Kapitujt

Dalja: 2. Lindja e Moisiut

 ¹ Një burrë prej familjes së Levit shkoi e mori për grua një nga fisi i vet. ² Ajo ngjizi dhe lindi djalë. E pa se fëmija ishte i bukur dhe e fshehi për tre muaj. ³ Pasi s’mundi ta mbante më të fshehur, mori një shportë papirusi, e leu me bitum e me peshkve, brenda e futi fëmijën dhe e la në kallamishte, në breg të lumit. ⁴ Motra e fëmijës rrinte dhe vërente prej së largu çka do të ndodhë.

⁵ Dhe ja, bija e faraonit erdhi dhe hyri të lahet në lumë, ndërsa shërbëtoret e saja shëtisnin bregut të lumit. Bija e faraonit, kur e pa shportën në kallamishte, e dërgoi shërbëtoren e vet për ta sjellë. ⁶ Kur e hapi, pa në të një djalë që po qante. Pati dhimbje për të dhe tha: “Qenka një fëmijë hebrenjsh”! ⁷ Atëherë i tha motra e fëmijës: “A të shkoj e ta thërras një grua hebrenje që të mund ta ushqejë foshnjën”? ⁸ iu përgjigj: “Shko”! Vajza u lëshua vrap dhe e thirri t’ëmën e foshnjës. ⁹ Kësaj bija e faraonit i tha: “Merre këtë foshnjë dhe ma ushqe! Unë do të të paguaj”! Gruaja e mori fëmijën, e ushqeu e, kur u rrit, ia dorëzoi bijës së faraonit. ¹⁰ Kjo ia ngjiti emrin Moisi. Tha: “Sepse e nxorra prej ujit”.

Moisiu ikën në Madian

¹¹ Ndër ato ditë, Moisiu, si u rrit, shkoi te vëllezërit e vet. Pa se si po vuanin e pa edhe një egjiptian duke e rrahur një hebre ‑ prej vëllezërve të tij. ¹² Pasi shikoi këndej e andej e nuk pa kë, e vrau egjiptianin dhe e fshehi në rërë. ¹³ Doli të nesërmen dhe i pa dy hebrenj që po grindeshin. I tha atij që po e rrihte shokun: “Përse po e rrah të afërmin tënd”? ¹⁴ Ai iu përgjigj: “Kush të ka vënë prijës dhe gjykatës mbi ne? A mos po do të më vrasësh, siç e vrave egjiptianin”?

Moisiun e kapi frika dhe tha: “Po si doli kjo gjë në dritë”?

¹⁵ Kur i shkoi kjo ngjarje në vesh faraonit, ai deshi ta vrasë Moisiun. Moisiu iku prej tij dhe shkoi në dheun e Madianit e u ndal të pushojë përbri një pusi.

¹⁶ Tashti, prifti i Madianit kishte shtatë vajza. Këto erdhën të nxjerrin ujë. Këto i mbushën lugjet me ujë e donin t’u jipnin ujë grigjave të t’et. ¹⁷ Por arritën barinjtë dhe i dëbuan ato. Mirëpo, Moisiu u ngrit, i mbrojti vajzat dhe u dha ujë deleve të tyre. ¹⁸ Këto u kthyen tek i ati, Ragueli dhe ai u tha: “Përse u kthyet më shpejt se zakonisht”? ¹⁹ Ato përgjigjën: “Një burrë egjiptian na shpëtoi prej barinjve. Për më tepër, nxori ujë për ne dhe u dha edhe berreve tona”. ²⁰ Por ai u tha: “Ku është ai njeri? Përse e latë të shkojë? Thirreni të hajë bukë”! ²¹ Kështu Moisiu pranoi të jetojë tek ai njeri dhe e mori për grua Seforën, bijën e tij. ²² Ajo i lindi një djalë, të cilin e quajti Gersam. Tha: “Jam i ardhur në dhe të huaj”!

THIRRJA E MOISIUT

Hyjit i bie ndër mend për Izraelin

²³ Mirëpo, pas një kohe të gjatë, vdiq mbreti i Egjiptit. Izraelitët ende dënesnin në skllavëri. Klithnin të mjerët prej vuajtjeve të robërisë, dhe klithjet e tyre për ndihmë arritën te Hyji. ²⁴ Hyji i dëgjoi klithjet e tyre dhe iu kujtua besëlidhja që e lidhi me Abrahamin, me Izakun e me Jakobin. ²⁵ Zoti i pa izraelitët dhe u kujdesua për ta. Ai iu dëftua atyre.

Kapitujt