Kapitujt

Dalja: 30. Lteri i erërave të mira

¹ “Punoje edhe lterin për djegien e kemit. Punoje prej drurit të akacies ² një kut të gjatë, një kut të gjerë, d. m. th. katror ‑ të lartë dy kutë. Brirët e tij le të jenë një me të. ³ Veshe me ar të kulluar qoftë skarën e tij qoftë edhe anët rreth e rreth dhe brirët e tij. Bëja përreth një brez ari ⁴ dhe në brez punoja dy rrathë të artë për të dy anët e vëri në dy krahët që të kalohen nëpër ta shtagat për ta mbartur lterin. ⁵ Kurse shtagat punoji prej drurit të akacies e praroji. ⁶ Lterin vendoje para koltrinës që është e varur para Arkës së Dëshmisë, afër Pajtimores që ndryn Dëshminë, ku do të takohem me ty. ⁷ Mbi të Aroni le ta djegë temjanin e erëndshëm në mëngjes. Le ta ndezë kur përgatit dritëzat; ⁸ po edhe kur t’i ndezë ato në mbrëmje, le ta djegë kemin, që të jetë kemim i përhershëm para Zotit brez pas brezi ndër ju. ⁹ Mos kushtoni në të as temjane të pashenjtëruara, as fli shkrumbimi, paraqitjeje, as njomjeje. ¹⁰ Aroni le ta kryejë njëherë në vit ritin e shpërblimit në brirët e tij me gjak të flisë që kushtohet për mëkat; le ta kryejë një herë në vit ritin e shpërblimit për lter. Bëni kështu në breznitë e ardhshme. Ky lter, tejet i shenjtë, do të jetë i kushtuar Zotit”.

Tatim për kokë të njeriut

¹¹ Zoti foli me Moisiun dhe i tha: ¹² “Kur t’i njehësh për t’i regjistruar bijtë e Izraelit, le t’i japë secili Zotit çmimin e shpërblimit për jetën e vet kur të shkruhet e s’do t’i gjejë ndonjë e keqe në ditë të regjistrimit. ¹³ Secili që e kap regjistrimi le të japë kaq: një gjysmë sikli ‑ sipas masës së shenjtërores, ku janë njëzet obola për një sikel. Kjo gjysmë sikli është paradhënie për Zotit. ¹⁴ Të gjithë ata që i kap regjistrimi ‑ prej njëzet vjetësh e përtej, duhet t’ia japin ndihmesë Zotit. ¹⁵ Pasaniku të mos japë më shumë e skamnori të mos japë më pak se gjysmë sikli kur të jepni paradhënien Zotit për shpërblim të jetës suaj. ¹⁶ Të hollat e nxjerra prej bijve të Izraelit për shpërblim, jepi në përdorim të Tendës së takimit. Le të jenë para Zotit si shenjë i përkujtimit të tyre e do të ketë mëshirë për jetën e tyre”.

Legeni

¹⁷ Zoti foli me Moisiun e i tha: ¹⁸ “Punoje edhe legenin prej bronzit me fundësorin e tij prej bronzit për t’u larë. Vendoje ndërmjet Tendës së takimit e lterit. Qit në të ujë ¹⁹ e Aroni dhe bijtë e tij le t’i lajnë në të duart e këmbët (e tyre). ²⁰ Kur do të hyjnë në Tendën e takimit le të lahen me ujë, që të mos vdesin. Po kështu edhe kur t’u duhet t’i afrohen lterit për shërbesë ose për të shkrumbuar flinë në nder të Zotit. ²¹ Le t’i lajnë duart e këmbët që të mos vdesin: është rregullore e përhershme për të e për pasardhësit e tij brezni më brezni”.

Vaji për lyerje – bagmi

²² Zoti foli me Moisiun ²³ e i tha: “Merr erëra të mira të dorës së parë: të zgjedhur mirë, pesëqind sikla; cinamom të erëndshëm: gjysëm aqi: d. m. th. dyqind e pesëdhjetë sikla; e kallam erëmirë po aq: dyqind e pesëdhjetë sikla, ²⁴ kanellë: pesëqind sikla ‑ me peshën e shenjtërores ‑ dhe një hin vaj ulliri. ²⁵ Punoje prej këtyre vajin e shenjtë të lyerjes ‑ përzierje e erëndshme ‑ vepër e erëbërësit: ky të jetë vaji i shenjtë i shugurimit. ²⁶ Me të lyeje Tendën e takimit dhe Arkën e dëshmisë, ²⁷ tryezën dhe të gjitha veglat përkatëse të sajat, shandanin dhe veglat përkatëse të tija, lterin e kemimit ²⁸ lterin e flive të shkrumbimit me veglat e tija përkatëse, legenin dhe fundësorin e tij. ²⁹ Shenjtëroji të gjitha dhe do të jenë tejet të shenjta: e kushdo që do t’i prekë, do të jetë i kushtuar.

³⁰ Lyeje kështu edhe Aronin e bijtë e tij dhe shuguroji që të ushtrojnë priftërinë time. ³¹ Thuaju edhe bijve të Izraelit: ky është vaji im për shugurim prej breznie në brezni. ³² Me të të mos lyhet assesi trupi i njeriut të thjeshtë dhe mos punoni tjetër vaj me këtë përmbajtje. Ky është i shenjtëruar dhe le t’ju jetë i shenjtë. ³³ Njeriu që do të merrte guxim të punojë një gjë të kësaj përmbajtjeje ose të guxonte të lyejë trupin e ndonjë laiku, le të shfaroset prej popullit të vetë”.

Erërat e mira

³⁴ Zoti i tha përsëri Moisiut: “Merr erëra të mira: storaks, oniks, galban të erëndshëm dhe kem të pastër në pjesë të barabarta. ³⁵ Punoje një përzierje erërash të mira si i bëjnë erëbërësit ‑ të kripur, të pastër e të shenjtë. ³⁶ Pasi ta kesh grimcuar e bërë pluhur një pjesë prej saj, vëre para Dëshmisë në Tendën e takimit, ku do të takohem me ty: temjani të jetë për ju një gjë tejet e shenjtë. ³⁷ Një përmbajtje të tillë mos e bëni për përdorimin tuaj: le ta kesh gjë të kushtuar Zotit. ³⁸ Kush ta bëjë një gjë të tillë për t’ia shijuar erën e mirë, le të zhduket prej fisit të tij”.

Kapitujt