdo vepër tjetër skllavërie me të cilën ua bënin jetën ngjak.

¹⁵ Pastaj mbreti i Egjiptit i thirri mamitë e hebrenjve, prej të cilave njëra quhej Sefra e tjetra Pua, ¹⁶ dhe iu urdhëroi: “Kur t’u shërbeni grave të hebrenjve në kohën e lindjes, në qoftë se do të jetë fëmija mashkull, vriteni, nëse është femër, lëreni”! ¹⁷ Porse mamitë e druanin Hyjin dhe nuk bënë si u urdhëroi mbreti i egjiptianëve, por i ruanin në jetë edhe fëmijët meshkuj. ¹⁸ Mbreti i thirri dhe u tha: “Çka po bëni kështu? Ju po i ruani djemtë!” ¹⁹ Ato përgjigjën: “Gratë hebrenje nuk janë porsi gratë egjiptiane. Ato janë të forta dhe, para se ne të arrijmë, ato lindin”. ²⁰ Hyji i bekoi mamitë dhe populli u rrit dhe u forcua për së tepërmi. ²¹ Dhe, pasi mamitë e patën frikën e Hyjit, Hyji ua mbushi shtëpinë me trashëgimtarë.

²² Për këtë arsye faraoni dha urdhër dhe i tha mbarë popullit të vet: “Çka të lindin mashkuj, hidhni në lumë, kurse femrat lini gjallë”!

Kapitujt