Kapitujt

Dalja: 38. Lteri i flive të shkrumbimit

¹ E punoi edhe lterin e flive të shkrumbimit prej drurit të akacies katror pesë kutë me pesë e të lartë tre kutë. ² Në katër këndet e tij i punoi brirët që ishin një tërësi me të. E mbuloi me pllaka bronzi. ³ Dhe për përdorimin e tij punoi enë të ndryshme bronzi: kusi, vegsha, kupëza, tërfurq dhe enë për të mbajtur zjarrin. ⁴ E punoi skarën e tij në trajtë të rrjetës, prej bronzit, nën buzën e lterit për fund të saj e deri në gjysmë të lterit. ⁵ I shkriu katër rrathë për aq këndet e skarës, për të futur shtagat për mbartje. ⁶ Edhe shtagat i punoi prej drurit të akacies dhe i mbuloi me pllaka bronzi, ⁷ i futi në rrathë në të dy anët e lterit. Lterin e punoi prej dërrasash, bosh nga brenda.

Legeni

⁸ E punoi edhe legenin prej bronzit me fundësorin e tij të punuar nga pasqyrat e grave që shërbenin në derë të Tendës së takimit.

Ndërtimi i tremes

⁹ E punoi edhe tremen . Në anën e jugut të tremes ishin koltrinat pëlhure liri të tjerrë njëqind kutësh; ¹⁰ shtyllakët bronzi njëzet me aq baza bronzi, kurse komçet dhe thuprat e tyre prej argjendi. ¹¹ Po ashtu edhe në anën e veriut, koltrinat, shtyllakët, bazat, komçet e thuprat e shtyllakëve, ishin po të njëjtës masë, punimi e metali. ¹² Kurse në atë anë që shikon në drejtim të perëndimit, koltrinat ishin pesëdhjetëkutshe, dhjetë shtyllakë me bazat e tyre si dhe komçet e thuprat e shtyllakëve ishin argjendi. ¹³ Kurse në anën e lindjes i punoi koltrinat pesëdhjetë‑ kutshe, ¹⁴ prej të cilave njëri krah kishte pesëmbëdhjetë kutë, tre shtyllakë me bazat e tyre, ¹⁵ kurse në krahun tjetër ‑ sepse ndërmjet këtyre dy anëve e punoi hyrjen ‑ po ashtu koltrinat ishin pesëmbëdhjetëkutshe, shtyllakë kishte tre e po aq baza. ¹⁶ Të gjitha koltrinat e tremes rreth e rreth ishin prej lirit të përpunuar. ¹⁷ Bazat e shtyllakëve ishin prej bronzit, kurse komçet e tyre dhe thuprat e tyre ishin prej argjendit, majët e tyre i veshi me argjend dhe të gjithë shtyllakët e tremes ishin të rrethuar me thupra argjendi. ¹⁸ E në hyrjen e saj e punoi koltrinën ‑ me mjeshtri të qendisur ‑ prej pëlhure të linjtë ngjyrë vjollce, të kuqe e të kuqe të mbyllur; ishte e gjatë njëzet kutë, e lartë pesë kutë, sipas masës që kishin të gjitha koltrinat e tremes . ¹⁹ Shtyllakët e hyrjes ishin katër me bazat e tyre prej bronzit. Komçet ishin sermi. Majët e shtyllakëve ishin të veshura me argjend po ashtu edhe thuprat ishin prej argjendi. ²⁰ Të gjithë kunjat brenda Banesës ishin prej bronzit rreth e rreth.

Llogaria e metaleve të përdorura

²¹ Ky është shënimi i gjërave të Banesës ‑ Banesës së Dëshmisë, që u bë me urdhër të Moisiut me shërbesën e Levitëve nën drejtimin e Itamarit, birit të Aronit prift.

²² I punoi të gjitha ato që Zoti i kishte urdhëruar Moisiut Beseleeli i Uri Hurit të fisit të Judës, ²³ i shoqëruar nga Ooliabi i Asihamekut të fisit Dan, që ishte mjeshtër gdhendjeje, robaqepësie dhe qendisjeje për pëlhurë ngjyrë vjollce, të kuqe e të kuqe të mbyllur dhe për li të tjerrë.

²⁴ I gjithë ari që u shpenzua në punime të Shenjtërores dhe që u dha si ndihmesë ‑ ja: njëzet e nëntë talenta dhe shtatë qind e tridhjet sikla, në sikla të shenjtërores. ²⁵ E argjend, i mbledhur me rastin e regjistrimit të bashkësisë, ja: njëqind talenta e njëmijë e shtatëqind e shtatëdhjetë e pesë sikla, në sikla të shenjtërores, ²⁶ ose një Beka, d. m. th. një gjysmë sikli për kokë me peshën e siklit të shenjtërores, dha secili që e kapi regjistrimi, prej njëzet vjetësh e përpjetë. Ishin: gjashtëqind e trimijë e pesëqind e pesëdhjetë të regjistruar. ²⁷ Njëqind talentat e argjendit u shpenzuan për fundësoret e Shenjtërores dhe të koltrinave: për çdo fundësor nga një talent. ²⁸ Me njëmijë e shtatëqind e shtatëdhjetë e pesë sikla i punoi komçet për shtyllakë, i veshi majët e tyre dhe i punoi thuprat për ta.

²⁹ Edhe bronz u kushtua shtatëdhjetë talenta e dy mijë e katërqind sikla. ³⁰ Me të punoi bazat për hyrje në Tendën e takimit dhe lterin e bronzit me skarën e tij e me të gjitha enët e tija përkatëse, ³¹ dhe fundësoret e tremes si për rrethin ashtu edhe për hyrjen e saj dhe kunjat e Banesës dhe të tremes rreth e rreth.

Kapitujt