Kapitujt

Numrat: 26. Regjistrimi i dytë

¹ Pas kësaj shuplake, Zoti i tha Moisiut dhe Eleazarit prift, birit të Aronit: ² ”Regjistrojeni mbarë bashkësinë e bijve të Izraelit njëzet vjeç e përpjetë sipas vëllazërive dhe barqeve të tyre, të gjithë ata që mund të dalin në luftë”.

³ Kështu, pra, Moisiu e Eleazari prift u treguan atyre në fushat e Moabit, në bregun e Jordanit, përballë Jerihonit. U thanë: ⁴”Le të bëhet regjistrimi i njerëzve njëzet vjeç e përpjetë siç i ka urdhëruar Zoti Moisiut”.

Ja, bijtë e Izraelit që kishin dalë nga Egjipti:

⁵ Rubeni, i parëlinduri i Izraelit. I biri i tij Henoku, prej të cilit rrjedh vëllazëria e Henokajve; Falui, prej të cilit rrjedh vëllazëria e Faluajve; ⁶ Hesroni, prej të cilit rrjedh vëllazëria e Hesronajve, dhe Karmiu, prej të cilit rrjedh vëllazëria e Karmijve. ⁷ Këto janë vëllazëritë prej fisit të Rubenit dhe numri i tyre doli 43. 730 vetë.

⁸ Biri i Faluit: Eliabi, ⁹ bijtë e tij: Namueli, Datani dhe Abirami. Datani dhe Abirami ishin ata dy udhëheqës të bashkësisë, që u ngritën kundër Moisiut e Aronit në kryengritjen e Koreut, kur u çuan kundër Zotit, ¹⁰ kur toka e hapi gojën e vet dhe i përpiu ata dhe Koreun dhe vdiq një shumicë e madhe, kur i përlau zjarri 250 burra: dhe u bënë një emnesë. ¹¹ Koreu vdiq, por të bijtë nuk u borën.

¹² Bijtë e Simonit sipas vëllazërive të tyre: Namueli, prej tij vëllazëria e Namuelajve; Jamini, prej tij vëllazëria e Jaminajve; Jakini, prej tij vëllazëria e Jakinajve; ¹³ Zarai, prej tij vëllazëria e Zarajve; Sauli, prej tij vëllazëria e Saulajve. ¹⁴ Këto janë vëllazëritë e fisit të Simonit, gjithsej numri i të cilëve ishte 22. 200 vetë.

¹⁵ Bijtë e Gadit, sipas vëllazërive të tyre: Sefoni, prej tij vëllazëria e Sefonajve; Agiu, prej tij vëllazëria e Agiajve; Suniu, prej tij vëllazëria e Suniajve; ¹⁶ Ozniu, prej tij vëllazëria e Ozniajve; Heriu, prej tij vëllazëria e Heriajve; ¹⁷ Arodi, prej tij vëllazëria e Arodajve; Arieli, prej tij vëllazëria e Arielajve. ¹⁸ Këto janë vëllazëritë e Gadit, gjithsej numri i të cilëve ishte 40. 500 vetë.

¹⁹ Bijtë e Judës: Heri e Onani. Të dy vdiqën në dheun e Kanaanit. ²⁰ Bijtë e Judës, sipas vëllazërive të tyre, qenë: Selai, prej të cilit vëllazëria e Selajve; Faresi, prej të cilit vëllazëria e Faresajve; Zarai, prej të cilit vëllazëria e Zarajve. ²¹ Kurse bijtë e Faresit: Hesroni, prej të cilit vëllazëria e Hesronajve; Hamuli, prej të cilit vëllazëria e Hamulajve. ²² Këto janë vëllazëritë e Judës. Gjithsej numri i tyre ishte 76. 500 vetë.

²³ Bijtë e Isaharit sipas vëllazërive të tyre: Tolai, prej të cilit vëllazëria e Tolajve; Fuai, prej të cilit vëllazëria e Fuajve; ²⁴ Jasubi, prej të cilit vëllazëria e Jasubajve; Semroni, prej të cilit vëllazëria e Semronajve. ²⁵ Këto janë vëllazëritë e Isaharit. Gjithsej numri i tyre ishte: 64. 300 vetë.

²⁶ Bijtë e Zabulonit, sipas vëllazërive të tyre: Saredi, prej të cilit vëllazëria e Saredajve; Eloni, prej të cilit vëllazëria e Elonajve; Jaheleli, prej të cilit vëllazëria e Jahelelajve. ²⁷ Këto janë vëllazëritë e Zabulonit. Gjithsej numri i tyre 60. 500 vetë.

²⁸ Bijtë e Jozefit sipas vëllazërive të tyre: Manaseu dhe Efraimi. ²⁹ Manaseut i lindi Mahiri, prej të cilit vëllazëria e Mahirajve. Mahirit i lindi Galaadi, prej të cilit vëllazëria e Galaadajve. ³⁰ Galaadi pati këta djem: Jezerin, prej të cilit vëllazëria e Jezerajve; dhe Helekun, prej të cilit vëllazëria e Helekajve; ³¹ Asrielin, prej të cilit është vëllazëria e Asrielajve; Sekemi, prej të cilit është vëllazëria e Sekemajve; ³² Semidanë, prej të cilit është vëllazëria e Semidajve; Heferin, prej të cilit është vëllazëria e Heferajve. ³³ Po edhe Heferi qe ati i Salfaadit, i cili nuk kishte djem, por vetëm vajza. Ato quheshin: Maala, Noa, Hegla, Melka e Tersa. ³⁴ Këto janë vëllazëritë e Manaseut. Numri i tyre 52. 700 vetë.

