Kapitujt

Numrat: 28. Përcaktime lidhur me fli

¹ Zoti i tha përsëri Moisiut:

² “Urdhëroju bijve të Izraelit e thuaju: Kini kujdes të më paraqitni flinë bimore ‑ shujtën time ‑ të djegur në zjarr, erë të këndshme për mua, në kohën e caktuar.

³ Ja flia e djegur në zjarr që ju duhet të ma kushtoni”:

A. Flitë e përditshme

“Çdo ditë dy qengja vjetakë, të patëmetë si fli të përhershme shkrumbimi. ⁴ Njërin kushtojeni në mëngjes e tjetrin në mbrëmje, ⁵ bashkë me flinë bimore një të dhjetën e efit më të mirit miell të ngjeshur me një të katërt të hin-it vaj të pastër. ⁶ Është kjo fli e përhershme shkrumbimi që e keni kushtuar në malin Sinai, në erë të këndshme, e djegur në zjarr në nder të Zotit; ⁷ njomeni me një të katërt të hin-it verë për çdo qengj. Njomjen bëjeni në Shenjtëtore ‑ pije dehëse në nder të Zotit. ⁸ Po kështu kushtojeni edhe qengjin e dytë në mbrëmje, sipas ritit të flisë mëngjesore: fli e shkrumbuar në zjarr në erë të këndshme për Zotin”.

B. E shtuna

⁹ “Kurse ditën e shtunë kushtoni dy qengja vjetakë, të patëmetë dhe dy të dhjeta të efit endës të ngjeshur me vaj me njomjen që i përket. ¹⁰ Kjo është flia e shkrumbimit e të shtunës për çdo të shtunë, përveç flisë së shkrumbimit të përhershme me njomjen e saj”.

C. Hëna e re

¹¹ “Në fillim të muajve tuaj kushtoni Zotit fli shkrumbimi: dy mëzetër, një dash, qengja vjetakë të patëmetë shtatë ¹² dhe tri të dhjeta endës të ngjeshur në vaj si fli bimore për çdo mëzat dhe dy të dhjetat endës të ngjeshur në vaj për çdo dash, ¹³ dhe një të dhjetë të efit endës të ngjeshur në vaj për fli bimore për çdo qengj: fli në erëkëndshmëri, fli e djegur në nder të Zotit. ¹⁴ Njomjet e tyre le të jenë: një gjysmë hinit verë për çdo mëzat, një e tretë për dashin, një e katërt për qengj. Kjo le të jetë flia e shkrumbimit për çdo muaj që në rrjedhjen e vitit vjen njëri pas tjetrit. ¹⁵ Përveç flisë së përhershme të shkrumbimit me njomjet e tyre le të kushtohet edhe cjapi për flinë për mëkat në nder të Hyjit”.

Ç. Të pabrumet

¹⁶ “Kurse në muajin e parë, të katërmbëdhjetën ditë të muajit le të jenë Pashkët në nder të Zotit, ¹⁷ e të pesëmbëdhjetën ditë e kremte. Për shtatë ditë ushqehuni me bukë të pabrume. ¹⁸ Të parën ditë të tyre le të mbahet tubimi i shenjtë: këtë ditë mos bëni asnjë punë të rëndë. ¹⁹ Kushtoni flinë e djegies, flinë e shkrumbimit në nder të Zotit: dy mëzetër, një dash dhe qengja vjetakë të patëmetë shtatë ²⁰ dhe, si fli bimore për çdonjërin, më të mirit miell të ngjeshur me vaj: tri të dhjetat e efit për secilin mëzat, dy të dhjetat për dash, ²¹ dhe një të dhjetë të efit për secilin qengj, d. m. th. për shtatë qengjat. ²² Një cjap për flinë për mëkat që të kryhet mbi ju riti i zgjidhjes. ²³ Përmbi këto edhe flia mëngjesore e përhershme. ²⁴ Kështu bëni për çdo ditë gjatë shtatë ditëve: është bukë, fli e djegur në erëkëndshmëri Zotit përveç flisë së përhershme të shkrumbimit dhe të njomjes së saj.

²⁵ Edhe të shtatën ditë le të jetë për ju ditë tubimi e shenjtë; atë ditë mos punoni asnjë punë të rëndë”.

D. Festa e Javëve

²⁶ “Po edhe ditën e Frytave të para, kur të kushtoni flinë bimore në nder të Zotit ‑ në të kremten e Javëve, mbajeni si ditë tubimi të shenjtë: atë ditë mos bëni asnjë punë të rëndë. ²⁷ Kushtoni flinë e shkrumbimit në erë të këndshme Zotit: dy mëzetër, një dash dhe qengja vjetakë të patëmetë shtatë. ²⁸ Si fli të kërkuar për të miell të ngjeshur me vaj: tri të dhjeta të efit për çdo mëzat, për dash dy të dhjetat ²⁹ dhe nga një të dhjetë të efit për secilin nga të shtatë qengjat. ³⁰ Edhe një cjap që flijohet për të kryer mbi ju ritin e zgjidhjes, ³¹ përveç flisë së përhershme të shkrumbimit dhe të flisë bimore që e përcjell. Kushtoni bagëti të pa të metë me njomjen e duhur”.

Kapitujt