Kapitujt

Dalja: 37. Arka

¹ Beseleeli e punoi Arkën prej drurit të akacies: dy kutë e gjysmë të gjatë, të gjerë një kut e gjysmë, të lartë po ashtu një kut e gjysmë; e veshi me ar të kulluar përbrenda e përjashta. ² Përreth i punoi një brez ari.

³ I shkriu për të katër rrathë ari dhe i mbërtheu në katër këmbët e Arkës: dy rrathë në njërin krah e dy në krahun tjetër. ⁴ I punoi edhe dy shtaga prej drurit të akacies, të cilat i veshi me ar ⁵ dhe i futi në rathët që janë në krahët e Arkës, për ta mbartur Arkën.

⁶ E punoi edhe Pajtimoren prej arit të kulluar: të gjatë dy kutë e gjysmë e të gjerë një kut e gjysmë.

⁷ I punoi edhe dy kerubinë prej arit të rrahur në dy skajet e Pajtimores: ⁸ njëri kerubin në njërin skaj e tjetri në tjetrin skaj. Kerubinët në të dy anët i punoi një cope me Pajtimoren. ⁹ Kerubinët i kishin krahët të shtrirë përmbi dhe e mbronin me krahë Pajtimoren, me shikim të drejtuar në njëri‑tjetrin dhe mbi Pajtimoren.

Tryeza e bukëve të kushtimit

¹⁰ E punoi edhe një tryezë prej drurit të akacies të gjatë dy kutë, të gjerë një kut e të lartë një kut e gjysmë. ¹¹ E rrethoi me ar të pastër e përreth ia punoi një brez të artë. ¹² Ia punoi edhe buzën katër gishta të gjerë rreth e rreth e mbi të një brez të artë rreth e rreth. ¹³ I shkriu edhe katër rrathë të artë, të cilët i mbërtheu në katër këndet te këmbët e tryezës ¹⁴ përbri buzës; në ta i përshkoi shtagat, që të mund të mbaret tryeza. ¹⁵ Shtagat i punoi prej drurit të akacies dhe i rrethoi me ar. ¹⁶ I punoi edhe enët për përdorime të ndryshme të tryezës: mashtka, gota, enë e kupa për t’i njomur kushtet; të gjitha prej arit të pastër.

Shandani

¹⁷ E punoi prej arit të pastër të rrahur edhe një shandan me bazën e me shtizën e tij. Po edhe gotat, burbuqet dhe fletët i shkriu një me të: ¹⁸ në të dy anët gjashtë krahë, tre në njërën anë e tre në anën tjetër. ¹⁹ Në njërin krah tri gota në trajtën e lules së bajames si dhe burbuqet e fletët po edhe tri gota në trajtën e lules së bajames në krahun e dytë si dhe burbuqet e fletët. Po i njëjti punim ishte i gjashtë krahëve që dilnin nga shtiza e shandanit. ²⁰ Në vetë shtizën e shandanit ishin katër gota në trajtën e lules së bajames po dhe burbuqet e fletët; ²¹ çdo gotë nën krahët binjakë në tri vende që të gjithë së bashku bëjnë gjashtë krahë që dalin nga një shtizë e vetme. ²² Gotat, pra, dhe krahët ishin një me të; të gjitha prej arit të pastër të farkuar. ²³ Punoi edhe shtatë dritëza me lotëpresësit e tyre dhe me lotëmbajtës ku bien lotët, prej arit tejet të pastër.

²⁴ Shandani me të gjitha pjesët përkatëse të tij peshonte një talent ari të kulluar.

Lteri i kemimit. Bagmi e erërat e mira

²⁵ E punoi edhe lterin e kemimit prej drurit të akacies katror nga një kut gjatë e një kut gjerë dhe lart dy kutë; nga këndet e tyre dilnin brirët. ²⁶ E veshi me ar të kulluar me skarë, brinja dhe brirë. ²⁷ Ia punoi edhe brezin ari rreth e rreth dhe dy rrathë ari nën brezin e artë në të dy anët që të përshkohen nëpër ta shtagat që të mund të mbartet lteri. ²⁸ Kurse shtagat i punoi prej drurit të akacies dhe i veshi me pllaka ari.

²⁹ Përgatiti edhe vajin për bagmin e shugurimit dhe temianin prej erërave të pastra të kemimit.

Kapitujt