Kapitujt

Dalja: 40. Të venduarit dhe shugurimi i Shenjtërores

¹ Zoti foli me Moisiun dhe i tha: ²“Ditën e parë të muajit të parë ngrehe Banesën, Tendën e takimit. ³ Vendoje në të Arkën e Dëshmisë, atëherë Arkës vëri para koltrinën. ⁴ Sille tryezën e vër mbi të rendas çfarë duhet vënë. Shtjere edhe shandanin me dritëzat e tija ⁵ edhe lterin e artë, në të cilin digjet kemi, vëre para Arkës së Dëshmisë. Atëherë vare koltrinën në hyrje të Banesës. ⁶ Vendoje lterin e flive të shkrumbimit para derës së Banesës të Tendës së takimit. ⁷ Legenin vendoje ndërmjet të lterit dhe të Tendës së takimit dhe mbushe me ujë. ⁸ Tremen rrethoje me koltrina dhe në derën e saj vëre lavjerrcin. ⁹ Pastaj merr vaj shugurimi e lyeje Banesën dhe gjithçka është në të dhe shuguroje me pjesët përkatëse të sajat, dhe do të jetë e shenjtë. ¹⁰ Lyeje edhe lterin e flive të shkrumbimit dhe të gjitha veglat e tija dhe shuguroje lterin dhe do të jetë gjë tejet e shenjtë. ¹¹ Lyeje edhe legenin me fundësorin e tij dhe shuguroje. ¹² Afroje Aronin dhe bijtë e tij te hyrja e Tendës së takimit dhe, pasi t’i kesh larë me ujë, ¹³ veshe Aronin me petkat e shenjta, lyeje e shuguroje që ta ushtrojë priftërinë time. ¹⁴ Afroji edhe bijtë e tij e veshi me këmisha ¹⁵ dhe lyeji edhe ata siç e leve të atin e tyre që ta ushtrojnë priftërinë në nderin tim dhe lyerja e tyre do të jetë për ta hyrje në priftëri të përhershme në të gjitha breznitë e tyre”.

Zbatimi i urdhrave të Zotit

¹⁶ Moisiu i bëri të gjitha ato që i kishte urdhëruar Zoti: ashtu edhe bëri.

¹⁷ Kështu, pra, të parën ditë të muajit të parë të vitit të dytë u ngreh Banesa. ¹⁸ Moisiu e ngriti atë, vendosi bazat, dërrasat e shtagat dhe i ngriti shtyllakët. ¹⁹ Atëherë e shtriu tendën përmbi Banesë e mbi të vuri mbulesën e Tendës, po ashtu siç i kishte urdhëruar Zoti Moisiut. ²⁰ Pastaj e mori Dëshminë dhe e futi në Arkë. Arkës i vuri shtagat e atëherë e vuri mbi Arkë Pajtimoren. ²¹ Pasi e futi Arkën në Banesë, e vari para saj koltrinën, ashtu si i kishte urdhëruar Zoti Moisiut. ²² E vendosi edhe tryezën në Tendën e takimit në anën e veriut të Banesës, jashtë koltrinës, ²³ dhe i renditi në të bukët e kushtimit siç i kishte urdhëruar Zoti Moisiut. ²⁴ E vendosi edhe shandanin në Tendën e takimit përballë tryezës në anën e jugut të Banesës. ²⁵ I vuri dritëzat në vendet e caktuara ashtu si i kishte urdhëruar Zoti Moisiut. ²⁶ E vendosi edhe lterin e artë në Tendën e takimit, para koltrinës. ²⁷ Në të ndezi kemin e erëndshëm siç i kishte urdhëruar Zoti Moisiut. ²⁸ Vari edhe koltrinën në hyrje të Banesës, ²⁹ vendosi edhe lterin e flive të shkru‑ mbimit te hyrja në Banesë, në Tendën e takimit. Në të e kushtoi flinë e shkrumbimit dhe flinë bimore, siç i kishte urdhëruar Zoti Moisiut.

³⁰ E vendosi edhe legenin ndërmjet Tendës së takimit e lterit dhe e mbushi me ujë. ³¹ Moisiu, Aroni dhe bijtë e Aronit i lanë duart e këmbët. ³² I lanin kur hynin në Tendën e takimit e kur afroheshin te lteri siç i kishte urdhëruar Zoti Moisiut. ³³ Atëherë Moisiu e ndërtoi edhe tremen për rreth Banesës e lterit dhe e vendosi koltrinën në derën e tremës.

Kështu i dha fund punës.

Zoti e merr për pronë shenjtëroren

³⁴ Atëherë reja e mbuloi Tendën e takimit dhe Lavdia e Zotit e mbushi Banesën. ³⁵ Moisiu nuk mundi të hyjë në Tendën e takimit, për shkak të resë që rrinte mbi të dhe të Lavdisë së Zotit që e kishte mbushur Banesën.

Reja i udhëheq izraelitët

³⁶ Gjatë krejt kohës së shtegtimit, kurdo që reja ngrihej prej Banesës, izraelitët çoheshin, ³⁷ e nëse reja nuk çohej, izraelitët nuk merrnin udhëtim deri atë ditë kur ngrihej reja prej Banesës. ³⁸ Gjatë krejt kohës së shtegtimit të tyre reja e Zotit ditën e mbulonte Banesën, kurse natën dukej në të zjarri që e shihte mbarë shtëpia e Izraelit.

Kapitujt