Kapitujt

Numrat: 30. Ligji mbi kushte

¹ Moisiu u tregoi izraelitëve gjithçka i kishte urdhëruar Zoti.

Ligji mbi kushte

² Atëherë Moisiu u tha prijësve të fiseve të izraelitëve:

Ja çka urdhëroi Zoti:

³ “Nëse ndokush ia bën Zotit ndonjë kusht, ose me përbetim zotohet të heqë dorë nga diçka, mos ta hajë fjalën e vet, por gjithçka premtoi le ta çojë në vend.

⁴ Gruaja, nëse i kushton çkado Zotit, ose zotohet me përbetim se do të heqë dorë nga diçka: nëse është në shtëpinë e t’et dhe ende në moshën e rinisë, ⁵ e i ati i saj e merr vesh se ka bërë atë kusht ose përbetim e nuk bën zë, atëherë janë të vlefshme të gjitha kushtet e saja e çfarëdo përbetimi që merr mbi vete. ⁶ Kurse, porsa dëgjon i ati, i kundërshton, si kushti si zotimi me betim i saj, janë të pavlefshëm, Zoti do ta falë, sepse i kundërshton i ati.

⁷ Nëse bën ndonjë kusht ose e lidh veten me mendjelehtësi me përbetim e zotim se do të përmbahet, po pastaj martohet: ⁸ atë ditë që burri i saj e merr vesh për këtë gjë e nuk i kundërshton, kushti është i vlefshëm dhe ajo duhet të kryejë, çkado që premtoi. ⁹ Kurse, kur i shoqi e merr vesh, i kundërshton bëhen të pavlefshme si kushti e premtimet e saja dhe me të cilat është lidhur: Zoti do t’ia falë.

¹⁰ Vejusha dhe e lëshuara çkado të kushtojnë, detyrohen ta plotësojnë.

¹¹ Gruaja në shtëpinë e burrit, nëse lidhet me ndonjë kusht ose me përbetim merr ndonjë zotim, ¹² nëse burri i saj merr vesh e hesht dhe nuk i kundërshton premtimit me kusht, duhet të kryejë çkado që premtoi. ¹³ Por, nëse burri, posa merr vesh, i kundërshton, nuk do të vlejë premtimi, sepse burri i kundërshton: dhe Zoti do t’ia falë. ¹⁴ Nëse u kushtua ose edhe lidhet me përbetim të bëjë pendesë me njënesë, burrit i përket ta pranojë ose ta mohojë kushtin. ¹⁵ Por, nëse i shoqi e merr vesh e hesht dhe e shtyn të vendosë prej ditës në ditë: çfarëdo që kushtoi ose premtoi, le ta çojë në vend, sepse, prej ditës që dëgjoi, heshti. ¹⁶ Por, nëse kundërshtoi, dikur vonë, përgjegjësinë e merr mbi vete për gabimin e gruas”.

¹⁷ Këto janë ligjet që Zoti ia dha Moisiut lidhur me burrin e gruan, lidhur me babanë dhe të bijën ende të re që gjendet ende në shtëpinë e t’et.

Kapitujt