Kapitujt

Numrat: 3. Fisi i Levit:

¹ Këta janë pasardhësit e Aronit e të Moisiut kur Zoti foli me Moisiun në malin e Sinait.

² Këta janë emrat e bijve të Aronit: i parëlinduri i tij Nadabi, pastaj Abihui, Eleazari e Itamari: ³ këta janë emrat e bijve të Aronit, priftërinjve të lyer e të shuguruar për të kryer shërbesën priftërore. ⁴ Porse vdiqën Nadabi e Abihui, ndërsa po i kushtonin Zotit zjarrin e pashuguruar në shkretëtirën e Sinait e nuk lanë fëmijë. Këndej shërbestuan si priftërinj në praninë e Aronit, t’et, Eleazari dhe Itamari.

B. Levitët. Detyrat e tyre

⁵ Zoti foli me Moisiun e tha:

⁶ “Afroje fisin e Levit dhe vëre para Aronit prift që të jenë nën urdhrat e tij ⁷ e të kryejnë gjithçka i përket atij dhe mbarë bashkësisë në punët e Tendës së takimit duke shërbestuar në Banesë. ⁸ Le të kujdesen për të gjitha orenditë e Tendës së takimit duke kryer kështu shërbesat që do t’i kryenin bijtë e Izraelit. ⁹Jepju si dhuratë Aronit e bijve të tij prej anës së bijve të Izraelit levitët që ata ua dhuruan. ¹⁰ Aronin dhe bijtë e tij caktoji të kryejnë shërbesën priftërore. Laiku që do të afrohej të shërbejë, le të vritet”.

C. Zoti i zgjedh levitët

¹¹ Zoti foli prapë me Moisiun e tha:

¹² “Ja, unë i zgjodha për vete prej bijve të Izraelit levitët në vend të të parëlindurve, atyre që të parët lindin ndër bijtë e Izraelit: levitët le të jenë të mitë. ¹³ Sepse, mua më përket çdo i parëlindur! Atë ditë kur i vrava të gjithë të parëlindurit në dheun e Egjiptit, i shugurova për vete të gjithë të parëlindurit që lindin në Izrael qoftë njerëz qoftë bagëti: janë të mitë. Unë jam Zoti”.

Ç. Regjistrimi i levitëve

¹⁴ Zoti i tha Moisiut në shkretëtirën e Sinait:

¹⁵ “Regjistroji bijtë e Levit sipas barqeve e vëllazërive të tyre të gjithë meshkujt një muaj e përpjetë”.

¹⁶ Moisiu i regjistroi si kishte urdhëruar Zoti ¹⁷ dhe këta janë emrat e bijve të Levit: Gersoni, Kaati, e Merari.

¹⁸ Këta janë emrat e bijve të Gersonit sipas barqeve të tyre: Lobni e Semei. ¹⁹ Bijtë e Kaatit, sipas barqeve të tyre: Amrami, Isaari, Hebroni dhe Ozieli. ²⁰ Bijtë e Merariut, sipas barqeve të tyre: Meholi e Musiu. Këta janë barqet e Levit sipas vëllazërive të tyre.

²¹ Prej Gersonit rrjedhin dy vëllazëri e Lobniajve dhe e Semeiajve. ²²Të gjithë përkatësit meshkuj të tyre u regjistruan prej një muaji e përpjetë e dolën: shtatë mijë e pesëqind. ²³ Këta zemërimionin pas Banesës në perëndim ²⁴ e për prijës kishin Eliasafin, birin e Laelit. ²⁵ Kishin në kujdes Tendën e takimit, vetë Banesën dhe Tendën, mbulesën e saj, velin e hyrjes në Tendën e takimit, ²⁶ koltrinat e tremes, si dhe velin që është në hyrjen e tremes, që është përreth Banesës dhe lterit, për litarët e saj e gjithçka lypet për të.

