Kapitujt

Numrat: 25. Izraeli në Fegor

¹ Izraeli nguli në Setim e populli filloi të bëjë fëlligështi me moabitet, ² të cilat e grishnin popullin në flitë e kushtuara hyjnive të veta. Ata hanin dhe i adhuronin hyjnitë e tyre: ³ ranë kështu nën zgjedhën e Beelfegorit. Zoti u hidhërua dhe ⁴ i tha Moisiut: “Merri të gjithë krerët e popullit dhe vari para Zotit në mundime me fytyrë kah dielli që të largohet hidhërimi im prej Izraelit”. ⁵ Moisiu u tha gjykatësve të Izraelit: “Le t’i vrasë gjithkush njerëzit e vet që ranë nën zgjedhën e Beelfegorit”.

⁶ Dhe, ja, po atëherë, një izraelit e solli me vete ndër vëllezër një madianite ndër sy të Moisiut e të mbarë bashkësisë që po qante para derës së Tendës së takimit. ⁷ Kur e pa këtë gjë Fineesi, biri i Eleazarit, i biri i Aronit prift, u ngrit prej mbledhjes së bashkësisë, mori në dorë një heshtë, ⁸ hyri pas atij izraeliti në dhomë dhe i shporoi të dy, si trimin si gruan, në baqth. Kështu pushoi shfarosja e bijve të Izraelit. ⁹ E njëmend qenë vrarë njëzet e katër mijë vetë.

¹⁰ Atëherë Zoti i tha Moisiut: ¹¹ “Fineesi, biri i Eleazarit të Aronit prift, e largoi zemërimin tim prej bijve të Izraelit, sepse në mesin e tyre e pushtoi zelli im, kështu që unë nuk pata nevojë ta qes fare Izraelin. ¹² Prandaj fol me të e thuaj: Unë po ia dhuroj besëlidhjen time të paqes, ¹³ që do të jetë si për të ashtu edhe për pasardhësit e tij. Kjo besëlidhje do t’u sigurojë priftërinë e përhershme, sepse u dëftua i zellshëm për Hyjin e vet dhe e kreu ritin e zgjidhjes mbi bijtë e Izraelit”.

¹⁴ Emri i izraelitit, që u vra bashkë me madianiten, ishte Zambri, biri i Saluit, prijësi i një vëllazërie të fisit të Simonit; ¹⁵ kurse madianitja, që po ashtu qe vrarë, quhej Kozbi, bija e Surit, prijës i një fisi të Madianit.

¹⁶ Zoti foli me Moisiun e tha: ¹⁷ “Luftoni kundër madianitëve dhe goditni, ¹⁸ sepse ata vepruan me armiqësi kundër dhe ju tradhtuan me dredhi në rastin e Fegorit dhe të motrës së tyre Kozbisë, bijës së prijësit të Madianit, që u vra ditën e shfarosjes për shkak të Fegorit”.

Kapitujt