Kapitujt

Numrat: 4. Vëllazërit e levitëve:

¹ Zoti foli me Moisiun e Aronin e tha:

² “Ndaje numrin e bijve të Kaatit prej bijve të Levit sipas vëllazërive dhe barqeve të tyre, ³ prej tridhjetë vjet deri në pesëdhjetë vjet, të të gjithë atyre që e kanë në kujdes të punojnë në Tendën e takimit.

⁴ Dhe, ja, shërbesa e bijve të Kaatit në Tendën e takimit: kujdesim për gjërat më të shenjtat.

⁵ Kur do të duhet të bëhet çoja, Aroni dhe bijtë e tij le të hyjnë e le ta heqin koltrinën që është e varur në hyrje para e me të le ta mbulojnë Arkën e Dëshmisë. ⁶ Pastaj le ta mbulojnë përsëri me mbulesën e lëkurave të delfinit, mbi të le ta shtrijnë një pëlhurë vjollce, dhe le t’i shtijnë shtojagat. ⁷ Po ashtu edhe tryezën e bukëve të kushtimit le ta mbulojnë me pëlhurë ngjyrë vjollce e mbi të le të vënë enët, kusitë, qypat, lugët për flitë e njomjes. Bukët duhet të jenë vazhdimisht në të. ⁸ Atëherë le të shtrijnë mbi të një pëlhurë të kuqe, të cilën le ta mbulojnë prapë me mbulesën e lëkurave të delfinit e le t’i shtijnë shtojagat. ⁹ Le ta marrin edhe pëlhurën ngjyrë vjollce, e me të le ta mbulojnë shandanin me dritëza, zhirheqës e lotmbajtës dhe të gjitha enët e vajit, që janë të domosdoshme për t’i përgatitur dritëzat. ¹⁰ Përmbi të gjitha le të vënë mbulesën prej lëkurash delfini dhe le ta vënë mbi mbartëse. ¹¹ Gjithashtu edhe lterin e artë le ta mbështjellin me pëlhurë ngjyrë vjollce e le ta mbulojnë me lëkura delfini dhe le t’i shtijnë shtagat. ¹² Të gjitha enët që përdoren për shërbesë në Shenjtërore, le t’i mbështjellin me pëlhurë ngjyrë vjollce, le të shtrijnë mbi të mbulesën prej lëkurash delfini dhe le t’i vënë mbi mbartëse. ¹³ Po edhe lterin le ta pastrojnë nga hiri dhe le ta mbështjellin me pëlhurë të kuqe: ¹⁴ le t’i vënë mbi të të gjitha enët, të cilat i përdorin në shërbesën e tij, d. m. th. prushorët, pirunjtë, lopatëzat, kupat. Të gjitha enët e lterit le t’i mbulojnë së bashku me mbulesë lëkurash delfini e le t’i fusin shtagat.

¹⁵ Pasi Aroni e bijtë e tij ta kenë mbështjellë Shenjtëroren dhe të gjitha enët e shenjta të saja kur të bëhet çoja nga zemërimia, atëherë le të hyjnë bijtë e Kaatit për t’i mbartur ashtu të mbështjella, por të mos e prekin Shenjtëroren që të mos vdesin.

¹⁶ I përket Eleazarit, birit të Aronit prift, të kujdeset për vajin e dritëzave, për kemin e erëndshëm, për flinë kushtimore bimore që kushtohet vazhdimisht, për vajin e shugurimit si dhe për të gjitha që i përkasin kultit të Banesës dhe për të gjitha orenditë që janë në Shenjtërore”.

¹⁷ Zoti foli me Moisin e Aronin e tha:

¹⁸ “Mos lejoni të shuhet vëllazëria e Kaatajve prej fisit të Levit, ¹⁹ por bëni kështu me ta që të jetojnë e të mos vdesin, kur t’u afrohen gjërave më të shenjta: Aroni e bijtë e tij le të hyjnë e le ta caktojnë punën e secilit dhe le të ndajnë çka kush duhet të mbartë. ²⁰ Ata të mos hyjnë as për të parë, qoftë edhe një moment të vetëm, në Shenjtërore; ndryshe do të vdesin”.

B. Gersonajt

²¹ Zoti foli me Moisiun e tha:

²² “Regjistroji edhe bijtë e Gersonit sipas vëllazërive e barqeve të tyre; ²³ numëroji të gjithë prej tridhjetë vjetëve e përpjetë deri në pesëdhjetë vjet që mund të hyjnë në rend për të shërbyer në Tendën e takimit.