³⁵ Kurse bijtë e Efraimit, sipas vëllazërive të tyre, ishin këta: Sutalai, prej të cilit është vëllazëria e Sutalajve; Bekeri, prej të cilit është vëllazëria e Bekerajve; Teheni, prej të cilit është vëllazëria e Tehenajve: ³⁶ Biri i Sutalait qe Herani, prej të cilit është vëllazëria e Heranajve. ³⁷ Këto janë vëllazëritë e bijve të Efraimit. Numri i tyre qe 32. 500 vetë. Këta janë bijtë e Jozefit sipas vëllazërive të tyre.

³⁸ Bijtë e Beniaminit sipas vëllazërive të tyre: Baleu, prej të cilit është vëllazëria e Balejve; Asbeli, prej të cilit është vëllazëria e Asbelajve; Ahirami, prej të cilit është vëllazëria e Ahiramajve; ³⁹ Sufami, prej të cilit është vëllazëria e Sufamajve; Hufami, prej të cilit është vëllazëria e Hufamajve; ⁴⁰ Bijtë e Baleut: Aredi e Naamani. Prej Aredit, vëllazëria e Aredajve, prej Naamanit, vëllazëria e Naamanajve. ⁴¹ Këta janë bijtë e Beniaminit, sipas vëllazërive të tyre. Numri i tyre ishte 45. 600 vetë.

⁴² Të bijtë e Danit sipas vëllazërive të tyre: Suhami, prej të cilit vëllazëria e Suhamajve; këto janë vëllazëritë e Danit sipas vëllazërive të tyre: ⁴³ të gjithë ishin Suhamaj. Numri i tyre ishte 64. 400 vetë.

⁴⁴ Bijtë e Aserit, sipas vëllazërive të tyre; Jemna, prej të cilit vëllazëria e Jemnajve; Isui, prej të cilit vëllazëria e Isuajve; Beriai, prej të cilit vëllazëria e Beriajve. ⁴⁵ Bijtë e Beriait: Heberi, prej të cilit është vëllazëria e Heberajve e Melkieli prej të cilit vjen vëllazëria e Melkielajve. ⁴⁶ Emri i bijës së Aserit ishte Sarë, ⁴⁷ Këto janë vëllazëritë e bijve të Aserit. Numri i tyre 53. 400.

⁴⁸ Bijtë e Neftaliut sipas vëllazërive të tyre: Jasieli, prej të cilit vëllazëria e Jasielajve; Guniu, prej të cilit vëllazëria e Gunajve; ⁴⁹ Jeseri, prej të cilit vjen vëllazëria e Jeserajve; Selemi, prej të cilit janë Selemajt. ⁵⁰ Këto janë vëllazëritë e bijve të Neftaliut sipas vëllazërive të tyre. Numri i tyre ishte 45. 400 vetë.

⁵¹ Gjithsej numri i bijve të Izraelit që u regjistruan: 601. 730 vetë.

⁵² Zoti foli me Moisiun e tha:

⁵³ “Këtyre le t’u ndahet toka për pronë sipas numrit të anëtarëve. ⁵⁴ Atyre që kanë anëtarë më shumë, jepu më shumë, e atyre që kanë më pak, jepu më pak: secilit le t’i jepet prona e tij sipas regjistrimit; ⁵⁵ porse vetëm kështu: toka le të ndahet me short. Le ta marrin trashëgimin sipas anëtarëve të secilit fis. ⁵⁶ Shorti le ta caktojë pjesën e secilit ndërmjet të gjitha fiseve si për fise të mëdha ashtu për fise të vogla”.

Regjistrimi i levitëve

⁵⁷ Ky është numri i bijve të Levit të regjistruar sipas vëllazërive të tyre: Gersoni, prej të cilit rrjedh vëllazëria e Gersonajve; Kaati, prej të cilit rrjedh vëllazëria e Kaatajve; Merariu, prej të cilit rrjedh vëllazëria e Merariajve. ⁵⁸ Këto janë vëllazëritë e Levit: vëllazëria e Lobniajve, vëllazëria e Hebro‑ najve, vëllazëria e Moholiajve, vëllazëria e Musiajve, vëllazëria e Koreajve. Kurse Kaatit i lindi Amrami. ⁵⁹ Ky pati grua Jokabedën, bijën e Levit, që i pati lindur në Egjipt. Kjo i lindi Amramit, burrit të vet, fëmijët: Aronin, Moisiun dhe Marinë, motrën e tyre. ⁶⁰ Prej Aronit lindën Nadabi, Abihui, Eleazari e Itamari. ⁶¹ Prej tyre vdiqën Nadabi dhe Abihui kur kushtuan para Zotit zjarrin e pashuguruar.

⁶² Të gjithë të regjistruarit ishin 23. 000 meshkuj prej një muaji e përpjetë. Këta nuk qenë regjistruar bashkë me të tjerët bijtë e Izraelit as nuk u qe ndarë pronë ndër bijtë e Izraelit.

⁶³ Ky është numri i bijve të Izraelit që qenë regjistruar prej Moisiut e prej Eleazarit prift në rrafshet e Moabit, në brigjet e Jordanit, përballë Jerihonit. ⁶⁴ Ndër ta s’ishte asnjë prej atyre që i patën regjistruar Moisiu e Aroni në shkretëtirën e Sinait: ⁶⁵ sepse Zoti pati parakallëzuar se të gjithë, përveç Kalebit, birit të Jefoneut, dhe të Jozuehit, birit të Nunit, do të vdisnin në shkretëtirë: dhe njëmend askush prej tyre nuk mbeti gjallë.

Kapitujt