Kapitujt

Dalja: 39. Petkat e kryepriftit

¹ Me pëlhurën ngjyrë vjollce, të kuqe e të kuqe të mbyllur dhe me li të dredhur punuan petkat liturgjike për shërbesë në Shenjtërore. Punuan petkat e shenjta të Aronit, sikurse Zoti i ka urdhëruar Moisiut.

Shpinorja

² Shpinoren e punuan prej arit, me pëlhurë ngjyrë vjollce, të kuqe e të kuqe të mbyllur dhe me li të dredhur. ³ Punuan pllaka ari dhe i prenë në fije të holla që të mund t’i gërshetojnë me mjeshtri në pëlhurë ngjyrë vjollce, të kuqe e të kuqe të mbyllur dhe në li të dredhur. ⁴ Për shpinoren i punuan krahëzat që ishin të lidhura me të në dy skajet e tyre. ⁵ Rrypi që ishte mbi të dhe e mbante të shtrënguar, ishte i të njëjtit punim dhe një cope me të, i punuar me ar, me pëlhurë ngjyrë vjollce, të kuqe e të kuqe të mbyllur dhe me li të tjerrë, po ashtu si i kishte urdhëruar Zoti Moisiut. ⁶ I punuan edhe dy gurë oniksi, të ndryer në rrathë ari me emrat e bijve të Izraelit të gdhendur në ta me mjeshtri të gdhendjes së gurëve të paçmueshëm. ⁷ I venduan në krahëzat e shpinores që të jenë gurë përkujtues të bijve të Izraelit, po ashtu si i kishte urdhëruar Zoti Moisiut.

Parzmorja

⁸ E punuan edhe parzmoren me punim mjeshtror si shpinoren prej arit, me pëlhurë ngjyrë vjollce, të kuqe e të kuqe të mbyllur e me li të tjerrë, ⁹ katror, të dyfishtë, një pëllëmbë gjatë e gjerë. ¹⁰ Në të vunë katër radhë margaritarësh: në rreshtin e parë ishte: rubini, topazi e smeraldi; ¹¹ në të dytin: karbunkulli, safiri e jaspisi; ¹² në të tretin: hiacinti, ahati e ametisti; ¹³ në të katërtin: krisoliti, oniksi e berili: ishin të rrethuar me ar sipas radhës së tyre. ¹⁴ Dhe në dymbëdhjetë gurët ishin të gdhendur emrat e dymbëdhjetë fiseve të Izraelit: secili gur nga një emër, të secilit fis. ¹⁵ Në parzmore punuan vargje si teje të gërshetuar me mjeshtri, prej arit të kulluar. ¹⁶ I punuan pastaj edhe dy rrathë të artë edhe aq unaza të arta. Dy unazat i vunë në dy skajet e parzmores; ¹⁷ dy vargjet e arta i mbërthyen në dy unazat, që ishin në dy skajet e parzmores. ¹⁸ Dy majët e dy vargjeve i lidhën në dy buzët e krahëzave të shpinores në pjesën e saj të përparme. ¹⁹ I punuan edhe dy unaza ari dhe i vunë në dy skajet e parzmores në buzën e saj të brendshme kundër shpinores, po ashtu siç i urdhëroi Zoti Moisiut. ²⁰ Punuan edhe dy unaza të tjera të arta, e i vunë në dy krahëzat e shpinores poshtë në krahun e saj të përparmë përbri vendit ku lidhet mbi rrypin e shpinores. ²¹ Atëherë e shtrënguan parzmoren me unazat e saja për unazat e shpinores me shirit purpure ngjyrë vjollce, kështu që parzmorja rri mbi rrypin e shpinores që të mos mund të ndahet prej shpinores, po ashtu si i urdhëroi Zoti Moisiut.

Guna

²² E punuan edhe gunën e shpinores, vepër e mjeshtrit të pëlhurës, prej pëlhurës ngjyrë vjollce ²³ e në mes të saj, lart, grykën për të qitur kokën, si gryka në pancir; buzën e grykës e qepën që të mos shqyhet guna. ²⁴ Në fund të gunës, te këmbët, gjithkund përreth, i punuan prej pëlhure ngjyrë vjollce, të kuqe e të kuqe të mbyllur dhe prej lirit të tjerrë shega, ²⁵ kurse prej arit krejt të kulluar punuan kumbonëza, që i vunë ndërmjet të shegave në pjesën e fundme të gunës gjithkund përreth, ²⁶ kështu që të jetë një kumbonëz ndërmjet të secilës shegë: një kumbonëz e një shegë e prapë një kumbonëz e një shegë; kryeprifti i stolisur me to ecte, kur ushtronte shërbesën, siç i kishte urdhëruar Zoti Moisiut.

Petkat e priftërinjve

²⁷ I punuan edhe këmishat e linjta me mjeshtri pëlhure për Aronin e për bijtë e tij; ²⁸ punuan edhe kësulën prej lirit të tjerrë dhe stolitë për kësula prej lirit të tjerrë, edhe të linjtat prej lirit të tjerrë, ²⁹ brezin liri të tjerrë , ngjyrë vjollce, të kuqe e të kuqe të mbyllur, me mjeshtri robaqepësi, siç i kishte urdhëruar Zoti Moisiut.

Keza ‑ shenja e shugurimit

³⁰ E punuan edhe paftën ‑ kezën e shugurimit, prej arit krejt të pastër. Shkruan në të me mjeshtri të gdhendësit “I shuguruar Zotit” ³¹ dhe e shtrënguan përmbi në kësulë me shirit ngjyrë vjollce, sikurse Zoti i kishte urdhëruar Moisiut.

³² Kështu u kryen të gjitha punimet e Banesës dhe të Tendës së takimit. Bijtë e Izraelit kryen gjithçka sikurse Zoti i kishte urdhëruar Moisiut: bënë pikërisht ashtu.

Dorëzimi i veprave të kryera Moisiut

³³ Atëherë ia sollën Moisiut Banesën:

‑ Tendën, e të gjitha pjesët përkatëse të saja, komçet, dërrasat, shtagat, shtyllakët, bazat, ³⁴ mbulesën me lëkura deshësh të regjura dhe mbulesën me lëkura delfinësh, koltrinën;

‑ ³⁵ Arkën e Dëshmisë, shtagat, pajtimoren;

‑ ³⁶ Tryezën, të gjitha pjesët përbërëse të saja, bukët e kushtimit;

‑ ³⁷ Shandanin prej arit të kulluar, dritëzat në rendin e tyre dhe pjesët përkatëse të tyre, vajin e ndriçimit;

‑ ³⁸ Lterin e artë, bagmin, temjanin me erëra të mira, koltrinën për në hyrje të Tendës;

‑ ³⁹ Lterin bronzi, skarën e tij bronzi, shtagat e enët e tija të gjitha;

‑ Legenin dhe fundësorin e tij;

‑ ⁴⁰ Koltrinat e tremes, shtyllakët me bazat e tyre, koltrinën për në hyrje në treme, litarët e saj e kunjat. Nuk mungoi asgjë prej enëve për shërbesë në Banesë, për Tendën e takimit;

‑ ⁴¹ Petkat liturgjike për të kryer shërbesën në shenjtërore priftërinjtë, petkat e shenjta të Aronit prift edhe petkat e bijve të tij, ⁴² i sollën bijtë e Izraelit, pikë për pikë siç i kishte urdhëruar Zoti Moisiut.

‑ ⁴³ Moisiu, pasi i pa se të gjitha ishin kryer si duhet, i bekoi.

Kapitujt