²⁴ Ja detyra e vëllazërive të Gersonajve në shërbim e në mbartje: ²⁵ le të mbartin koltrinat e Banesës, Tendën e takimit, mbulesën e saj dhe mbulesën mbi të të lëkurave të delfinit, koltrinën që varet në hyrje të Tendës së takimit, ²⁶ koltrinat e tremes dhe velin në hyrje të tremes që rrethon Banesën dhe lterin, litarët dhe veglat të gjitha që u janë dhënë për të kryer shërbimin e tyre. ²⁷ Nën urdhrin e Aronit e të bijve të tij Gersonajt le të mbartin e secili le të dijë çka i duhet të bëjë. ²⁸ Kjo është detyra e vëllazërisë së Gersonajve në Tendën e takimit. Le të jenë nën drejtimin e Itamarit, birit të Aronit prift”.

C. Merariajt

²⁹ “Regjistroji edhe bijtë e Merariut sipas vëllazërive dhe barqeve të tyre ³⁰ të gjithë ata tridhjetë vjet e përpjetë deri në pesëdhjetë vjet, që hyjnë në rend për të kryer detyrën e shërbimit të vet në Tendën e takimit.

³¹ Ja detyrat e tyre: le të mbartin dërrasat e Banesës dhe shtagat e tyre, shtyllakët dhe fundësorët e tyre, ³² shtyllakët e tremes për rrethim me fundësorët e tyre, kunjat dhe litarët e tyre: të gjitha veglat për shërbimin e tyre: shkruani me emër secilën gjë që duhet të mbartin. ³³ Kjo është detyra e bijve të Merariut dhe shërbimi i tyre në Tendën e takimit. Le të jenë nën drejtimin e Itamarit, birit të Aronit prift”.

Regjistrimi i levitëve

³⁴ Moisiu, Aroni dhe prijësit e bashkësisë i regjistruan bijtë e Kaatit sipas vëllazërive dhe barqeve të tyre, ³⁵ të gjithë ata tridhjetë vjet e përpjetë deri në pesëdhjetë vjet që mund të hynin në rend në shërbim të Tendës së takimit: ³⁶ dolën dy mijë e shtatëqind e pesëdhjetë. ³⁷ Ky është numri i anëtarëve të familjeve të Kaatit, që shërbejnë në Tendën e takimit: këta i regjistruan Moisiu e Aroni me urdhërin që Zoti i dha Moisiut.

³⁸ U regjistruan edhe bijtë e Gersonit sipas vëllazërive dhe barqeve të tyre ³⁹ të gjithë ata tridhjet vjet e përpjetë deri në pesëdhjetë vjet, që hyjnë në rend për shërbim në Tendën e takimit: ⁴⁰ u gjetën sipas vëllazërive dhe barqeve të tyre dy mijë e gjashtëqind e tridhjetë. ⁴¹ Ky është numri i Gersonajve, i të gjithë atyre që shërbejnë në Tendën e takimit, që i regjistroi Moisiu e Aroni sipas urdhrit të Zotit.

⁴² U regjistruan edhe anëtarët e familjes së Merariut sipas vëllazërive dhe barqeve të tyre ⁴³ të gjithë ata tridhjetë vjet e përpjetë deri në pesëdhjetë vjet, që shërbejnë në Tendën e takimit: ⁴⁴ dhe dolën tri mijë e dyqind. ⁴⁵ Ky është numri i familjeve të bijve të Merariut, që i regjistruan Moisiu e Aroni sipas urdhrit që Zoti i dha Moisiut.

⁴⁶ Të gjithë levitët e regjistruar, të cilët i shkruan për emër Moisiut, Aroni dhe prijësit e Izraelit sipas vëllazërive dhe barqeve të tyre ⁴⁷ tridhjetë vjet e përpjetë deri në pesëdhjetë vjet, të gjithë ata që mund të hyjnë në rend për shërbim në Tendën e takimit dhe për të mbartur barrë në Tendën e takimit, ⁴⁸ e dolën tetë mijë e pesëqind e tetëdhjetë. ⁴⁹ Me urdhërin që Zoti i dha Moisiut ai i regjistroi secilin sipas detyrës që kryente e çka mbarte, ashtu si i kishte urdhëruar Zoti.

Kapitujt