Kapitujt

Dalja: 6. Tregim i ri i thirrjes së Moisiut

¹ Zoti i tha Moisiut: “Tani do të shohësh çka do t’i bëj faraonit! Sepse, nën peshën e dorës së rëndë do t’i lëshojë dhe madje përdhunë do t’i dëbojë prej vendit të vet”!

Tregim i ri i thirrjes së Moisiut

² Zoti foli me Moisiun e tha: “Unë jam Zoti, ³ që iu dëftova Abrahamit, Izakut e Jakobit si Hyj i gjithëpushtetshëm. Unë atyre nuk ua tregova emrin tim Zot. ⁴ Unë edhe bëra besëlidhje me ta se do t’ua jap dheun Kanaan ‑ tokën e çojave të tyre, në të cilën banuan si të huaj. ⁵ Unë e dëgjova dënesjen e izraelitëve, sepse egjiptianët i shtypën dhe m’u kujtua besëlidhja ime. ⁶ Prandaj thuaju bijve të Izraelit: Unë jam Zoti që do t’i nxjerr nga shtypja e egjiptianëve! Unë do t’ju shpëtoj nga skllavëria dhe do t’ju shpërblej me goditje të fuqishme, duke i ndëshkuar rëndë! ⁷ Juve do t’ju marr për popullin tim dhe do të jem Hyji juaj. Atëherë do ta dini se unë jam Zoti, Hyji juaj, kur do t’ju shpëtoj nga shtypja e egjiptianëve ⁸ dhe do t’ju fus në tokën, mbi të cilën u përbeva se do t’ia jap Abrahamit, Izakut e Jakobit. Unë, Zoti, do t’jua jap për pronë!”

⁹ Moisiu të gjitha këto ua tregoi bijve të Izraelit, por ata nuk ia vinin fare veshin, sepse ishin shpirtërisht tepër të ngushtuar nga puna tepër e rëndë. ¹⁰ E Zoti prapë i tha Moisiut: ¹¹ ”Hyr dhe fol me faraonin, mbretin e Egjiptit, që t’i lëshojë bijtë e Izraelit prej dheut të tij”!

¹² Moisiu foli në praninë e Zotit: “Ja, as bijtë e Izraelit nuk më dëgjojnë, po si atëherë do të më dëgjojë faraoni, sidomos kur nuk jam gojëmbarë”? ¹³ Zoti foli përsëri me Moisiun e me Aronin dhe u urdhëroi të shkojnë njëherë te bijtë e Izraelit e pastaj te faraoni, mbreti i Egjiptit, për t’i nxjerrë izraelitët nga dheu i Egjiptit.

Breznitë e Moisiut e të Aronit

¹⁴ Këta janë zotët e shtëpive sipas familjeve të tyre. Bijtë e Rubenit, të të parëlindurit të Izraelit: Henoku, Faluu, Hesroni dhe Karmiu. Këto janë familjet e Rubenit.

¹⁵ Bijtë e Simonit: Jamueli, Jamini, Ahodi, Jakini, Soari dhe Sauli, biri i Kananeases. Këto janë familjet e Simonit.

¹⁶ Këta janë emrat e bijve të Levit sipas familjeve të tyre: Gersoni, Kaati dhe Merariu. Levi jetoi njëqind e tridhjetë e shtatë vjet.

¹⁷ Bijtë e Gersonit: Lobniu dhe Semeia sipas familjeve të tyre.

¹⁸ Bijtë e Kaatit: Amrami, Isaari, Hebroni, Ozieli. Kaati jetoi njëqind e tridhjetë e tre vjet.

¹⁹ Bijtë e Merariut: Moholiu dhe Musiu. Këto janë familjet e Levit sipas breznive të tyre.

²⁰ Amrami e mori për grua Johabedën, emtën e vet. Ajo i lindi Aronin dhe Moisiun. Amrami jetoi njëqind e tridhjetë e shtatë vjet.

²¹ Bijtë e Isaharit: Koreu, Nefegu dhe Zehriu.

²² Bijtë e Ozielit: Misaeli, Elisafani dhe Setriu.

²³ Aroni mori për grua Elizabetën, bijën e Aminadabit, motrën e Nahasonit. Kjo i lindi Nadabin, Abiun, Eleazarin dhe Itamarin.

²⁴ Bijtë e Koreut: Asiri, Elkanai dhe Abiasafi. Kjo është familja e Koritajve.

²⁵ Kurse Eleazari mori për grua një vajzë të Futielit, që i lindi Fineesin. Këta janë trungjet e familjeve të Levitajve, sipas barqeve të tyre.

²⁶ Ky është ai Aroni dhe Moisiu, të cilëve u urdhëroi Zoti që t’i nxjerrin bijtë e Izraelit turma‑turma prej dheut të Egjiptit.

²⁷ Këta janë ata që folën me faraonin, mbretin e Egjiptit, që t’i nxjerrin bijtë e Izraelit prej Egjiptit: janë po ai Moisi dhe ai Aron.

Përsëritet tregimi i thirrjes së Moisiut

²⁸ Kjo ndodhi atë ditë, kur Zoti i foli Moisiut në dheun e Egjiptit:

²⁹ Zoti i tha Moisiut: “Unë jam Zoti! Thuaj faraonit, mbretit të Egjiptit, thuaj gjithçka po të them unë ty”. ³⁰ Moisiu foli në praninë e Zotit: “Ja, unë nuk jam gojëmbarë! Si do të më dëgjojë faraoni”?

Kapitujt