Kapitujt

Dalja: 36. Përfundimi i mbledhjes së ndihmesës

¹ Beseleeli dhe Ooliabi dhe të gjithë mjeshtrit, të cilët Zoti i kishte pajisur me dije e aftësi që t’i kryejnë me mjeshtri të gjitha punimet e nevojshme për ndërtimin e Shenjtërores, i kryen të gjitha siç kishte urdhëruar Zoti.

Përfundimi i mbledhjes së ndihmesës

² Atëherë Moisiu i grishi Beseleelin e Ooliabin dhe të gjithë ata që Zoti i kishte pajisur me mjeshtri; të gjithë ata që u dëshironte zemra t’i qepen punës e atë ta kryejnë. ³ I morën prej Moisiut të gjitha ndihmesat që kishte dhënë populli i Izraelit për punimet e ndërtimit të Shenjtërores. Por izraelitët vazhdonin çdo mëngjes të sillnin ndihmesa vullnetare. ⁴ Andaj të gjithë mjeshtrit që ndërtonin Shenjtëroren ‑ secili nga puna që i ishte në krye ‑ erdhën te Moisiu ⁵ e i thanë: “Populli po bie më shumë se lypet për punën që Zoti urdhëroi të bëhet.” ⁶ Atëherë Moisiu urdhëroi të shpallet me zë të kasnecit: “As burrë as grua të mos sjellë më asgjë si ndihmesë për Shenjtëroren.” Kështu, pra, u ndalua të sillen më dhurata, ⁷ sepse dhuratat që kishin sjellë ishin të mjaftueshme, madje edhe tepronin.

Banesa

⁸ Dhe kështu më të dijshmit njerëz ndër mjeshtrit e punuan Banesën. E punuan me dhjetë koltrina prej pëlhure të lirit të tjerrë me pëlhurë ngjyrë vjollce, të kuqe e të kuqe të mbyllur me kerubinë të qendisur me mjeshtri. ⁹ Gjatësia e çdo koltrine ishte njëzet e tetë kutë e gjerësia katër kutë: të gjitha koltrinat kishin të njëjtën masë. ¹⁰ I bashkoi pesë koltrina kokë më kokë dhe të pesë të tjerat prapë njërën me tjetrën. ¹¹ I punoi edhe vjegëzat prej leshit ngjyrë vjollce në kindin e njërës koltrinë në fund aty ku duhet të përpiqen po edhe në kindin e tjetrës koltrinë të fundit aty ku duhet të përpiqen. ¹² I punoi nga pesëdhjetë vjegëza për secilën koltrinë, kështu që vjegëzat të binin njëra kundrejt tjetrës që të mund të lidhen njëra me tjetrën.

¹³ Atëherë i punoi pesëdhjetë komçarë ari që t’i kapin vjegëzat e të bëhet Banesa një tërësi. ¹⁴ I punoi edhe njëmbëdhjetë çulla me lesh dhish për mbulesë mbi Banesën; ¹⁵ gjatësia e njërit çull ishte tridhjetë kutë, kurse gjerësia katër kutë: të gjithë çullat kishin të njëjtën masë. ¹⁶ Pesë prej tyre i përpoqi veçmas e gjashtë të tjerët veçmas. ¹⁷ I punoi pesëdhjetë vjegëza në buzë të çullit të fundit në vend ku përpiqen dhe pesëdhjetë në buzë të çullit në vend të përpjekjes së tjetrit që të bashkohen me njëri-tjetrin. ¹⁸ Punoi edhe pesëdhjetë komçarë bronzi me të cilët të lidhet mbulesa që të bëhet një tërësi. ¹⁹ Atëherë punoi edhe një mbulesë tjetër për Tendë prej lëkurash të regjura deshësh e prapë edhe një mbulesë tjetër përmbi të me lëkura delfinësh.

Lënda drusore

²⁰ Atëherë i punoi prej drurit të akacies dërrasat pingule të Banesës. ²¹ Gjatësia e njërës dërrasë ishte dhjetë kutë e gjerësia një kutë e gjysmë. ²² Secila dërrasë kishte nga dy kunja si mbështetëse të lidhura njëra me tjetrën. Kështu i punoi të gjitha dërrasat e Banesës. ²³ Prej tyre njëzet ishin në krahun e jugut që kthen prej mesditës ²⁴ me dyzet fundra të argjendta. Viheshin dy fundra nën secilën dërrasë për dy kunjat. ²⁵ Po ashtu edhe në krahun e Banesës që është në anën e veriut, i punoi njëzet dërrasa ²⁶ me dyzet fundra të argjendta: nga dy fundra për secilën dërrasë. ²⁷ Kurse në perëndim, d. m. th. në krahun e Banesës që shikon në drejtim të detit, i punoi gjashtë dërrasa ²⁸ dhe dy të tjera për çdo kënd të Banesës përpas, ²⁹ që ishin binake prej poshtë e deri lart të bashkuara në një tërësi. Kështu i punoi të dy dërrasat për të dy këndet, ³⁰ kështu që ishin së bashku tetë dërrasa e gjashtëmbëdhjet fundra argjendi: d. m. th. dy fundra nën çdo dërrasë. ³¹ I punoi edhe tërthorcat prej drurit të akacies: pesë për t’i mbajtur dërrasat e njërit krah të Banesës ³² dhe pesë të tjera për t’i mbajtur së bashku dërrasat e krahut të tjetër; e përveç këtyre, edhe pesë tërthorca të tjera në anën e perëndimit të Banesës përballë detit. ³³ Punoi edhe një tërthorcë ‑ shtagë të mesme, që për mjedis të dërrasave mbërrinte prej njërit skaj në tjetrin. ³⁴ Dërrasat i veshi me ar. Po edhe rrathët e tyre, nëpër të cilët përshkohen tërthorcat, i punoi prej arit. Edhe tërthorcat i veshi me pllaka ari.

Tisi

³⁵ E punoi edhe koltrinën prej pëlhurës ngjyrë vjollce, të kuqe e të kuqe të mbyllur dhe prej lirit të tjerrë me kerubina të qendisur në të, artistikisht. ³⁶ Për të i punoi katër shtyllakë prej drurit të akacies. Këta i veshi me ari. I punoi edhe komçartë e tyre të artë. Bazat e tyre i shkriu prej argjendit.

³⁷ Për në hyrje të Tendës e punoi edhe koltrinën me pëlhurë ngjyrë vjollce, të kuqe e të kuqe të mbyllur e me li të përpunuar të qendisur me mjeshtri. ³⁸ I punoi edhe pesë shtyllakë me komçarët e tyre. Majët e shtyllakëve dhe shufrat i punoi prej arit, kurse bazat e tyre i shkriu prej bronzit.

Kapitujt