Kapitujt

Numrat: 34. Kufijtë e vendit

¹ Zoti foli me Moisiun e tha: 

² “Urdhëroju bijve të Izraelit e thuaju: Kur të hyni në dheun Kanaan e ta merrni në trashëgim me anë të shortit, ja vendi me kufijtë e tij:

³ Pjesa e jugut do të fillojë prej shkretëtirës Sin, që gjendet përbri Edomit. Për kufi në anën e lindjes do të ketë Detin e Kripur. ⁴ Atëherë kufiri do të marrë anën e jugut në krahun e shpatit Akrabim /d. m. th. të Gallomëve/, dhe do të vazhdojë nëpër Sinin e të arrijë në jug në Kadesbarnë. Prej andej do të marrë drejt Asaradarit e do të mbërrijë deri në Asemonë. ⁵ Prej Asemonës kufiri do të bëjë dredhë drejt lumit të Egjiptit për të dalë në bregun e Detit të Madh.

⁶ Për kufi të perëndimit do të fillojë prej Detit të Madh e me të do të marrë fund.

⁷ Për kufi në anën e veriut do të jetë prej Detit të Madh drejt e në malin Hor; ⁸ prej tij do të shkojë në hyrje të Ematit e do të marrë fund në Sedadë. ⁹ Atëherë kufijtë do të vazhdojnë deri në Zefronë e në Asarenon. Ky do të jetë kufiri verior.

¹⁰ Prej këndej le të vihen kufijtë në krahun e lindjes prej Asarenonit deri në Sefamë. ¹¹ Prej Sefamës le të zbresin deri në Reblë në anën e lindjes të Ajinit. Prej andej le të vazhdojnë të zbresin e të mbërrijnë deri në krahun e Detit Keneret në lindje ¹² e të prekin deri në Jordan e të marrin fund në Detin e Kripur.

Kjo do të jetë toka juaj me kufij përreth”.

¹³ Moisiu u dha bijve të Izraelit këto udhëzime: “Kjo është toka që do ta fitoni me short dhe të cilën Zoti urdhëroi t’u ndahet nëntë fiseve e gjysmës së një fisi. ¹⁴ Sepse fisi i Rubenit, sipas vëllazërive të veta dhe fisi i Gadit sipas vëllazërive të veta si dhe gjysma e fisit të Manaseut, ¹⁵ d. m. th. dy fise e gjysmë i morën pjesët e veta përtej Jordanit, përballë Jerikut, në anën e lindjes.”

Pleqtë e caktuar për të bërë ndarjen

¹⁶ Atëherë Zoti i tha Moisiut:

¹⁷ “Këta janë emrat e njerëzve që do t’jua ndajnë tokën: Eleazari prift dhe Jozuehi i Nunit ¹⁸ dhe për çdo fis nga një prijës. ¹⁹ Këta janë emrat e tyre:

prej fisit të Judës, Kalebi, biri i Jefoneut;

²⁰ prej fisit të Simonit, Samueli, biri i Amiudit;

²¹ prej fisit të Beniaminit, Elidadi, biri i Kaselonit;

²² prej fisit të bijve të Danit, Boci, biri i Jogliut;

²³ prej bijve të Jozefit: prej fisit të Manaseut, Hanieli, biri i Efodit; ²⁴ prej fisit të Efraimit, Kamueli i Seftanit;

²⁵ prej fisit të Zabulonit, Elisafani i Farnakut;

²⁶ prej fisit të Isaharit, prijësi Faltiel, biri i Ozanit;

²⁷ prej fisit të Aserit, Ahiudi i Salomiut;

²⁸ prej fisit të Neftaliut, Fedaeli i Amiudit.”

²⁹ Këta janë njerëzit që Zoti u urdhëroi t’ua ndajnë bijve të Izraelit dheun e Kanaanit.

Kapitujt