²⁷ Kaati ka këto vëllazëri: Amramitajt, Isaarajt, Hebronajt e Ozielajt; këto janë vëllazëritë e Kaatajve. ²⁸ Të gjithë meshkujt prej një muaji e përpjetë: tetë mijë e gjashtëqind. Kishin në kujdesim Shenjtëroren. ²⁹ Vëllazëritë e Kaatit zemërimionin në anën e Banesës në krahun e jugut. ³⁰ Për prijës kishin Elisafanin, birin e Ozielit. ³¹ Ata kishin në kujdesim Arkën, tryezën, shandanin, lterët dhe enët e shenjtërores me të cilat bëhet shërbesa, velin dhe gjithçka i përket asaj. ³² Prijësi i prijësve të levitëve ishte Eleazari, biri i Aronit prift. Ai mbikëqyrte ata që e kishin në kujdesim Shenjtëroren.

³³ Kurse prej Merariut ishin vëllazëritë e Moholiajve e të Musiajve. ³⁴ Të gjithë meshkujt prej një muaji e përpjetë: gjashtë mijë e dyqind. ³⁵ Prijësi i vëllazërive të Merariut ishte Surieli, biri i Abihailit. Zemërimionin në anën e veriut të Banesës. ³⁶ Nën kujdesin e tyre ishin dërrasat e Banesës, shtagat, shtyllakët dhe fundat e tyre, e të gjitha veglat përkatëse të tyre dhe gjithsa i takon shërbesës së tyre. ³⁷ Po ashtu edhe shtyllakët e tremes të rrethit me fundësorët e tyre si dhe kunjat e litarët.

³⁸ Zemërimionin para Banesës, në anën e lindjes, para Tendës së takimit, në lindje, Moisiu e Aroni me bijtë e tyre që e kishin në kujdes Shenjtëroren ndër bijtë e Izraelit. Kushdo tjetër të afrohej, do të vdiste.

³⁹ Të gjithë levitët që i regjistroi, sipas urdhrit të Zotit, Moisiu, sipas vëllazërive të tyre, meshkuj prej një muaji e përpjetë dolën njëzet e dy mijë.

D. Levitët dhe shpërblimi i të parëlindurve

⁴⁰ Zoti i tha Moisiut:

“Numëroji të gjithë të parëlindurit meshkuj të bijve të Izraelit e regjistroje emrin e secilit prej një muaji e përpjetë; ⁴¹ dhe levitët m’i jep mua në vend të të gjithë të parëlindurve të Izraelit ‑ unë jam Zoti ‑ dhe bagëtitë e levitëve në vend të të gjithë të parëlindurve të bagëtive të bijve të Izraelit”.

⁴² Moisiu i regjistroi, siç i urdhëroi Zoti, të gjithë të parëlindurit e Izraelit, ⁴³ e dolën të gjithë meshkujt emër për emër prej një muaji e përpjetë njëzet e dy mijë e dyqind e shtatëdhjetë e tre.

⁴⁴ Zoti foli me Moisiun e tha:

⁴⁵ “Merri levitët në vend të të gjithë të parëlindurve të Izraelit si dhe bagëtitë e levitëve në vend të bagëtive të tyre. Levitët le të jenë të mitë. Unë jam Zoti. ⁴⁶ Kurse si shpërblim për dyqind e shtatëdhjetë e tre të parëlindur që e tejkalojnë numrin të levitëve, ⁴⁷ merr nga pesë sikla me masë të Shenjtërores, për çdo kokë. Sikli ka njëzet gera. ⁴⁸ Paratë jepja Aronit e bijve të tij çmimin e atyre që janë më tepër”.

⁴⁹ Kështu Moisiu e mori shumën e parave të atyre që ishin tepër nga numri i atyre që ishin të shpërblyer prej levitëve. ⁵⁰ Prej të parëlindurve të bijve të Izraelit mori shumën e parave një mijë e treqind e gjashtëdhjetë e pesë sikla sipas peshës së Shenjtërores. ⁵¹ Ia dha Aronit e bijve të tij ato para sipas urdhrit që i kishte dhënë Zoti.

Kapitujt