Kapitujt

Numrat: 8. Dritëzat e shandanit

¹ Zoti foli me Moisiun e tha:

² “Fol me Aronin e thuaj: Kur t’i ndezësh dritëzat, shtatë dritëzat duhet të bëjnë dritë në anë para shandanit”.

³ Aroni bëri kështu dhe i vuri dritëzat mbi shandan ashtu siç i urdhëroi Zoti Moisiut.

⁴ Shandani ishte i punuar kështu: prej arit të farkuar si kërcelli i mesëm ashtu edhe boçat e tij. Shandani qe punuar sipas gjedhes që Zoti ia dëftoi Moisiut.

Levitët janë të kushtuar Zotit

⁵ Prapë Zoti foli me Moisiun e tha:

⁶ “Veçoji levitët prej mesit të bijve të Izraelit dhe pastroji ⁷ sipas këtij riti. Le të stërpiken me ujin e pastrimit e le t’i rruajnë të gjitha qimet e trupit të vet, le t’i lajnë petkat e veta e do të jenë të pastër. ⁸ Le ta marrin një mëzat dhe flinë kushtimore bimore endsën e ngjeshur me vaj. Merre ti një mëzat tjetër për flinë për mëkat. ⁹ Afroji levitët pranë Tendës së takimit dhe bashkoje mbarë bashkësinë e bijve të Izraelit. ¹⁰ Kur levitët të jenë vënë në praninë e Zotit, bijtë e Izraelit le t’i vënë duart mbi ta, ¹¹ dhe Aroni le t’i kushtojë levitët me ritin e tundjes para Zotit si dhuratë prej bijve të Izraelit, që të shërbejnë në shërbesën e tij. ¹² Po edhe levitët le t’i vënë duart e veta përmbi kokat e qeve, prej të cilëve njërin kushtoje fli për mëkat e tjetrin fli shkrumbimi në nder të Zotit, për të kryer mbi ta ritin e zgjidhjes. ¹³ Atëherë vëri levitët para Aronit dhe bijve të tij dhe kushtoja Zotit me ritin e tundjes, ¹⁴ dhe veçoji prej mesit të bijve të Izraelit që të jenë të mitë. ¹⁵ Vetëm atëherë le të hyjnë për të shërbyer në Tendën e takimit.

Kështu pastroji dhe kushtoji me ritin e tundjes, ¹⁶ sepse më janë dhuruar si dhuratë prej mesit të bijve të Izraelit; i mora ata në vend të të gjithë të parëlindurve që lindin të parët në Izrael. ¹⁷ Sepse mua më përkasin të gjithë të parëlindurit e izraelitëve qofshin njerëz qofshin bagëti. Që prej ditës kur i vrava të gjithë të parëlindurit në dheun e Egjiptit, i shenjtërova ata për mua. ¹⁸ Këndej i mora levitët në vend të të parëlindurve të bijve të Izraelit ¹⁹ dhe ia dhashë Aronit dhe bijve të tij prej mesit të bijve të Izraelit që të më shërbejnë mua në vend të izraelitëve në Tendën e takimit, që mbi ta të kryejnë ritin e zgjidhjes që të mos i gjejë ndonjë e keqe izraelitët pse i janë afruar Shenjtërores”.

²⁰ Moisiu, Aroni dhe mbarë bashkësia e izraelitëve bënë mbi levitët gjithçka i kishte urdhëruar Zoti Moisiut. ²¹ U pastruan dhe i lanë petkat e veta, edhe Aroni e kreu mbi ta ritin e tundjes para Zotit dhe e kreu mbi ta ritin e zgjidhjes që, të pastruar, ²² të hyjnë në shërbim në Tendën e takimit në praninë e Aronit e bijve të tij. Gjithçka u bë mbi levitët ashtu si i kishte urdhëruar Zoti Moisiut.

Mosha e shërbimit

²³ Zoti foli me Moisiun e tha:

²⁴ “Ja një rregullore lidhur me levitët: njëzet e pesë vjeç e përpjetë le ta marrin detyrën për të shërbyer në Tendën e takimit ²⁵ e kur t’i kenë plotësuar pesëdhjetë vjeç le të pushojnë nga shërbimi. ²⁶ Por mund t’i ndihmojnë vëllezërve të vet në të kryer të shërbesave të tyre në Tendën e takimit, por nuk do të kenë më për detyrë të shërbejnë.

Kështu vepro ndaj levitëve lidhur me detyrat e tyre”.

Kapitujt